"اۋرۋىن جاسىرعان ولەدى" دەگەن ماقال بار. قازاقتىڭ داۋىلپاز اقىنى مۇرات موڭكەۇلى: "مەن قاۋىپ ەتكەننەن ايتامىن" دەپتى عوي. مەن دە قاۋىپ ەتكەننەن، سول قاۋىپتىڭ الدىن الۋ ءۇشىن جازىپ وتىرمىن.
كەلەر جىلى ماڭعىستاۋدا xالىقتىڭ تولقۋى بولۋى ابدەن مۇمكىن...
وعان باستى سەبەپ - جۇمىسسىزدىق!

قازىر ءبىزدىڭ قوعام جۇمىسسىزدىقتى جاسىرىپ وتىر. ء"وزىن-ءوزى اسىراۋشى", "قازاق جالقاۋ", "جاستار ەرىنشەك" دەگەن سىلتاۋلار كوبەيىپ بارادى. جاستاردى سوندايعا ۇيرەتكەن ءوزىمىز ەمەس پە؟

قازىر ماڭعىستاۋ مۇنايشىلارىن 5/50 دەگەن باعدارلاما مەن جۇمىستان شىعارىپ جاتىر. جاستار 5 جىلعى جالاقىسىنىڭ 50 پايىزىن العانعا ءماز بولىپ، جۇمىستان كەتۋدە. قازىر قولدارىنا 5-8 ميلليون العانعا قۋانعان جاستار جۇمىستان ءوز ەركىمەن باس تارتۋدا.

بۇل اقشانى ولار ءبىر جىلعا دا جەتكىزبەي قۇرتادى. بۇل باعدارلاما كەلەر جىلى جۇمىسسىزدىقتىڭ دەڭگەيىن 2,3 ەسەگە كوبەيتەدى.

وزگە ايماقتارمەن سالىستىرعاندا ماڭعىستاۋدا تاماق، كيىم، تۇتىنۋ بۇيىمدارى وتە قىمبات. وسى جانە باسقا دا ءتۇرلى الەۋمەتتىك قيىندىقتار جينالا كەلىپ، xالىقتىڭ جاپپاي نارازىلىعىنا ۇلاسۋى ىقتيمال. بۇل قاۋىپتىڭ الدىن الماساق ەرتەڭ كەش قالامىز. سول كەزدە تەك سالدارمەن عانا كۇرەسەتىن بولامىز. ارينە مەن ەلدىڭ تىنىشتىعىن، اماندىعىن ويلاعاسىن جازىپ وتىرمىن. اقىلداسايىق، تالقىلايىق، اۋرۋىمىزدى جاسىرمايىق، اعايىن!

قاشانعى توي-تويلايمىز؟ ەكسپو دا جاقىندا اياقتالادى. جاز دا ءوتىپ بارادى...

جانىبەك قوجىق

Abai.kz