ءCۇيىنشى، قازاق ەلى! ءسۇيىنشى، ەلىم دەپ جارعاق قۇلاعى جاستىققا تيمەي 251 قانداستىڭ تاعدىرىنا الاڭداعان Abai.kz پورتالىنىڭ وقىرماندارى!

قىتايدان تاريحي وتانىنا ورالىپ، جامبىل وبلىسى، تاراز قالالىق كوشى-قون پوليتسياسىنان ىقتيارحات العان 250-دەي ەتنيكالىق قازاقتىڭ ماسەلەسى شەشىلدى.

شەكارادان شىعارىپ جىبەرىپ، قىتايدىڭ تەمىر تورىنان «ءدام بۇيىرا ما» دەپ كوز جاسى كول بولعان اعايىننىڭ ماسەلەسى تولىق شەشىلەتىن بولدى.

بۇل جونىندە Abai.kz اقپاراتتىق پورتالىنىڭ تىلشىسىنە جامبىل وبلىستىق ىشكى ىستەر دەپارتامەنتى باسشىسىنىڭ ورىنباسارى ءبايىسوۆ رۋسلان ابدىعاپپارۇلى حابارلادى.

ول كىسى قوعامدا ۇلكەن ءدۇمپۋ تۋعىزىپ، قازاق زيالىلارىن، دەپۋتاتتاردى ءھام ەلدىڭ بەلسەندى ازاماتتارىن الاڭداتقان ماسەلە تۇپكىلىكتى شەشىلىپ، بارىنە ازاماتتىق بەرىلەتىنىن، ول ءۇشىن ەلىمىزدەگى باق بەلسەندىلىك تانىتىپ، ىقتيارحات العانىمەن، قۇزىرەتتى ورگانعا بارۋعا جۇرەكسىنىپ وتىرعان بارلىق ازاماتتارعا ۇگىت جۇرگىزۋ كەرەكتىگىن ايتتى.

ولاردىڭ ارقايسىسى جامبىل وبلىستىق ءىىد-نە بارىپ، وزدەرىنىڭ قۇجاتتارىن وتكىزۋى ءتيىس. ول قۇجاتتار تىكەلەي قر ىشكى ىستەر مينيسترلىگىنە جىبەرىلەدى. مينيسترلىك بارلىق قۇجاتتى جيناپ، ءار قانداستىڭ قازىر تۇرىپ جاتقان اۋدانىنا جونەلتەدى. قانداستار ەندى سابىلماي-اق وزدەرى تۇراتىن ەلدىمەكەننەن ازاماتتىققا قۇجات تاپسىرا الاتىن بولدى.

ءتىپتى، تۇراقتى تىركەۋ ماسەلەسىن دە وڭتايلى شەشۋدىڭ جولى قاراستىرىلىپ جاتقان كورىنەدى.

ەندى قر ءىىم مىنا ماسەلەلەردى ەسكەرۋى كەرەك. قۇجاتتان شاتاق شىققانى سەبەپتى قىتايعا ءوتىپ كەتكەن ازاماتتاردى شەكارادان بەرى وتكىزۋدىڭ جولىن قاراستىرۋى كەرەك. كەدەننەن ولاردىڭ قازاقستانعا قايتا كەلۋىنە ەسكى ىقتيارحاتپەن جۇزەگە اسىرۋعا بىرجولعا مۇمكىندىك بەرۋ كەرەك.

وسى ورايدا ءبىزدىڭ پورتال "250 وتباسىنىڭ تاعدىرىن ويرانداعالى وتىرعان جوقپىز با، ساعىنتاەۆ مىرزا؟!" دەپ ماقالا جازىپ، قوعامعا بەلگىلى ءبىر دارەجەدە قوزعاۋ سالعانىن، بۇل جەڭىس ءبىزدىڭ دە جەڭىس ەكەنىن بورىكىمىزدى اسپانعا اتىپ تۇرىپ ايتقىمىز كەلەدى.

ءبىز بۇگىن قىرىققا جۋىق قانداسىمىزبەن بىرگە تارازدا ءجۇرمىز. ءسۇيىنشى حاباردى ەستىگەن قانداستاردىڭ قۋانىشىن اۋىزبەن ايتىپ جەتكىزۋ مۇمكىن ەمەس.

قازاقستان ارناسىنداعا "مەن – قازاقپىن" جوباسىنا قاتىسۋشى، ءانشى مۇقاتاي بايمۇحاممەد: "مەن نە ازاماتتىعى، نە ىقتيارحاتى جوق، نە قىتايعا تيەسىلى ادام ەمەس بولا تۇرا "مەن – قازاقپىن" جوباسىنا قاتىسۋعا شەشىم قابىلداپ ەدىم. ەندى زاڭدى تۇردە «مەن – قازاقپىن» دەپ ايتۋعا قۇقىق الدىم»، - دەدى قۋانىشىن جاسىرا الماي. بىرلىك قاستەر بولسا: «ايەلىم ەكەۋمىز نەكە كۋالىگىن جاساتا الماعاندىقتان بالام ايەلىمنىڭ تەگىنە جازىلىپ ەدى. ەندى ءوز اكەسىنىڭ اتىمەن اتالاتىن بولدى»، -  دەپ شاتتانا ءتىل قاتتى.

بۇل قۋانىشقا جەتۋدە ""نۇر وتان" پارتياسىنىڭ، سونداي-اق،  قوعام قايراتكەرى، اقىن اۋىت مۇقيبەكتىڭ ەتكەن ەڭبەگى ولشەۋسىز ءسىڭدى. اۋىت سەكىلدى ونداعان ادامنىڭ كۇن-ءتۇن دەمەي ەرىكتى تۇردە جۇمىس ىستەۋىنىڭ ارقاسىندا قانداستارىمىز ەلدە قالاتىن بولدى.

ەمشەكتەگى سابيلەر انانىڭ قۇشاعىنان ايرىلمايتىنى ءۇشىن، وتباسىلاردىڭ ويرانى شىقپايتىندىعى ءۇشىن بار قازاقتى قۇتتىقتاۋعا بولادى.

قۇتتى بولسىن قۋانىش!

قانات بىرلىكۇلى

Abai.kz