مارحۇم بوپ كەتكەن س.دەگەن ءبىر ادەبيەت سىنشىسى انەبىر جىلى جازۋشىلار وداعىنداعى ادەبيەت ماسەلەسىنە ارنالعان ءبىر جيىندا سويلەپ تۇرىپ ءاي-ءشاي جوق باس سالىپ امەريكانى جامانداي جونەلىپتى. ونىسى ءتىپتى ۇزاققا سوزىلىپ كەتكەن كورىنەدى. سوندا زالدا وتىرعان ت. دەگەن جازۋشى «اپىر-اي، مىنا ءبىزدىڭ س. مەن امەريكانىڭ اراسى تىم اشىلىپ كەتتى-اۋ، بۇنىڭ اقىرى نەمەن بىتەر ەكەن؟» - دەگەن ەكەن.

سول ايتقانداي، انەبىر جولى قىرعىزستان پرەزيدەنتى قازاقستاننىڭ كەيبىر ساياسي دا الەۋمەتتىك جاعدايلارىنا قاتىستى كەيبىر كەمشىلىكتەردى اتاپ تۇرىپ ايتىپ ەدى، اشەيىندە توبەسىنەن «پروتون» قۇلاپ، بالا-شاعاسى مۇگەدەك بولىپ تۋىپ جاتقاندا جاعى قارىسىپ قالعانداي ءۇنى شىقپايتىن بىرەۋلەر «وتان ءۇشىن وتقا تۇسەتىن» پاتريوت بولىپ شىعا كەلدى. مەن بىلمەيتىن، بۇرىن اتى-ءجونى بەيماعلۇم، بۇعان دەيىن ەلىمىزدەگى قازاق ءتىلىنىڭ مۇشكىل ءحالى، يەسىز قالعان اۋىلدار مەن اۋىل تۇرعىندارىنىڭ قايىرشىلىق تۇرمىسى، ءۇيسىز-كۇيسىز جەتىم-جەسىرلەر، سوتتاردىڭ ادىلەتسىزدىگى ەلدى جايلاعان جەمقورلىق  پەن قىلمىس ەلىمىزدەگى ۇيرەنشىكتى جاعدايعا اينالعان تاعى باسقا ادام شوشىرلىق جاعداياتتار تۋرالى كوزى اشىق، كوكىرەگى وياۋ قازاق ازاماتتارى جانۇشىرا جازىپ، ايتىپ جاتقاندا اۋزىن بۋعان وگىزدەي ءۇنى ءبىر شىقپاعان ساياساتكەرلەر مەن ساراپشى دەپ اتالاتىندار شىقتى.

بۇلاردىڭ ەشبىرىنىڭ سوزىندە اتامباەۆتىڭ ايتقاندارىن تەرىسكە شىعاراتىن ەڭ بولماسا بىردە-ءبىر دالەل، دەرەك جوق. قۇر بايبالام، وتىرىك وكپەلەۋ. نە ءۇشىن نامىستانىپ جاتقانى دا تۇسىنىكسىز. ال قىرعىزستان باسشىسىنىڭ سوزىندە قازاق حالقىنىڭ نامىسىنا تيەتىن، قازاق پەن قىرعىزدىڭ ورتاسىنا وت جاعاتىن ەشقانداي زيانكەستىك ءسوز جوق ەكەنىن كورىپ وتىرمىز.

ءيا، قازاقستاندا قۇدايعا ءتىل تيگىزگەندەرگە ەشكىم تيىسپەيدى، ال اتى-ءجونى ايگىلى بىرەۋ تۋرالى بىرنارسە ايتساڭ،  ماۋگلي تۋرالى ەرتەكتەگى باندەرلوگا-مايمىلدارشا جابىلا كەتۋگە دايىن تۇراتىندار جەتەدى. قالاي دەسەڭىز ولاي دەڭىز، اتامباەۆتى كۇستانالاپ جاتقاندار جاندايشاپتىق پەن ءپاتريوتيزمنىڭ نە ەكەنىن ايىرا ءبىلۋى كەرەك. ايتپاقشى، بۇلار قازاق جەرى تاعى دا رەسەي زىمىراندارىنىڭ تالقانداۋىنا تۇسكەلى جاتقاندا نەگە ءۇنسىز وتىر ەكەن ؟ ەندى قازاقتارعا «جاساسىن، جاندايشاپيزم!»، «جاساسىن، جاڭا زامان جانتىقتارى مەن جىلماقايلارى!» دەپ ۇرانداۋ عانا قالعان جوق پا ەكەن؟

مىرزان كەنجەباي

Abai.kz