ءاندىجان وبلىسىندا وسى جۇمىسقا تارتىلعان كاسىپكەرلەردىڭ ءبىرىنىڭ ايتۋىنشا، ول مەملەكەت باسشىسىنىڭ ساپارىنا دايىندىق جۇمىسىنا 500 دوللار جاراتۋعا تۋرا كەلگەن.

ءسوزىنىڭ شىن ەكەنىنىڭ دالەلى رەتىندە ول وزودليك راديوسىنىڭ رەداكتسياسىنا وبلىستا قۇرىلىسى بىتپەگەن نىسانداردى تەمىرمەن قورشاپ قويعانى بەينەلەنگەن سۋرەتتەر جولداعان.

ايماقتاعى تاعى ءبىر كاسىپكەر وبلىس باسشىلىعى كاسىپكەرلەردى ماجبۇرلەپ جاتقانىن حابارلادى.

"بۇل - حوكيمياتتىڭ تاپسىرماسى. پرەزيدەنت كورتەجى ءجۇرىپ وتەتىن جول بويىن ارلەندىرىپ جاتىر. ءبىزدىڭ فيرما ءىرى بولعاندىقتان، شامامەن 1 مىڭ دوللار جۇمساۋعا تۋرا كەلدى. جەرگىلىكتى بيلىك بىزگە جول جاقتاعى ۇيلەردىڭ شاتىرلارىن قىزىل تۇسكە بوياۋ، قابىرعالارىن سىرلاۋدى تاپسىردى. كاسىپكەرلەردىڭ ەشقايسىسى قارسى شىعا المادى. ولار كاسىبىنە كەسىرى ءتيىپ كەتەدى دەپ قورقادى", - دەدى ول.

دەگەنمەن ءاندىجان وبلىسى حوكيمياتىنىڭ قىزمەتكەرلەرى كاسىپكەرلەردىڭ سوزدەرىن جوققا شىعارىپ وتىر. جەرگىلىكتى بيلىك مەملەكەت باسشىسىن كۇتىپ الۋعا دايىندىققا ولار ءوز ەركىمەن قاتىسىپ جاتىر دەيدى.

Abai.kz