قارا سۋدان دا لاي، قارا تۇننەن دە اي كورۋگە بولادى. كەي ادامدار "قازىر قوعام بۇزىلدى، قازىر جاستار بۇزىلدى، بۇل ۋاقىتتا ادال ادام جوق" دەپ جاتادى عوي... نەگىزى، سولاي كورىنگەنمەن، ءبارى كۇيرەپ كەتكەن جوق. جاماندىقتىڭ جارناماسى جارقىن، جاقسىلاردىڭ ءىسى جارقىراپ كورىنبەي جاتادى عوي. ايتپەسە، كوڭىل قۋانتارلىق وقيعا توڭىرەگىمىزدە تولىپ جاتىر...
وعان تاعى كوزىم جەتتى.

3-4 كۇن بۇرىن، استاناعا ۇشاردا اەروپورتتا ءدام بۇيىرعان تاعامدانۋ ورىندارىنىڭ بىرىندە ءبىر-ەكى كەسە شاي ىشكەن ەدىم. ۇشاققا وتىرعىزۋ باستالىپ، اسىعىستا بەرگەن اقشامنىڭ قايتارىمىن الماي كەتىپپىن. وسىنى بايقاعان سول مەكەمەنىڭ داياشىلارى ينستاگرامداعى ديرەكتىمە حابارلاسىپ، استانادان قايتقاندا الدىمنان شىعىپ، سول قارجىنى قايتارايىن دەپ وتىرعانىن جەتكىزدى...

مەنى قۋانتقانى - قارجىمنىڭ قايتا تابىلعانى ەمەس، قازاقىلىق قايىرىمنىڭ جوعالماعانى. الەۋمەتتىك جەلىنى جاقسىلىققا پايدالانا الاتىن، ءالى دە ءار نارسەگە اللانىڭ اماناتى دەپ قارايتىن ادال ادامداردىڭ بارشىلىق ەكەندىگى كوڭىلىمدى كوتەرىپ، جۇرەگىمدى جىلىتتى. سەندەر امان بولىڭدار جاقسى ادامدار! دۇنيە اق نيەتتى ادال ادامداردىڭ دۇعا، مىناجاتىمەن ءبۇتىن تۇر. اللا ادال پەندەلەردىڭ ابىرويىن ارتتىرا بەرگەي!

مۇحامەدجان تازابەك

Facebook-تەگى پاراقشاسىنان