ىشىمىزدەگىنى ايتقاننىڭ ايىبى جوق، قازاقستان بيلىگىندە قازاق تىلىنە اشىقتان-اشىق قارسى شىعىپ سويلەيتىندەردى كورۋگە كوزىمىز دە، قۇلاعىمىز دا كوندىگىپ كەتتى. ۇكىمەتتەگى دە، پارلامەنتتەگى دە جيىندار ورىس تىلىندە جۇرگىزىلۋىنىڭ ءوزى-اق قازاقتىڭ، قازاقستانداعى 80%-عا جۋىق تۇركىتىلدى ۇلتتاردىڭ نامىسىن كوپە-كورنەۋ اياققا تاپتاۋ دەسەك ەش ايىبى جوق. ۇشتىلدىلىكتى ەنگىزۋ، قازاق ءتىلى مەن ادەبيەتىن ءبىر ءپان رەتىندە قوسىپ وقىتۋ سياقتى ورەسكەلدىكتەر دە جوعارىدا وتىرعان كەيبىر مىقتىلاردىڭ، ءورىستىلدى نەمەسە ءشۇبارتىل ماڭگۇرتتەردىڭ قازاق ۇلتىنا اشىقتان-اشىق جاساپ وتىرعان ماعان نە ىستەي الاسىڭ دەگەن سياقتى قىر كورسەتۋىنىڭ ءبىرسىپىراسى عانا. جاقىندا ەلباسى نۇرەكەڭ بيلىكتەگىلەر جيىن-تەرىندى قازاق تىلىندە وتكىزۋى كەرەك دەگەنگە ازداپ بولسا دا جاقىنداۋ كەلەتىن الدە ۇسىنىس، الدە پىكىر (ايتەۋىر پرەزيدەنتتىك تاپسىرما ەمەس!) ايتقان بولدى دا ارادا كۇن وتىسىمەن جيىندا ءوزى توگىلدىرىپ تۇرىپ ورىسشا سويلەپ شىقتى. ال، ءوز ەلىمىزدەگى ءوز دىنىمىزگە دەگەن كوزقاراستار شە؟ قازىر ءبىر جەردە  جارىلىس نە كىسى ءولىمى سياقتى ۋاقيعا بولا قالسا، سول جەردە الدەبىر ورامال تارتقان قىزداردى، ساقالى بار جىگىتتەردى كورگەندەر تابىلا كەتەتىن بولدى. سوناۋ جىلدارى ۋنيۆەرسيتەتتە اراب ءتىلىن وقىعانىمنىڭ پايداسى ما قايدام 20 شاقتى سۇرەنى وپ-وڭاي جاتتاپ العانمىن. ءوز باسىم ناماز دا وقىعان، ورازا دا تۇتقان ەمەسپىن. بىراق قاسيەتتىلەردىڭ قاسيەتتىسى، كيەلىلەردىڭ كيەلىسى يسلام ءدىنىن، سالت-ءداستۇرىن ۇستانعان ايەل-ەركەك، ۇل-قىز تۋرالى، يسلام ءدىنى تۋرالى عايبات ءسوز ايتىپ جۇرگەن قاراپايىم ازاماتتاردى تەرروريزمگە قارسى دەگەن ارامزالىق ساياساتپەن يسلام ەلدەرىندە مۇسىلمانداردى قىرعىنعا ءتۇسىرىپ جاتقان ۇلكەن-ۇلكەن دەرجاۆالاردىڭ ايتاعىنا ەرىپ جۇرگەن يتارشى ساياساتكەرلەردى جانىم جەك كورەدى. ءيا، يسلامعا دۇشپان ەلدەردىڭ بۇل ساياساتىنىڭ سالقىنى قازاقستاندا جالعاسۋدا ەكەنىن جاسىرام دەگەندەر دە جاسىرا المايدى. ايتپەسە، كىمنىڭ ورامال تارتقانىندا، كىمنىڭ قانداي ساقال قويعانىندا نەمىز بار؟ وسىدان ءبىراز بۇرىن ءدىن جانە ازاماتتىق قوعام جونىندەگى مينيسترلىك باسشىسى نۇرلان ەرمەكباەۆتىڭ «كەرەك بولسا زاڭدا ساقالدىڭ ۇزىندىعى قانداي بولۋى كەرەكتىگى دە كورسەتىلەتىن بولادى» دەگەن وكتەمدىك ىزعارى سەزىلىپ تۇرعان ءسوزىن وقىعاندا شىنىمەن-اق بۇگىنگى قازاقستانعا ەڭ قاۋىپتى جاۋ ورامال تارتقاندار مەن شولاق شالبار كيگەندەر ەكەن دەۋگە ابدەن بولاتىن سياقتى.

سوناۋ 1930 جىلدارى كەڭەستىڭ حاۋىپسىزدىك ورىندارى دۇشپاندى سىرتتان گورى ىشتەن كوبىرەك ىزدەپ، الۋان ءتۇرلى  ارامزالىق ادىسپەن مىڭداعان بەيكۇنا جانداردى «حالىق جاۋى» اتاندىرىپ يتجەككەنگە ايداتىپ، ودان قالعانىن اتىپ-اسىپ قىناداي قىرعانىن ءالى ەشكىم ۇمىتا قويعان جوق. جاقىندا «دات» گازەتىنەن ءوزىن قاۋىپسىزدىك ورگاندارى قىزمەتىنىڭ ارداگەرى دەپ تانىستىرعان ن. بوكەيحانوۆ دەگەننىڭ «چتو پروپوۆەدۋەت حيدجاب؟» («حيدجاب نەنى ۋاعىزدايدى؟») دەگەن ماقالاسىن (دات 1.02.2018) وقىعاندا اتام قازاقتىڭ «كون قاتسا قالىبىنا بارادى»، «اۋرۋ قالسا دا ادەت قالمايدى» دەگەن اۋليەلىك ماقالدارى مەن قازاقتى قىرىپ-جويۋدىڭ جاڭا ءبىر ادىسىنە اينالعان سول 30-شى جىلدار ەسىمە تۇسە كەتتى. ول كەزدە جازاعا تارتىلعانداردىڭ ماڭدايىنا «حالىق جاۋى» دەگەن قارا تاڭبا باسىلدى. ال مىنا ن. بوكەيحانوۆ مىرزانىڭ حاۋىپسىزدىك ورگاندارىنداعى  بۇگىنگى ءىزباسارلارى جوق «حالىق جاۋىن» قايدان تابادى، الدە ولاردى بۇل قيىندىقتان «حيدجاب» كيگەن قىز-كەلىنشەكتەر «قۇتقارادى» ما؟ حيدجاب ءوز الدىنا، وعان ءسال كەيىنىرەك. ال ورامال حيدجاب ەمەس قوي، ورامال تارتقان قىزداردى مەكتەپكە، قوعامدىق ورىندارعا كىرگىزبەۋ تۋرالى زاڭ بار ما؟ الدە بۇل قازاقتى ەڭسەسىن كوتەرتپەي، ۇدايى تۇقىرتىپ وتىرۋدىڭ، قازاقتى دىنىنەن، سالت-داستۇرىنەن ايىرىپ جاھاندانعان، ەۋروپالانعان ماڭگۇرت ۇلتقا اينالدىرۋدىڭ جاسىرىن ءبىر قۇپيا ءادىسى مە؟ ول جاعى بەيمالىم. قازاق سىنىقتان باسقا اۋرۋدىڭ ءبارى جۇعادى دەيتىن ەدى، الدە بۇل سول 30-شى جىلدارى تالاي بايعۇستى «حالىق جاۋى» دەپ ۇستاپ بەرگەندەردەن ولاردىڭ بالالارىنا نەمەسە نەمەرەلەرىنە قان ارقىلى جۇققان كەسەلى مە كىم ءبىلسىن؟ ايتپەسە، اقتوبەدە ورامال تارتقانى ءۇشىن مەكتەپكە كىرگىزىلمەي قويعان قازاق قىزدارىنا حريستيان ءدىنىنىڭ «ماسلەنيتساسىن» تويلاتىپ قويۋ قازاق حالقىنىڭ سالت-داستۇرىنە قاسيەتتى يسلام دىنىنە قارسى اشىقتان-اشىق دۇشپاندىق تاربيە ەمەس پە؟! (بۇل «جاڭالىقتى» 20.02.2018 كۇنى تەلەارنادان كورسەتتى. سوندا سويلەپ تۇرعان بىرەۋلەر «ماسلەنيتسا» – مەيرام، ونى تويلاۋ اركىمنىڭ ءوز ەركى دەدى. ەندەشە، ورامال تارتۋ اركىمنىڭ ءوز حۇقى بولماۋى قالاي؟ وسى ماسەلەگە وراي اقتوبەدەگى ءبىلىم باسقارماسىنىڭ باستىعىنا حابارلاسقانىمىزدا (ل. ورازباەۆا) ول «ماسلەنيتسانىڭ ورامالعا قاتىسى جوق» دەپ ءۋاج ايتتى.

ەندى ن. بوكەيحانوۆتىڭ حيدجاب تۋرالى «تولعانىسىنا» قۇلاق ءتۇرىڭىز. ول اۋەلى حيدجاب كيەتىندەر كىمدەر ءوزى، سۋنيتتەر مە، شيتتەر مە دەپ ءسال عانا ويلانادى دا ءارى قاراي باس قاتىرماي «ءسىرا، حيدجاب كيۋگە بىرقاتار (ۋ ريادا جەنششين) ايەلدەردىڭ دەنەسىنىڭ فورماسى جەتىلمەۋى («نەسوۆەرشەنستۆا فورما يح  تەلا») سەبەپشى بولعان بولۋى كەرەك» دەگەن توقتامعا كەلەدى. سويتەدى دە كەنەت قازىر حيدجاب كيۋشىلەر كوبەيىپ بارادى، بۇل ءوزى ەلىمىزدىڭ قاۋىپسىزدىگىنە قاتەر تۋدىرماي ما، مىنە، وسىنى ءتيىستى ورگاندار مۇقيات قاراۋى كەرەك دەي كەلىپ، ءوزىنىڭ ساقال قويعان، شالبارىنىڭ بالاعىن شورت كەسكەن ەركەكتەرگە كۇدىكپەن قارايتىنىن دا ەسكەرتىپ قويادى. نەتكەن ساقتىق دەسەڭىزشى؟! ەگەر قاۋىپسىزدىك سالاسىنىڭ وسى ءبىر قىرانكوز قىراعى اقساقالى بۇگىندە  جاستارىمىزدى ناعىز جابايىلىققا، حايۋاندىق ازعىندىققا باعىتتاپ جاتقان ءتۇرلى تۇنگى كلۋبتاردان، گەي-كلۋبتاردان قورقامىن، ەل بولاشاعى دەپ جۇرگەن جاستارىمىز سولاردىڭ جەتەگىندە كەتىپ ۇلتسىز، وتانسىز ماڭگۇرتتەرگە اينالىپ بارادى، بۇيتە بەرسەك مەملەكەتىمىز قۇردىمعا كەتەدى دەپ قايعىرسا وعان قوسىلا قايعىرار ەدىك. ەگەر وسىنداي بىرنەشە اقساقال اۋەلى  ورامال تارتقان قىزدارعا ەمەس، كوشەدە كەۋدەسىندە ءدىر-ءدىر قاققان قوس انارى مەن كىندىگىن قوسا اشىپ تاستاپ، مايقۇيرىعىن جارقىراتىپ كورسەتىپ، ءابۇيىرىن جابار-جاپپاس ميني-شورتى كيگەن، اۋزىندا تەمەكى، قولىندا سىرا شيشاسى بار، بوعاۋىز ءسوزدى اعىل-تەگىل اقتارىپ باراتقان قازاق قىزدارىنا تىيىم سالايىق، قاتىن-قالاشتارىمىز ەرلەرىن بەتتەن الىپ، توسكە شابۋىن توقتاتۋىمىز كەرەك دەسە شىنىمەن-اق ىرگەلى  ەل بولۋدى باستاعان ەكەنبىز دەر ەدىك. «رۋحاني جاڭعىرۋ» دەپ شۋىلداۋدى وسىدان باستاساق قازاق ۇلتىنىڭ ەرتەڭىنە ەلجىرەي قاراپ، ۇلكەن ءبىر ءۇرزادا سەزىمگە بولەنەر ەدىك. بىراق، جەردەگى «قۇدايلار» قازاقتىڭ ماڭدايىنا ونداي باقىتتى قيماي وتىر عوي، قيماي وتىر عوي! ايتپەسە، ورامال تارتقان قىزى مەن ساقال قويعان جىگىتتەرىنەن قورقاتىن ەل باسقا جاقتان جاۋ تيسە كۇنى نە بولماق؟ مىنا تۇرعان، ءۇي ىرگەسىندەگى رەسەيدىڭ ەڭ  زيالى قاۋىم وكىلدەرىنىڭ ءوزى قازاقستان دەگەنىڭ رەسەيدىڭ جەرى، قازاقستاندى ءبىر-اق اپتادا باسىپ الامىز، نازارباەۆ كەتكەسىن كوپ ۇزاماي قازاقستاندا «بولشايا سۋماتوحا» باستالۋىن كۇتۋ كەرەك دەپ وتىرعاندا اتانداي اقىرىپ شىعۋدىڭ ورنىنا اقساقالدارىڭنىڭ قاۋپى وسىنداي بولسا ويلاناتىن،قۇلدىق سانادان وياناتىن كەزىڭ كەلدى-اۋ، ەسى بار قازاق دەپ ايعاي سالعىڭ كەلەدى ەكەن.

وسى ن. بوكەيحانوۆ اقساقالدىڭ وتان تۋرالى  الگىندەي «ۋايىمىن»  وقىپ بولعاسىن اكەم بايعۇس تا، ونىڭ قۇرداستارى دا ەلىنىڭ تاۋەلسىزدىك العانىن كورمەي ءولىپ قالعانى  دۇرىس بولعان شىعار دەگەن ويعا كەتتىم. نەگە دەيسىز بە؟ 1941-1945 جىلدارى  اتا-باباسى وتانىم دەمەك تۇگىل تۇسىندە كورمەگەن ورىستىڭ ورمانى مەن باتپاعىن كەشىپ كىم ءۇشىن سوعىسىپ قان توككەنىن بىلمەي ەلگە كەۋدەسىن سۇيرەپ ازەر ورالعان سول اكەم بايعۇس تاونىڭ قاتارلارى دا شەتىنەن ساقال قويىپ، بالاعى توبىقتان جوعارى ءبوز دامبال مەن كەلتەبالاق شيبارقىت شالبارىن تاستامايتىن ەدى. سولاردى سو زاماندا ەشكىم ءۆاححابيسسىڭ، تەرروريسسىڭ، راديكالسىڭ دەگەن جوق ەدى. انامىز دا، تۋىپ-وسكەن ءۇيىنىڭ وڭ جاعىندا وتىرعان، كۇيەۋگە تيمەگەن اپالارىمىز دا ورامالىن باسىنان تاستامايتىن. حاۋىپسىزدىكتىڭ قىرانكوز قارتى وسى ن. بوكەيحانوۆ الدە وڭشەڭ ءبىر ورامال تارتقان قاتىن-قالاش پەن شولاق شالبار كيگەندەر رەسەيدىڭ سۋ-25 ۇشاقتارىنا ءمىنىپ الىپ سيريانى بومبالاپ جاتىر دەپ ويلاي ما، الدە ورامال تارتقان قازاق قىزدارى دونەتسك مەن لۋگانسكىگە بارىپ ۋكراينانى بولشەكتەپ ءجۇر دەپ ويلاي ما قايدام، ايتەۋىر، ءوز ءسوزىن حيدجاب پەن شولاق شالبار تۋرالى ايتا كەلىپ، «مەن ەلىمىزدە سيريا مەن ۋكرايناداعىداي جازىقسىز ادامداردىڭ قانى توگىلىپ، ءبىرىن-ءبىرى ولتىرگەنىن قالامايمىن»،-دەگەن بەيبىتشىلىك سۇيگىش لەبىزبەن اياقتايدى. وتە دۇرىس! بىراق ءار نارسەنىڭ ايتىلار ورنى بار ەمەس پە؟

ءوز باسىم بۇل جەردە قازاق قىز-كەلىنشەكتەرى جاپپاي حيدجاب كيسىن دەگەلى وتىرعام جوق. ويتكەنى، حيدجاب – ءبىر ۇلتتىڭ ۇلتتىق كيىمى. ال ءبىر ۇلتتىڭ كيىم ۇلگىسى دۇرىس نە بۇرىس دەۋگە ەشكىمنىڭ حاقى جوق. بۇل جەردە ماسەلە حيدجاب كيۋ مەن ورامال تارتۋدىڭ اراسى جەر مەن كوكتەي ەكەندىگىندە. ورامال الەم ايەلدەرىنىڭ باس كيىمى دەرلىك بۇيىم. حريستيانداردىڭ ىنجىلىندە  ايەلدىڭ جالاڭباس ءجۇرۋى قۇدايعا قارسىلىعىنىڭ بەلگىسى دەپ بىلىنەدى. كەشەگى كەڭەس زامانىندا دا مىنا تۇرعان وزبەكستاننىڭ تاشگۋ، سازگۋ، سياقتى ىرگەلى ۋنيۆەرسيتەتتەرىندە وقيتىن وزبەك قىزدارى اۋديتوريادا ورامالىن شەشپەي وتىراتىن. وزبەكستان وبكومدارىنىڭ، رايكومدارىنىڭ سەزگە دەلەگات بولىپ كەلگەندەرىنىڭ ءوزى كرەملدىڭ سەزدەر سارايىندا برەجنەۆ، گرومىكولاردىڭ قارسى الدىندا باسىنان الا تاقياسىن تاستامايتىن. سول ءداستۇر ولاردا ءالى دە ساقتالعان. چەچەنستان پرەزيدەنتى رامزان قادىروۆتىڭ قابىلداۋىنا بارعان چەچەن ايەل جىنىستىلارى دا، ودان سۇحبات الۋعا بارعان ورىس جۋرناليست قىزدارى دا باسىنا ورامال تارتىپ، ەتەگى توبىقتان تومەن ۇزىن كويلەك كيىپ باراتىنىن كورىپ ءجۇرمىز. ەندەشە بىزدىكى نە، بىزدىكى كىممەن كۇرەس؟ ءاربىر تاۋەلسىز ەل ەڭ الدىمەن تاريحي جەرگىلىكتى ۇلتىنىڭ ءدىنىن، ءتىلىن، ۇردىستەرىن ساقتايدى. ەندەشە ءبىز بۇگىندە جارتىلاي جالاڭاش، كەۋدەدەگى قوس انارى مەن بوكسەسىن اشىپ تاستاپ، تەمەكىسىن بۇرقىراتىپ، سىرا شولمەگىن اۋزىنان قىلعىتىپ،  اۋزىنان اق يت كىرىپ، كوك يت شىعىپ جۇرەتىن قىزدارىمىز بەن جاسى قىرىقتىڭ قىرقاسىنا شىققان قاتىن-قالاشتارىمىزعا قارسى كۇرەس اشساق ۇلتتىعىمىز دا، تاۋەلسىزدىگىمىز دە نىعايا تۇسەر ەدى عوي. ويتكەنى، قاشاندا تىلىنەن، دىنىنەن، دىلىنەن، ۇلتتىق بەت-بەينەسىنەن ايرىلىپ قۇرىپ بىتەتىن ەلدىڭ ەڭ اۋەلى ايەل جىنىستىلارى بۇزىلاتىنىن وقىپ تا، كورىپ تە ءجۇرمىز عوي. ءوزى باسىپ الاتىن ەلدىڭ ەڭ اۋەلى ايەل جىنىستىسىن قۇتىرتىپ، تەڭ پراۆولىلىق، گەندەرلىك ساياسات، فەمينيزم، ايەل قۇقىعى دەگەن سياقتى سايقالي ساياسات جۇرگىزۋ ارقىلى ايەلىن ەرىنە قارسى قويۋ ۇلكەن-ۇلكەن دەرجاۆالاردىڭ باستى ءادىسى ەكەنىن ەركەكتەرىمىز دە، ايەلدەرىمىز دە ەستەن ەش شىعارماۋى كەرەك. بۇگىنگى قازاقستاننىڭ ءورىستىلدى نەمەسە ءشۇبارتىل باسشىلارى اۋزىن اشسا ەۋروپادا ويتەدى دە بۇيتەدى دەگەن لاقپا سوزدەردى مادەنيەتتىلىك  دەپ ويلايدى. ال باتىستاعىلار ەكى ەركەكتىڭ ءبىر-بىرىنە ۇيلەنۋى، مۋلتيميلليونەر قاتىن ساندەس بەرناردەس سياقتى ءوز ۇلىنىڭ استىنا جاتىپ، ءوز ۇلىنا كۇيەۋگە ءتيۋى، ايەل مەن ايەلدىڭ، ەركەك پەن ەركەكتىڭ جىنىستىق قاتىناس جاساۋى، قاتىنىنىڭ بۇگىن باسقا ءبىر ەركەكپەن جاتۋعا باراتىنىن ەرىنە ەسكەرتىپ قويۋى سياقتى «تەڭ پراۆولى حايۋاندىقتار» جاعىنان عانا الدا كەلەدى. قازىر الماتىدا  بىرنەشە جەردە گەي-كلۋبتار ەمىن-ەركىن جۇمىس ىستەپ جاتقانىنا، تۇنگى  كلۋبتاردان شىققاننان كەيىن قىز-كەلىنشەكتەرىمىزدىڭ ىستەپ جۇرگەن ىستەرىنە، كۇيەۋىنىڭ كوزىنە ءشوپ سالعانىمەن تۇرماي ونى بىرنەشە جىلعا سوتتاتىپ جىبەرگەن قاتىن تەلەارنالاردان قىزدارىمىزعا «اقىل» ايتىپ، كىتاپ جازۋىنا جاعداي جاساپ، گەندەرلىك ساياساتپەن فەمينيزمدى ءورشىتىپ قويعانىنا قاراپ كوپ  ۇزاماي قازەكەمدەر دە الگىندەي «تەڭ پراۆولى حايۋاندىق مادەنيەتكە» قول جەتكىزىپ، قازاقستاندى الەمگە تانىتارى حاق. ءبىز بۇرىن جەرىمىز، بايلىعىمىز الەم جۇرتشىلىعىنىڭ بارىنە ورتاق، اقشاڭدى سال دا (ينۆەستيتسياڭدى) الا بەر دەيتىن ەدىك. قازىر قىزدارى شەتەلدىككە كۇيەۋگە ءتيىپ، يتاليادا، كانادادا، چەحيادا ت.ب. تۇرىپ جاتقانىنا ينتەرناتسيونال وتباسىن قۇردى دەپ ماقتاناتىن قازاق بۇيتە بەرسە  ەندى قازاق قىز-كەلىنشەكتەرى  ءۇش تىلدە سويلەيدى، ولار ەشقانداي ۇلتقا جاتپايدى،  قىزدارىمىز بارىڭە ورتاق، كەلىڭدەر، الىڭدار!» دەپ جارياعا جار سالۋى دا ابدەن مۇمكىن.

مەيلى، حيدجابقا تىيىم سالسا سالسىن (ول دا زاڭسىزدىق!) ال ورامال تارتقان قىزدارعا مەملەكەتتىك شابۋىل جاسايتىنداي نە كۇن تۋدى ءبىزدىڭ بيلىككە؟ اقتوبە وبلىسىندا مەكتەپكە باراتىن وقۋشى قىزداردى مەكتەپكە كىرگىزبەۋگە قانداي سەبەپ بار. وسى وبلىستىڭ الاقانداي تەمىر اۋدانىنداعى شاپ-شاعىن كەڭقياق مەكەنىنە ورامال تارتقان قىزداردان قاۋىپ ءتونۋى مۇمكىن  دەگەندى اقىل-ەسى دۇرىس ادام ايتا ما؟ ال ءدىن جانە ازاماتتىق قوعام جونىندەگى مينيسترلىك باسشىسى نۇرلان ەرمەكباەۆتىڭ «كەرەك بولسا زاڭدا ساقالدىڭ ۇزىندىعى قانداي بولۋى كەرەكتىگى دە كورسەتىلەتىن بولادى...» دەگەنىن وقىعاندا شىنىمەن-اق بۇگىنگى قازاقستانعا ەڭ قاۋىپتى جاۋ ورامال تارتقاندار مەن شولاق شالبار كيگەندەر ەكەن دەمەسكە لاج قالمايدى. باسقا ايتار ءسوز قالماعاسىن قولدان كەلگەنى ورىستىڭ باس اقىنى دەرلىك ارابتەكتەس پۋشكيننىڭ ورامالعا قاتىستى  مىنا ولەڭىن قازاقشاعا ءتارجىمالاۋدى ءجون كوردىك.

وۋ، پاك جارلارى پايعامباردىڭ

ماحابباتتىڭ اسقاقتاتقان شىنارىن،

ءدال سەندەردەي پاكيزات جوق ەش ەلدە

زاتى تۇگىل اتىن بىلمەس كۇنانىڭ.

بەيبىت شاڭىراق، بەلگىسىندەي بولا الار

سەندەر تارتقان سوناۋ ءساندى ورامال!

ادالدىقتى ماڭگى وسىلاي ساقتاڭدار!

جاسىرىڭدار جۇزدەرىڭدى، كورمەسىن

سۇلۋلىقتى سۇم كوزىمەن اتقاندار!

و، جەنى چيستىە، پروروكا

وت ۆسەح جەن ۆى وتليچەنى:

 ستراشنا دليا ۆاس ي تەن پوروكا

پود سلادكوي تەنيۋ تيشينى

جيۆيتە سكرومنو: ۆام پريستالو

بەزبرانوي دەۆى پوكرىۆالو

حرانيتە ۆەرنىە سەردتسا

دليا نەە زاكوننىح ي ستىدليۆىح

دا ۆزور لۋكاۆىي نەچەستيۆىح

نە ۋزريت ۆاشەگو ليتسا...

مىرزان كەنجەباي

Abai.kz