سۋرەت ازاتتىق راديوسىنىڭ سايتىنان الىندى

لاتىن الىپبيىنە كوشۋ حالقىمىزدىڭ تالاي جىلداردان بەرگى اڭساعان ارمانى عانا ەمەس، زاماننىڭ ءوزى تۋدىرىپ وتىرعان قاجەتتىلىك ەكەندىگى ءسوزسىز. سوندىقتان دا جاڭا ءالىپبي ماسەلەسىنىڭ پارلامەنت وتىرىسىندا تالقىلانىپ، ونىڭ بىرىڭعاي ستاندارتتارىن قالىپتاستىرۋعا دەگەن ۇمتىلىس بارشا قازاقتىڭ رۋحاني جاڭعىرۋعا دەگەن سەنىمىن ارتتىرىپ، ەرەكشە سەرپىلىس تۋعىزىپ وتىر. ەل بولاشاعىنىڭ وزەگى بولىپ سانالاتىن وسى ءالىپبي ماسەلەسىن شەشەردە ماقسات-مۇددە دە،  باعىت-باعدار دا  بارىنشا ايقىن بولۋى ءتيىس دەپ ەسەپتەيمىن.

كيريلليتسا وتارشىل ساياساتتىڭ باستى قۇرالدارىنىڭ ءبىرى بولعاندىعىن ۋاقىتتىڭ ءوزى الدەقاشان دالەلدەپ قويعان. كەڭەستىك داۋىردە ءتىلى دە، ءدىنى دە، ءدىلى دە، ءتىپتى ءتىنى دە ءبىر تۋىسقان حالىقتاردىڭ ءالىپبيىنىڭ اراسىنا جىك قويىلىپ، ءبىر-ءبىرىنىڭ جازۋىن ءتىپتى تۇسىنبەيتىن جاعدايعا جەتكىزدى. ورتاق تاريحىمىزداعى وسى اقتاڭداقتى ۇمىتپاۋىمىز جانە ونىڭ قايتالانۋىنا ەشقاشان جول بەرمەۋىمىز كەرەك.

ءبىز بۇگىنگى تاڭدا لاتىن ءالىپبيىنىڭ وزىندىك ۇلگىلەرىن قالىپتاستىرعان وزبەك، ازەربايجان باۋىرلارىمىزدىڭ تاجىريبەلەرىمەن، تۇركيا الىپبيىمەن مۇقيات تانىسىپ، وسى ەلدەردىڭ لينگۆيست عالىمدارىنىڭ باسىن بىرىكتىرىپ، بارشا تۇركى تىلدەس حالىقتارىنا ورتاق بولاتىن ءالىپبي ستاندارتىن جاساۋعا ءتيىسپىز.

«ىنتىماق جۇرگەن جەردە، ىرىس بىرگە جۇرەدى» دەيدى حالقىمىز. ءتۇبى ءبىر دىبىستاردى ءبىر ارىپپەن بەلگىلەۋ ارقىلى تۋىسقان حالىقتاردى تۇسىنىستىككە باستاپ، تاريحي-ساياسي، مادەني سارالاۋدا ورتاق مۇددەگە قىزمەت ەتۋگە جول اشا الامىز. مىنە، جاڭا الىپبيگە كوشۋدەگى باستى ماقسات تا، مۇددە دە وسى بولۋى كەرەك. بۇل اسا ۇلكەن قاراجاتتى قاجەت ەتەتىن شارۋا ەمەس، تەك ىنتا مەن ىجداعاتتىلىق، ۋاقىت پەن ءتوزىم كەرەك.

لاتىن الىپبيىنە كوشۋدىڭ باسقا دا ارتىقشىلىقتارى تولىپ جاتىر. قارقىندى دامىپ كەلە جاتقان جاڭا تەحنولوگيالار مەن عالامتور جۇيەسى دە وسى لاتىن الىپبيىنە نەگىزدەلگەن. جەر شارىنىڭ تۇكپىر-تۇكپىرىندەگى قانداستارىمىزدىڭ دا اتامەكەندە بولىپ جاتقان جاعدايلارمەن دەر كەزىندە تانىسىپ، ەل تاعدىرىنا بىرىگە ارالاسىپ، بىتە قايناسۋىنا دا تىكەلەي دانەكەر بولاتىن بىردەن ءبىر قۇرال –  وسى لاتىن ءالىپبيى.

ءتول ءالىپبي ۇلگىسىنە كوشۋ ەلىمىزدەگى باسقا ۇلتتار مەن ۇلىستار اراسىندا باسقاشا جاڭساق پىكىر تۋدىرماۋى ءتيىس، بۇل تەك تاۋەلسىزدىگىمىزدى تۇعىرلاپ، تاريحي ادىلەتتىلىككە اپارار جول دەپ قابىلدانادى دەپ سەنەمىن.

Abai.kz