«تەڭىزشەۆرويل» زاۋىتىنداعى كۇكىرت سۋتەگىن ورتەيتىن الاۋ قوندىرعىلارى. اتىراۋ وبلىسى

اتىراۋ وبلىسى جىلىوي اۋدانىنداعى تەڭىز كەنشىندە بولعان اپاتتان سوڭ جۇمىسشى قايتىس بولدى. «تەڭىزشەۆرويل» كومپانياسىنداعىلار مارقۇمنىڭ اپاتقا دەيىن دەرتكە شالدىققانىن ايتادى. ەكولوگتار بۇعان قورشاعان ورتانىڭ لاستانۋى سەبەپ دەگەن پىكىردە.

ەلەكتر قۋاتىنىڭ ۇزىلۋىنەن تەڭىز زاۋىتى ءۇش رەت جۇمىسىن توقتاتتى

«تەڭىزشەۆرويل» زاۋىتىنداعى كۇكىرت سۋتەگىن ورتەيتىن الاۋ قوندىرعىلارى. اتىراۋ وبلىسى

اتىراۋ وبلىسى جىلىوي اۋدانىنداعى تەڭىز كەنشىندە بولعان اپاتتان سوڭ جۇمىسشى قايتىس بولدى. «تەڭىزشەۆرويل» كومپانياسىنداعىلار مارقۇمنىڭ اپاتقا دەيىن دەرتكە شالدىققانىن ايتادى. ەكولوگتار بۇعان قورشاعان ورتانىڭ لاستانۋى سەبەپ دەگەن پىكىردە.

ەلەكتر قۋاتىنىڭ ۇزىلۋىنەن تەڭىز زاۋىتى ءۇش رەت جۇمىسىن توقتاتتى

ازاتتىق تىلشىسىنە كۋاگەرلەردىڭ بايانداۋىنشا، ماۋسىمنىڭ 6-سى كۇنى تاڭەرتەڭگى 9 ساعات 40 مينۋت شاماسىندا تەڭىز زاۋىتىنداعى نىساندار اپاتتى جاعدايدا ەلەكتر قۋاتىنان اجىراپ قالعان. سونىڭ سالدارىنان 5-ءشى تارماق پەن كەشەندى-تەحنولوگيالىق جەلىدەگى گازوڭدەۋشى جەكەلەگەن قوندىرعىلاردىڭ، سونداي-اق، شيكى گاز ايداۋشى نىسانداردىڭ جۇمىسى توقتاعان.
مامانداردىڭ ايتۋىنشا، ەلەكتر قۋاتىنان اجىراعان مۇنداي جاعدايدا اۆتوماتتى تۇردە زاۋىتتىڭ الاۋىنا اعىلاتىن كۇكىرتتى سۋتەك تولىق جانىپ ۇلگەرمەيتىندىكتەن اتموسفەراعا تارايدى.
كۋاگەرلەردىڭ ايتۋىنشا، قاۋىپسىزدىك ماقساتىندا بۇكىل زاۋىت بويىنشا دابىل قاعىلىپ، زاۋىتتىڭ اۋماعىندا بولعان جۇمىسشىلار قۇرامى جەدەل اكەتىلگەن. قازاقستاننىڭ مۇناي ونەركاسىبى سالاسىنداعى جەتەكشى كاسىپورىننىڭ جۇمىسى، ەلەكتر قۋاتىنىڭ پروبلەماسىنان، وتكەن دەمالىس كۇندەرى ءۇش مارتە توقتاتىلدى دەيدى كۋاگەرلەر.
«تەڭىزشەۆرويل» (تشو) كومپانياسىنىڭ ءباسپاسوز قىزمەتى كەشەندى-تەحنولوگيالىق جەلىدەگى توق اقاۋىنان جۇمىس توقتاپ قالعان كەزدە جۇمىسشىلار مەن قوندىرعىلارعا قاتىستى وسىنداي جاعدايداعى ەرەجەگە ساي شارالار اتقارىلعانىن، كوپ ۇزاماي جۇمىس ىرعاعى قايتا قالپىنا كەلتىرىلىپ، توق ءتۇيىسۋىنىڭ سەبەپتەرى انىقتاپ-زەرتتەلىپ جاتقاندىعىن حابارلادى.
ايتكەنمەن، جەرگىلىكتى ەكولوگتار باسقاشا پىكىر ايتادى. ولار كاسىپورىندى اكىمشىلىك جاۋاپقا تارتپاق نيەتتە. ماۋسىمنىڭ 6-سى مەن 7-ءسى كۇندەرى زاۋىت جۇمىسىنىڭ 3 رەت توقتاۋىنا ەلەكتر قۋاتىنىڭ ءۇزىلۋى سەبەپ بولعان دەدى جايىق-كاسپي ەكولوگيا دەپارتامەنتىنىڭ ينسپەكتسياسىنداعىلار ازاتتىق تىلشىسىنە.
مىسالى، ماۋسىمنىڭ 6-سىندا 9 ساعات 41 مينۋتتا توق كەرنەۋىنىڭ كەمۋىنەن ەكىنشى بۋىن زاۋىتىنداعى جانە كەشەندى-تەحنولوگيالىق جەلىدەگى كتل 1, كتل 2, كتل 3 كومپرەسسورلار توقتاعان. جەكسەنبى كۇنى 15 ساعات 34 مينۋتتا رپ-3.1 پودستانتسياسىنداعى كەرنەۋدىڭ تومەندەۋىنەن كتل 2 جانە كتل 3 كومپرەسسورلارىنداعى قوندىرعىلار تۇرىپ قالعان. سول كۇنى كەشكە، 22 ساعات 24 مينۋتتا رپ-3.2 پودستانتسياسىنىڭ اجىراپ قالۋى سالدارىنان باسقارۋ ءپۋلتى جۇمىس ىستەمەي قالعاندىقتان، وسىنداي ججاعدايعا ارنالعان باعدارلاماعا سايكەس، بەسىنشى تارماقتاعى ۋ-200, 300, 700 قوندىرعىلارىنداعى كلاپاندار اشىلىپ، سودان كەيىن شيكى جانە قىشقىل گاز تەڭىز گازوڭدەۋشى زاۋىتىنىڭ الاۋىنا جانعان.
بارلىق جاعدايدا دا تەحنولوگيالىق پروتسەستەر قالپىنا كەلتىرىلگەن. زارداپ شەككەندەردىڭ جوق ەكەندىگى حابارلانىپ وتىر.
جايىق-كاسپي ەكولوگيا دەپارتامەنتى ينسپەكتسياسىنىڭ باستىعى قۇرالاي شانكيەۆا بارلىق ءۇش جاعدايدا دا تشو كومپانياسى تەحنولوگيالىق پروتسەستىڭ قاي ۋاقىتتان باستاپ توقتاتىلاتىنى تۋرالى حابارلاعانىمەن، ونىڭ قايتادان ىسكە قوسىلعاندىعى تۋرالى حاباردار ەتپەگەن.
– ادەتتە ولار ىسكە قوساتىن ۋاقىتتى ۇنەمى كورسەتىپ وتىراتىن، ال بۇل جولى، نەلىكتەن ەكەنى بەلگىسىز، ولاي جاسامادى. قازىر ءبىز حاتتاما تولتىرۋعا جانە سودان كەيىن تشو كاسىپورنىن اكىمشىلىك جاۋاپقا تارتۋعا قاجەتتى قوسىمشا اقپاراتتار سۇراپ رەسمي ساۋال جولداماقپىز، – دەدى وسى جاعدايعا قاتىستى جۋرناليستەرگە تۇسىنىكتەمە بەرگەن قۇرالاي شانكيەۆا.
«تەڭىزشەۆرويل» (تشو) كومپانياسىنىڭ ۇكىمەتپەن جانە قوعاممەن بايلانىس جونىندەگى بولىمىندەگىلەر ءدال ۋاقىتى مەن كۇنىن ايتپاستان، تەك سەنبى كۇنى ءبىر وقيعا بولعان دەگەن قىسقا جاۋاپپەن شەكتەلدى. جانە اۋاعا گاز تاراعان جوق دەپ مالىمدەپ وتىر.

«تەڭىزدە قاراپايىم جۇمىشىلار كوز جۇمۋدا»

ايتكەنمەن، كۋاگەرلەردىڭ ايتۋنىشا، ماۋسىمنىڭ 6-سى كۇنگى تەڭىزدەگى بولعان اپاتتان سوڭ «تەڭىزشەۆرويل» كومپانياسىنىڭ ءبىر جۇمىسشىسى ءوزىن جايسىز سەزىنگەن. ول تۋرالى ازاتتىق تىلشىسىنە اڭگىمەلەگەن «تەڭىزشەۆرويلدا» جۇمىس ىستەيتىن تاعى ءبىر ادام، الگى جۇمىسشى اسحاناداعى كەشكى اۋقات كەزىندە كەنەتتەن اۋىرىپ، كەلەسى كۇنى قايتىس بولعانىن ايتىپ بەردى.
– ول ەسىنەن تانىپ قالدى، سودان كەيىن ونى قۇلسارىداعى [تەڭىز كەنىشى ورنالاسقان اتىراۋ وبلىسى جىلىوي اۋدانىنىڭ ورتالىعى] اۋداندىق اۋرۋحاناعا الىپ كەتتى، – دەدى ءوز اتى-ءجونىن اتاعىسى كەلمەگەن وقيعا كۋاگەرى.

«تەڭىزشەۆرويل» كومپانياسىنىڭ ءباسپاسوز قىزمەتىندە وزدەرىنە قاراستى «يۋرسس» مەردىگەرلىك كومپانياسىندا 52 جاستاعى ءبىر جۇمىسشىنىڭ قايتىس بولعانىن راستادى، بىراق ونىڭ اتى-ءجونىن ايتپادى. «تەڭىزشەۆرويل» كومپانياسىنىڭ ۇكىمەتپەن جانە قوعاممەن بايلانىس جونىندەگى ءبولىمىنىڭ ۇيلەستىرۋشىسى سۆەتلانا قايىرعاليەۆا جۋرناليستەرگە بەرگەن تۇسىنىكتەمەسىندە، زاۋىتتىڭ جۇمىسى توقتاعان كۇنى اۋاعا گازدىڭ تاراعانى جانە جۇمىسشىنىڭ قايتىس بولۋى – بۇل ەكى وقيعا ءبىر-بىرىمەن مۇلدەم بايلانىستى ەمەس دەدى.
– زاۋىت ماۋسىمنىڭ 6-سى كۇنى توقتادى، ال جۇمىسشى ودان ءبىر كۇن بۇرىن، ماۋسىمنىڭ 5-ىندە تۇسكى اس كەزىندە ءوزىن جايسىز سەزىنگەن. قان قىسىمى كوتەرىلىپ كەتكەن ونى اۋداندىق اۋرۋحاناعا جەتكىزگەن. سوندا ماۋسىمنىڭ 7-سىندە ول ادام قايتىس بولعان، – دەدى سۆەتلانا قايىرعاليەۆا.
بىراق، جۇمىسشىنىڭ قايتىس بولعان ۋاقىتىنا قاتىستى ازاتتىق راديوسى ءتىلشىسىنىڭ قولىنداعى اقپارات «تەڭىزشەۆرويل» كومپانياسىنىڭ رەسمي حابارىنان وزگەشە بولىپ وتىر.
جىلىوي اۋداندىق ورتالىق اۋرۋحاناسى باس دارىگەرىنىڭ ورىنباسارى كلارا تاعامباەۆانىڭ ازاتتىق تىلشىسىنە كورسەتكەن ناۋقاستىڭ دەرتى جونىندەگى دارىگەرلىك قاعازدا، جۇمىسشىنىڭ اۋرۋحاناعا اپات بولعان كۇنى ەس-ءتۇسسىز جەتكىزىلگەنى جازىلعان.
–قان قىسىمىنىڭ كۇرت كوتەرىلۋى سالدارىنان ينسۋلتقا شالدىققان ناۋقاس بىزگە ماۋسىمنىڭ 6-سى كۇنى 23 ساعات 40 مينۋتتا ءتۇستى. كەلەسى كۇنى 14 ساعات 40 مينۋتتا ول قايتىس بولدى. مارقۇمنىڭ دەنەسىن پاتولوگواناتوميالىق زەرتتەۋدەن وتكىزگەن كەزدە ونىڭ قان قىسىمىنىڭ كوتەرىلۋىنەن مي تامىرلارىنىڭ جارىلىپ كەتكەندىگى انىقتالدى، – دەدى كلارا تاعامباەۆا ازاتتىق تىلشىسىنە.
دارىگەرلەردىڭ ايتۋىنشا، مارقۇم بولعان جۇمىسشىنىڭ قان قىسىمى بۇرىننان قۇبىلمالى بولىپتى.
«ول ءوزى تۇراتىن ماحامبەتتەگى اۋرۋحانادا دارىگەرلىك ەسەپتە تۇرعان»، – دەيدى اۋرۋحاناداعىلار.
سونىمەن بىرگە، دارىگەرلەر مارقۇمنىڭ اجالىنا زاۋىت توقتاعان كەزدە اۋاعا تاراعان ۋلى زاتتاردىڭ قاتىسى بولماۋى دا مۇمكىن دەگەن بولجام ايتادى.
دەگەنمەن دە، تەڭىز كەنىشىن يگەرىپ جاتقان «تەڭىزشەۆرويل» كومپانياسى مەن ونىڭ مەردىگەرلىك ۇيىمدارىندا جۇمىس ىستەيتىندەردىڭ كەنەتتەن قايتىس بولعانى جايىندا سۋىت حاباردى جۇرتشىلىقتىڭ ەستىپ كەلە جاتقانىنا بىرنەشە جىلدىڭ ءجۇزى بولدى. ادامدار ادەتتە جۇمىستا، كوبىنەسە ۇيقىدا جاتقاندا نەمەسە ۆاحتالىق جۇمىستان ورالعان سوڭ ۇيىندە قايتىس بولىپ جاتادى. اتىراۋدا ونداي وقيعالاردى «ۆاحتاشىنىڭ اجالى» دەپ تە اتايدى.
مۇنداي دەرەكتەردى جۇرتقا جايۋدى ءجون كورمەيتىن «تەڭىزشەۆرويل» كومپانياسىنىڭ اكىمشىلىگى ولاردى قوعامنان جاسىرىپ قالۋعا تىرسادى. ەكولوگتار الگىندەي وقيعالاردى ايماقتاعى تىم مۇشكىل ەكولوگيالىق جاعدايمەن جانە «تەڭىزشەۆرويل» زاۋىتتارىنان اۋىق-اۋىق اۋاعا بولىنەتىن كۇكىرت سۋتەكتىڭ سالدارىمەن تىكەلەي بايلانىستىرادى.

ازامات مايتانوۆ 10 ماۋسىم 2009 جىل
«ازاتتىق» راديوسى