استانا. 25 جەلتوقسان. قازتاگ – ۆەناداعى حوفبۋرگ سارايىندا ەقىۇ-نىڭ تۇراقتى كەڭەسىنىڭ بيىلعى اقتىق وتىرىسىندا سالتاناتتى جاعدايدا قازاقستان ەقىۇ-داعى توراعالىق ەستافەتاسىن ليتۆاعا وتكىزدى، دەپ جازادى «كازاحستانسكايا پراۆدا» گازەتى.

ءوزىنىڭ كىرىسپە سوزىندە ەقىۇ-داعى تۇراقتى وكىلى قايرات ءابدراحمانوۆ ۇيىمعا مۇشە مەملەكەتتەرىن 2010-شى جىل بويىنداعى جەمىستى جۇمىسى ءۇشىن العىسىن ايتتى.

قازاقستاننىڭ ەقىۇ-نا توراعالىعى بيىل تاۋەلسىزدىگىنىڭ 19 جىلدىعىن اتاپ وتىرعان جاس مەملەكەتتىڭ ساياسي كەمەلدىلىگىنىڭ بەلگىلى دارەجەدەگى تەستى بولعانى اتاپ ءوتىلدى. وسى سەبەپتى قازاقستان ءوزىنىڭ باستامالارىنا قولداۋ بىلدىرگەن ۇيىمعا مۇشە مەملەكەتتەردىڭ بارلىعىنا وراسان زور العىسىن ءبىلدىردى، دەلىنگەن ماقالادا.

«ءبىزدىڭ بارىمىزگە كونسەنسۋس ءپرينتسيپىن ۇستانۋىمىز جانە ەقىۇ-نى وندا تۇراتىن حالىقتاردىڭ بارلىعى ءۇشىن XXI-ءشى عاسىرداعى دەموكراتيانىڭ، تۇراقتىلىق پەن گۇلدەنۋدىڭ ءبىرتۇتاس كەڭىستىگى رەتىندە قاراستىرۋىمىز قاجەت ەكەندىگى ايدان انىق»، - دەپ ايتقان ق. ءابدراحمانوۆتىڭ ءسوزىن گازەت كەلتىرەدى.

ليتۆانىڭ ەقىۇ-داعى تۇراقتى وكىلى رەناتاس نوركۋس ەستافەتانى قابىلداۋ بارىسىنداعى ءوزىنىڭ سوزىندە: «قازاقستاندىق توراعالىق بىزگە جۇمىستى قالاي اشىق جۇرگىزۋ كەرەكتىگى تۋرالى كوپتەگەن ساباق بەردى. سامميت وتكىزىلدى. كەزدەسۋدە بەكىتىلگەن دەكلاراتسيا كەلەسى جىلى سىندارلى جۇمىس اتقارۋدىڭ پرەسپەكتيۆاسىن اشىپ وتىر»، - دەپ اتاپ كورسەتتى.

بىراق مۇنىمەن قازاقستاننىڭ ەقىۇ باسقارۋىنداعى جۇمىسى توقتاپ قالمايدى، سەبەبى كەلەسى جىلى ءبىز «ۇشتىك» قۇرامىندا جۇمىستى جالعاستىراتىن بولامىز، دەپ جازادى باسىلىم. ليتۆا مەن قازاقستانمەن قاتار ونىڭ جۇمىسىنا يرلانديا دا ارالاسادى. بۇل رەتتە قازاقستان كەلەسى جىل بويىنا ازيالىق سەرىكتەستەرىمەن ىنتىماقتاستىق جونىندەگى ەقىۇ-نىڭ بايلانىس توبىندا توراعالىق ەتەدى. ال 2011-ءشى جىلدىڭ سوڭعى 4 ايىنا قازاقستاننىڭ ەقىۇ-داعى قاۋىپسىزدىك سالاسىنداعى ىنتىماقتاستىق فورۋمىندا – ۇيىمنىڭ اسكەري ماسەلەلەرىمەن اينالىساتىن نەگىزگى جۇمىس ورگانىندا توراعالىق ەتۋ مىندەتى تۇر.