استانادا 11 شىلدە كۇنى «ەكسپو-2017» مامانداندىرىلعان حالىقارالىق كورمەسى شەڭبەرىندە مەملەكەت باسشىسى نۇرسۇلتان ءابىشۇلى نازارباەۆتىڭ قازاقستاندىق قوعامدىق كەلىسىم مەن جالپىۇلتتىق بىرلىك مودەلىن ناسيحاتتاۋعا  ارنالعان   «Volksfest – 2017» فولكلورلىق فەستيۆالى  بولىپ ءوتتى.

بۇل ءىس-شارا م. گوركي اتىنداعى مەملەكەتتىك اكادەميالىق ورىس دراما تەاترىندا وتكىزىلىپ، قاتىسۋشىلار تاراپىنان وڭ باعاسىن الدى. وسى مەرەكەلىك كەشتىڭ كونتسەرتتىك باعدارلاماسىن ۇيىمداستىرعان قازاقستانداعى «ۆوزروجدەنيە» نەمىس قوعامدىق بىرلەستىگى قاۋىمداستىعى ەكەنىن اتاپ وتكەن ءجون.

فەستيۆالدىڭ اشىلۋ سالتاناتىنا گفر بۋندەستاگىنىڭ دەپۋتاتى، فەدەرالدىق ۇكىمەتتىڭ قونىس اۋدارۋشىلار جانە از ۇلتتار ىستەرى جونىندەگى وكىلى  حارتمۋت كوشيك، قازاقستان حالقى اسسامبلەياسى توراعاسىنىڭ ورىنباسارى دارحان قامزابەكۇلى مىڭباي، قحا مۇشەلەرى، مەملەكەتتىك ورگانداردىڭ جانە ەتنومادەني بىرلەستىكتەردىڭ وكىلدەرى، قالا تۇرعىندارى مەن قوناقتارى قاتىستى.

قازاقستانداعى نەمىستەر ءۇشىن ەڭ ماڭىزدى وقيعاعا سانالعان «Volksfest» فەستيۆالىنىڭ وزىندىك ەرەكشەلىگى بار ەكەنى داۋ تۋعىزبايدى. وسى ارقىلى نەمىستەردىڭ مادەنيەتى مەن ءتىلى رەسپۋبليكالىق جانە حالىقارالىق دارەجەدە كوپشىلىككە تانىلدى. ۇلتارالىق كەلىسىم، دوستىق پەن رۋحاني بىرلىككە نەگىزدەلگەن بۇل ءىس-شارا شىعارماشىلىق ارىپتەستىكتى ودان ءارى دامىتۋعا سارا جول سالدى.

گفر بۋندەستاگىنىڭ دەپۋتاتى، فەدەرالدىق ۇكىمەتتىڭ قونىس اۋدارۋشىلار جانە از ۇلتتار ىستەرى جونىندەگى وكىلى  حارتمۋت كوشيك ءوز سوزىندە قازاقستان-گەرمانيا ۇكىمەتارالىق كوميسسياسىنىڭ ماڭىزىنا توقتالىپ، قازاقستانداعى «ۆوزروجدەنيە» نەمىس قوعامدىق بىرلەستىگى قاۋىمداستىعىنىڭ وسىنداعى نەمىستەر مۇددەسىنە مەملەكەتتىك دەڭگەيدە قارايتىنىن اتاپ ءوتتى.

قازاقستانداعى نەمىستەر رەسپۋبليكامىزداعى ەتنيكالىق توپتاردىڭ ىشىندە سان جاعىنان جەتىنشى ورىندى يەلەنگەن. ولار قازاقستان مەن گەرمانيا ەلدەرىن جالعاستىرۋشى التىن كوپىر رەتىندە تانىلعان. وسى ءىستىڭ جۇيەلى ۇيلەستىرىلۋىنە ەتنوستاردىڭ تاريحي وتاندارىمەن بايلانىستاردىڭ ساقتالىپ، نىعايۋى قىزمەتىن باسىم دامىتىپ وتىرعان قازاقستان حالقى اسسامبلەياسى اسا زور ەڭبەك ءسىڭىرىپ وتىر.

ماڭىزدى ءىس-شارانىڭ قوناقتارى مەن قاتىسۋشىلارىن قۇتتىقتاعان قازاقستان حالقى اسسامبلەياسى توراعاسىنىڭ ورىنباسارى د.ق. مىڭباي بىلاي دەدى: «وسىنداي ءىس-شارالار ارقىلى ءبىز بولاشاق ۇرپاققا باي مۇرامىزدى تانىستىرىپ، ەجەلگى ساباقتاستىق ءتىنىن تەرەڭگە جالعاستىرا الامىز». ول ودان ارعى سوزىندە قازاقستان حالقى اسسامبلەياسى قىزمەتىنىڭ نەگىزگى باعىتتارىنىڭ ءبىرى - وسىندا تۇرىپ جاتقان بارلىق ۇلتتاردىڭ مادەنيەتى مەن تىلدەرىنىڭ ساقتالۋىنا  ايرىقشا كۇش سالىنىپ جاتقانىن اتاپ ءوتتى.

ءىس-شارا بارىسىندا فولكلورلىق قۇندىلىققا نەگىزدەلگەن «Volksfest – 2017» فەستيۆالى اياسىندا ەلوردا تۇرعىندارى مەن قوناقتارىنا تاماشا كونتسەرتتىك-ويىن-ساۋىق باعدارلاماسى ۇسىنىلدى. وسى كەشتى ارلەندىرگەن ۆوكالدى جانە حورەوگرافيالىق باعدارلاما دا ەشكىمدى بەي-جاي قالدىرعان جوق. ءبىر سوزبەن ايتقاندا، نەمىس مادەنيەتىنىڭ قۇندىلىقتارى جينالعان بارشا قاۋىمدى ءتانتى ەتتى.

 مەرەكەلىك فەستيۆالدى وتكىزۋ بارىسىندا اعايىندىق، تاتۋلاستىق ءتىنىن ودان ءارى جالعاستىرۋ ماقساتىمەن گەرمانيادان ارنايى قوناقتار شاقىرىلدى. سونىمەن بىرگە، تەاترلاندىرىلعان ءىس-شاراعا پاۆلودار، رۋدنىي جانە قاراعاندى قالالارىنىڭ شىعارماشىلىق ونەرپازدارى قاتىسىپ، ءان شىرقاپ، مىڭ بۇرالا بي بيلەدى. وسى كەشتە قازاق جانە ورىس تىلدەرىندە دە ءان شىرقالدى.

اتالعان ءىس-شارانىڭ باستى ماقساتى – قازاقستاندا  تۇرىپ جاتقان ەتنوستاردىڭ قالىپتاسقان سالت-داستۇرىمەن جانە ادەت-عۇرىپتارىمەن جۇرتشىلىقتى كەڭىنەن تانىستىرۋ ءارى قازاقستاندىق ەتنوسارالىق كەلىسىم مەن تۇراقتىلىقتى نىعايتۋ. سوندىقتان وسى كەشتەگى كەلىستى ءىس-شارا ارقىلى الەمدىك قاۋىمداستىق قازاقستان حالقىنىڭ باي تاريحي-مادەني مۇراسىمەن تاعى ءبىر مارتە كەڭىرەك تانىستى.

ءىلياس اقباي

Abai.kz