اسقار مىرزاحمەتوۆ جامبىل وبلىسىنا  اكىم بولىپ تاعايىندالدى. بۇل تۋرالى  اقوردانىڭ "تۆيتتەر" جەلىسىندەگى پاراقشاسىندا ءمالىم بولدى.

"مەملەكەت باسشىسىنىڭ جارلىعىمەن اسقار يسابەكۇلى مىرزاحمەتوۆ جامبىل وبلىسىنىڭ اكىمى بولىپ تاعايىندالدى", - دەلىنگەن حابارلامادا.

وسىعان دەيىن جامبىل وبلىسىن كارىم كوكىرەكباەۆ باسقارىپ كەلگەن. اتاپ ايتساق، كارىم ناسبەكۇلى ءوز جۇمىسىن 2013 جىلدىڭ جەلتوقسان ايىنان باستاعان بولاتىن. وبلىس تىزگىنىن تۇپ-تۋرا 4 جىلدان استام ۋاقىت ۇستادى.

ال، وتكەن جىلدىڭ جەلتوقسانىنان بەرى جۇمىسسىز جۇرگەن ەكس-ۆيتسە-پرەمەر اسقار يسابەكۇلى قر پرەمەر-ءمينيسترىنىڭ ورىنباسارى جانە اۋىل شارۋاشىلىعى ءمينيسترى قىزمەتىنەن بوساتىلعالى بەرى ونىڭ جاڭا تاعايىندالۋىنا بايلانىستى ءتۇرلى بولجامدار ايتىلدى.

ايتا كەتەيىك، 2016 جىلدىڭ مامىرىندا اسقار مىرزاحمەتوۆ مەملەكەت باسشىسىنىڭ بۇيرىعىمەن اۋىل شارۋاشىلىعى ءمينيسترى بولىپ تاعايىندالعان بولاتىن.

اسقار مىرزاحمەتوۆ بۇعان دەيىن "نۇر وتان" پارتياسى توراعاسىنىڭ ءبىرىنشى ورىنباسارى قىزمەتىن اتقاردى.

2009-2015 جىلدار ارالىعىندا وڭتۇستىك قازاقستان وبلىسىنىڭ اكىمى بولدى.

2007-2009 جىلدارى "وڭتۇستىك" الەۋمەتتىك-كاسىپكەرلىك كورپوراتسيا" ۇلتتىق كومپانياسى" اكتسيونەرلىك قوعامىنىڭ باسقارما توراعاسى قىزمەتىن اتقاردى.

سونىمەن قاتار، ءار جىلدارى قازاقستاننىڭ وزبەكستانداعى توتەنشە جانە وكىلەتتى ەلشىسى بولدى، 2005-2006 جىلدارى اۋىل شارۋاشىلىعى ءمينيسترى قىزمەتىن اتقاردى.

اسقار يسابەكۇلىن ەڭ سوڭعى قىزمەتىنەن ومىرزاق شوكەەۆ الماستىرعان ەدى.

Abai.kz