بەيسەنبى, 14 قاراشا 2019
1399 0 پىكىر 4 قاڭتار, 2018 ساعات 02:55

ەو مەن اقش يران بيلىگىن وزبىرلىقتان باس تارتۋعا شاقىردى

ەۋروپالىق وداق يران بيلىگىنەن ءسوز بوستاندىعى مەن حالىق جيىنىن سىيلاۋدى تالاپ ەتىپ، قاقتىعىسىپ جاتقان تاراپتاردى زورلىق-زومبىلىقتان باس تارتۋعا شاقىرادى. بۇل جونىندە ەۋروپالىق وداقتىڭ سىرتقى ساياسات جونىندەگى جوعارعى وكىلى فەدەريكا موگەريني مالىمدەدى.

ۆاشينگتون بولسا يراندا زورلىق-زومبىلىقتىڭ وسۋىنەن بۇۇ قاۋىپسىزدىك كەڭەسىنىڭ جەدەل وتىرىسىن وتكىزۋدى تالاپ ەتەدى. نارازىلىققا شىققان ادامداردىڭ ولىمىنە قاتىستى جەنەۆاداعى ادام قۇقىقتارى جونىندەگى كەڭەس پىكىر ءبىلدىرۋ كەرەك دەپ ەسەپتەيدى بۇۇ جانىنداعى اقش-تىڭ تۇراقتى وكىلى نيككي حەيلي.

سەيسەنبى كۇنى بۇۇ بريفينگىندە سويلەگەن سوزىندە حەيلي يران دەمونسترانتتارىن ەرلىكتەرى ءۇشىن ماقتان ەتەتىنىن ءبىلدىرىپ، نارازىلىق شاراسى حالىقتىڭ ىشىنەن تۋعانىن، ارنايى ۇيىمداستىرىلماعانىن مالىمدەدى. وسىعان دەيىن يراننىڭ جەتەكشىسى ءارى رۋحاني ليدەرى اياتوللا الي حامەنەي ەلدىڭ بيلىگىنە قارسى يراننىڭ جاۋلارى كۇش بىرىكتىردى دەپ مالىمدەگەن بولاتىن.

يراندا 28 جەلتوقساننان بەرى ۇكىمەتكە قارسى جاپپاي نارازىلىق ميتينگىسىندە كەمىندە 20 قاتىسۋشى جانە كەمىندە ءبىر پوليتسيا وكىلى قازا تاپتى. سەنبى كۇنى تەگەراندا 450-دەن استام ادام ۇستالدى. باستاپقىدا نارازىلىق بىلدىرۋشىلەر ازىق-تۇلىك، تاۋاردىڭ قىمباتتاۋىنا نارازىلىق بىلدىرگەن، كەيىن ساياسي تالاپقا اۋىستى. قاتىسۋشىلار قازىرگى رەجيمگە كوڭىلدەرى تولمايتىنىن اشىق ءبىلدىرىپ جاتىر.

يران پرەزيدەنتى حاسان روۋحاني وزبىرلىق كورسەتۋ مەن قوعامدىق مەنشىككە زالال كەلتىرۋدى ايىپتادى. بىراق ۇكىمەتتى ەلدى تارتىپكە كەلتىرۋگە شاقىردى.

Abai.kz

0 پىكىر