تاراز. 4 جەلتوقسان. قازتاگ – جامبىل وبلىسىنىڭ قورداي جانە كۇيىك اسۋلارى ارقىلى وتەتىن قالاارالىق اۆتوتراسسالارىندا اۆتوكولىك قوزعالىسى قايتا قالپىنا كەلتىرىلدى، دەپ اگەنتتىككە جامبىل وبلىسىنىڭ تجد ءباسپاسوز قىزمەتىنەن حابارلادى.

بۇعان دەيىن تاۋلىك بۇرىن اۋا رايىنىڭ كۇرت ناشارلاۋى سەبەپتى رەسپۋبليكالىق الماتى-تاشكەنت تاس جولىنىڭ قورداي جانە كۇيىك اسۋلارىندا كۇردەلى جاعداي قالىپتاسقان بولاتىن. سول سەبەپتەن وبلىستىق ءىىد جپب، وبلىستىق تجد، وبلىس اكىمدىگىنىڭ اۆتوجولدار جانە جولاۋشىلار كولىگى باسقارماسىنىڭ شەشىمىمەن 3-ءشى جەلتوقساننىڭ 16:20 ساعاتىنان، «ايشا ءبيبى» جول پوليتسياسى بەكەتى باقىلايتىن ۋچاسكەدەن باستاپ، وڭتۇستىك قازاقستان وبلىسى باعىتىنداعى 556-شى شاقىرىمعا دەيىنگى ۋچاسكەدەگى قوزعالىستى كولىكتىڭ بارلىق تۇرىنە شەكتەۋ تۋرالى شەشىم قابىلداندى.

سەنبى كۇنى، 4-ءشى جەلتوقساندا، تۇنگى بىردەن باستاپ اتالعان ۋچاسكەدەگى قوزعالىس قايتا قالپىنا كەلتىرىلدى. وقو باعىتىنان قوزعالىسقا شەكتەۋ بولعان جوق.

ودان وزگە، 3-ءشى جەلتوقساننىڭ 19:45 ساعاتىنان باستاپ قورداي سەلوسىنداعى كولىك قوسىنىنىڭ ۋچاسكەسىنەن باستاپ، قورداي اۋدانىنىڭ «وتار» قوسىنىنا دەيىنگى ۋچاسكەدە سالماعى اۋىر، جۇگى ۇلكەن اۆتوماشينالار مەن بەنزين تاسىمالداعىشتاردىڭ قوزعالىسىنا جول جابىلعان بولاتىن.

بۇگىن ءتۇن ورتاسىندا اتالعان ۋچاسكەدەگى قوزعالىس اشىلدى.

قورداي جانە كۇيىك اسۋلارىندا قوزعالىس مۇشەلەرىنە شۇعىل كومەك كورسەتەتىن وپەراتيۆتىك توپتار جۇمىس اتقارۋدا. اۆتوكولىكتەردىڭ شوعارلانعان جەرلەرىندە ادامداردىڭ جىلىناتىن جانە اس ىشىتەن ورىندارى ۇيىمداستىرىلعان. جول قىزمەتى جولداردى تازارتۋ جانە قۇم سەبۋ جۇمىستارىن جالعاستىرۋدا.