قر ءسىم قىرعىزستان پرەزيدەنتى المازبەك اتامباەۆتىڭ ايتقان سوزىنە بايلانىستى مالىمدەمە جاسادى، - دەپ حابارلايدى Abai.kz اقپاراتتىق پورتالى.

"قازاقستان رەسپۋبليكاسىنىڭ سىرتقى ىستەر مينيسترلىگى قىرعىز باق-تارىندا تاراتىلعان 2017 جىلعى 7 قازانداعى قىرعىز رەسپۋبليكاسىنىڭ پرەزيدەنتى ا. اتامباەۆتىڭ قازاقستان رەسپۋبليكاسىنىڭ باسشىلىعىنا قاتىستى سوزدەرىنە بايلانىستى قاتاڭ نارازىلىق بىلدىرەدى جانە مۇنداي سوزدەرگە ەكى دوستاس مەملەكەتتەر اراسىنداعى قاتىناستاردا جول بەرىلمەۋى ءتيىس دەپ سانايدى", - دەلىنگەن مالىمدەمەدە.

"قىرعىزستان پرەزيدەنتىنىڭ سايلاۋ الدى ماقساتىنداعى جاۋاپسىز، ارانداتۋشىلىق ءماندى جانە جالعان پىكىرى ەلدەرىمىز اراسىنداعى دوستىق پەن ءوزارا كومەكتىڭ كوپعاسىرلى بايلانىستارىنا نۇقسان كەلتىرە المايتىنىنا سەنىم بىلدىرەمىز. قازاقستان تاراپى قىرعىز حالقىمەن ءداستۇرلى باۋىرلاستىق قاتىناستارىن دامىتۋ جولىنا بەرىك بولىپ قالا بەرەدى", - دەلىنگەن قازاقستاندىق تاراپتىڭ مالىمدەمەسىندە.

ايتا كەتەيىك، بۇگىن بىرقاتار قىرعىز باق-تارىندا پرەزيدەنت المازبەك اتامباەۆتىڭ مەملەكەتتىك سىيلىقتاردى تاپسىرۋ راسىمىندە، قازاقستاننىڭ قىرعىزستاننىڭ ىشكى ساياساتىنا قول سۇعىپ وتىرعانىن جانە وزگە دە ساياسي استارى بار ويلار ايتقانى جازىلعان ەدى.

اتامباەۆ "قازاق بيلىگىنىڭ بىزگە نە ءۇشىن سونداي جاعالاسقىسى كەلەتىنىن تۇسىنەمىن. ولار باكيەۆتى جاقسى كورەدى. باكيەۆتەر قازاقستاندا ءالى كۇنگە دەيىن تايراڭداپ، مەيرامداتىپ ءجۇر. مەن ءتىپتى قازاقستاننىڭ ەڭ ۇلكەن قىزمەتتەرىندە جۇرگەندەردەن: باكيەۆتەر ادامداردى اتىپ، دۇرىس ىستەدى دەگەنىن ەستىدىم. سەبەبى، قازاق حالقىنا جامان ۇلگى كورسەتەمىز. نۇرسۇلتان نازارباەۆ دۇرىس ايتادى: الماتىنىڭ ءجىو-­ى بۇكىل قىرعىزستاندىكىنەن 5 ەسە ۇلكەن، قازاقستان ءجىو-­ى قىرعىز ەكونوميكاسىنان 20 ەسە كوپ. قازاقستاننىڭ ورتاشا جالپى ءونىم تابىسى قىرعىزستاننان 10 ەسە ۇلكەن. ولاي بولسا، قازاقستانداعى زەينەتاقى نەگە 1,5 ەسە عانا ۇلكەن، 10 ەسە ەمەس، تاريفتەر قالايشا 5 ەسە جوعارى؟ سەبەبى، قازاقستان بايلىعىن توناپ جاتىر. ءبىز جامان ۇلگىمىز، اتامباەۆ تا جاقسى ۇلگى ەمەس، – دەدى.

قر پرەزيدەنتى كەز-كەلگەن ەلدىڭ ساياسي تۇلعاسىمەن كەزدەسۋگە قۇقىعى بار. بۇل كەزەكتى ءبىر عانا كەزدەسۋگە بولا  وسىنشاما ءسوز ايتىپ، بۇكىل مەملەكەتتىك قاتىناسقا سىزات تۇسىرگەننەن قىرعىز اعايىن نە ۇقپاق؟

ايىرقالپاقتى اعايىننىڭ ماناس جىرىن قىرعىزعا سىيعا تارتىپ، قاعازعا قاتتاپ كەتكەن شوقاننىڭ ەڭبەگىن ۇمىتقانى ما؟

مۇحتار اۋەزوۆتىڭ تيىم سالىنعالى تۇرعان قىرعىز ەپوسىن قورعاپ قالعانىن ۇمىتقانى ما؟

جىلدا قول جايىپ، قارجى سۇراپ وتىرعانىن ۇمىتقانى ما؟

قازاقستاندا جۇمىس ىستەپ، قاڭعىپ جۇرگەن اعايىندارىن ۇمىتقانى ما؟

دەموكراتيانى جەلەۋ ەتىپ، ءوز بەرەكەسىن ءوزى الىپ جۇرگەندەرىن ۇمىتقانى ما؟

ءبىر رەت شەكارانى جاپقانىمىزدا شىبىن جانى كوزىنە كورىنىپ، تىنىسىنىڭ تارىلىپ قالعانىن ۇمىتقانى ما؟

Abai.kz