بۇگىن رەداكتسيامىزعا اسان نۇربولات اتتى ازامات حابارلاسىپ، جەڭگەسىن شەكارالىق پوليتسيا قىزمەتكەرلەرى الىپ كەتكەنىن حابارلادى. اسان بۇگىن رەداكتسيامىزعا ىزدەپ كەلدى. ءبىز اساننىڭ سوزىنە قۇلاق تۇردىك. بولعان جايدى ءوزى بايانداپ بەردى، بىزگە.

اسان نۇربولات، قر ازاماتى:

-مەن اسان نۇربولات، قازاقستان رەسپۋبليكاسىنىڭ ازاماتىمىن. الماتى وبلىسى، تالعار اۋدانى، كەڭدالا اۋىلى، داچنايا كوشەسى، 63-ۇيدە تۇرامىن.

سىزدەرگە حابارلاسقان سەبەبىم، اكەمنىڭ اعاسىنىڭ بالاسى، مەنىڭ اعامنىڭ كەلىنشەگى، ياعني جەڭگەمدى شەكاراشىلار ۇيدەن الىپ كەتتى.

اعامنىڭ اتى - ءۋالي ءسلام. ەڭبەكشىقازاق اۋدانى، بايدىبەك بي اۋىلى، ۆينوگرادنىي كوشەسىندە تۇرادى. ءوزى قازاقستان رەسپۋبليكاسىنىڭ ازاماتى. ازاماتتىق العانىنا 2 جىل بولعان. ءبىر قىز، ءبىر ۇلى بار. ولار دا قازاقستان ازاماتى. قىزى 6-سىنىپتا وقيدى، ۇلى 1-سىنىپتا وقيدى.

22-مامىر كۇنى بەلگىسىز ەكى ادام بايدىبەك بي اۋىلىنداعى اعامنىڭ ۇيىنە كەلىپ، كۋالىگىن كورسەتىپ، اعا-جەڭگەممەن سويلەسىپتى.

ولاردىڭ اسكەري پوليتسيا دەگەن كۋالىگى بار ەكەن. بىرەۋىنىڭ اسكەري شەنى - مايور كورىنەدى. وندا دا بىرەۋى عانا كورسەتكەن. بىرەۋىنىڭ اتى باۋىرجان ەكەن. مەن سول مەزەتتە ول جەردە بولعان جوقپىن. اعامنىڭ ايتۋى بويىنشا عانا بىلەمىن.

سول ەكەۋى جەڭگەم سايراگۇلدى قورعاسقا الىپ كەتكەن. سودان ءبىز كەشە تۋىسقاندار جينالىپ، ارتىنان باردىق. سويتسەك، بىزدەن دە سۇرادى، جاعدايدىڭ بارلىعىن. «بۇل كىسى زاڭسىز كەپتى. سونى بىلەسىڭدەر مە» دەپ سۇرادى. ءبىز بىلمەيتىنىمىزدى ايتتىق. سودان، قىتاي جاعى ارنايى سۇراۋ سالىپتى، دەيدى. «ول كىسى قىتايدا ۇيىمنىڭ ادامى ەكەن» دەيدى.

نە ۇيىم ەكەنىن ناقتىلاپ ايتقان جوق. ايتەۋىر، قىتاي جاعى سۇراتىپ جاتىر ەكەن.

ول كىسى قىتايدا مەكتەپتە مۇعالىم، سوسىن ديرەكتور بولعان. مىنە، قازاقستانعا كەلگەنىنە 1 ايدان از عانا استى. جەڭگەم قىتايدىڭ ازاماتى. وتاسقاندارىنا 15 جىلداي بولدى-اۋ.  اعام بالا-شاعاسىمەن بەرى وتكەندە، جەڭگەم قىتايدا قالىپ قالعان. پاسپورتىن الىپ العان.

جەڭگەم باستاۋىش مەكتەپتە ديرەكتور بولعان. سوسىن اناۋ قىتايدىڭ ساياسي وقىتۋ لاگەرلەرىنىڭ ۇستىنەن قارايتىن ادام بولعان با، ول جاعى ماعان ءجىتى تۇسىنىكتى ەمەس. ايتەۋىر، قىتايدا قىزمەتتە بولعان. كومپارتيانىڭ مۇشەسى.

جەڭگەمدى ءالى قىتايعا شىعارعان جوق. ول قازىر قورعاستا جاتىر. بىراق، قىتاي تاراپىنان سۇراۋ سالۋىنا بايلانىستى، شىعارىپ جىبەرەتىن ءتۇرى بار.  بىزگە كەشە ايتۋىنا قاراعاندا، ادۆوكات تابىڭدار دەپ جاتىر. ءبىز ەندى نە ىستەسەك بولادى؟

PS. Abai.kz اقپاراتتىق پورتالى ەركىن اقپارات الاڭى. مۇندا وي جارىستىرىپ، پىكىر الماسۋعا ءاربىر وقىرمان قۇقىلى. سوڭعى كەزدەرى قىتايداعى ىشكى ساياسي سۇرگىننىڭ سالقىنى قازاقستان ازاماتتىعىن العان وتباسىلارعا دا ءتيىپ جاتقانىن جازىپ ءجۇرمىز. اسىرەسە، ءبىر وتباسى مۇشەلەرىنىڭ ەكىگە ايىرىلۋى پراكتيكامىزدا ءجيى كەزدەسىپ ءجۇر. ونىڭ باستى سەبەبى - وتباسىنىڭ كەي مۇشەلەرى قازاقستان ازاماتتىعىن الماعان نەمەسە الىپ ۇلگەرمەگەن. بۇگىن رەداكتسيامىزعا ىزدەپ كەلگەن اساننىڭ اعاسىنىڭ دا باسىنا تۇسكەن جاعداي وسى اۋاندا.

اساننىڭ جالعىز سۇرايتىنى - جەڭگەسىن قىتايعا جىبەرمەي، ەلدە الىپ قالۋ. «جەڭگەمدى قىلمىسكەر دەۋ اقىلعا سىيىمسىز. ماقۇل، زاڭسىز ءوتتى دەلىك، سوندا شەكارادان وتەردە شەكاراشىلار نە قاراپ وتىرعان؟ جەڭگەم، قىتايدا كومپارتيانىڭ مۇشەسى بولعاندىقتان، قىتاي سۇراۋ سالىپتى. سوندا ءبىزدىڭ شەكارالىق پوليتسيا قىتاي سۇراعان قازاقتىڭ بارلىعىن ۇستاپ بەرە بەرە مە؟»، - دەيدى اسان نۇربولات.

Abai.kz