بەيسەنبى, 1 جەلتوقسان 2022
الاشوردا 5774 6 پىكىر 24 قاراشا, 2017 ساعات 00:24

مۇحتار قۇل-مۇحاممەد: الاش يدەياسىنىڭ التىن وزەگى – اباي تاعىلىمى

«نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەد اتىراۋ وبلىسىنا باردى. ساپار بارىسىندا ول ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنە ارنايى بارىپ، وقىتۋشى-پروفەسسورلار قۇرامىمەن جانە ستۋدەنتتەرمەن كەزدەستى.

كەزدەسۋدە پارتيا توراعاسىنىڭ ءبىرىنشى ورىنباسارى بيىل ەلىمىزدە 100 جىلدىعى اتالىپ ءوتىلىپ جاتقان الاش قوزعالىسى، الاشورداشىلار، ولاردىڭ ەلگە سىڭىرگەن ەڭبەكتەرى مەن يگى ىستەرى تۋرالى ايتتى.

– الاش يدەياسىنىڭ التىن وزەگى اباي تاعىلىمى بولدى. ۇلى اقىن شىعارمالارىن تۇڭعىش باستىرۋشى ءاليحان بوكەيحانوۆ، ونىڭ باس اقىندىق تۇلعاسىن بەلگىلەگەن احمەت بايتۇرسىنوۆ، «اباي جولى» عالامات ەپوپەياسىن جازعان مۇحتار اۋەزوۆ سياقتى الاش ارداگەرلەرى بولۋى وسىنىڭ ايقىن دالەلى، – دەدى مۇحتار قۇل-مۇحاممەد.

سونىمەن قاتار پارتيا توراعاسىنىڭ ءبىرىنشى ورىنباسارى ىرگەمىزدىڭ بۇتىندەلىپ، ەڭسەمىزدىڭ كوتەرىلۋىنە الاش قايراتكەرلەرى قولعا العان باستامالاردىڭ اسەرى مولىنان تيگەنىن اتاپ ءوتتى. ودان بولەك، الدى سانكت-پەتەربۋرگتەگى يمپەراتورلىق جوعارى وقۋ ورىندارىندا ءبىلىم العان ءاليحان بوكەيحان، حالەل دوسمۇحامەدوۆ، احمەت بايتۇرسىنۇلى مىرجاقىپ دۋلاتوۆ سياقتى ۇلتتىق ينتەلليگەنتسيا وكىلدەرى ەڭ الدىمەن قازاقتى ۇلت رەتىندە ساقتاپ قالۋ جولىندا ايانباي تەر توگىپ، باتىل ارەكەتتەرگە بارعانى ايتىلدى.

سونىڭ ىشىندە مۇحتار قۇل-مۇحاممەد اتىراۋ ۋنيۆەرسيتەتىنە اتى بەرىلگەن الاش قوزعالىسىنىڭ بەلدى قايراتكەرلەرىنىڭ ءبىرى حالەل دوسمۇحامەدوۆتىڭ ەڭبەگى مەن سوڭىندا قالعان مۇراسىنا ايرىقشا نازار اۋداردى.

Abai.kz

6 پىكىر

ۇزدىك ماتەريالدار