بۇل ءوزى شىندىعىندا دا جۇرت سۇيسىنەتىندەي جاقسى حابار ەدى. قوستانايداعى توعىز قابات ءۇيدىڭ قابىرعاسىندا حاكىم ابايدىڭ بەينەسى الىستان كوزگە شالىنىپ، «مەن مۇندالال» تۇر. ۇلى اقىندى كەسكىندەگەن «تيگروحاۋد-كريۋ» بىرلەستىگى كوشە سۋرەتشىلەرىنىڭ  قوس شەبەرى - ءالي زاكىر مەن ەرجان تاناەۆ كورسە كوز توياتىنداي ەتىپ جاساپ شىعاردى. اتالمىش جوبا جولىندا ولار ەكى اپتا بويى ءتور توكتى.

ەندى ەڭبەكتەرى اقتالعانداي. قوستاناي جۇرتشىلىعى ابايمەن قايتا قاۋىشقانداي اسەردە دەسەك ارتىق ايتپاسپىز. ويتكەنى قانشا دەگەنمەن قالامىزدا ەلىمىزدىڭ ەلگە ەلۋلى، حالقىنا قالاۋلى، تاريحتا ەسىمدەرى ويىپ تۇرىپ ورىن الاتىن تۇلعالارىنا ونشا كوڭىل بولىنە بەرمەيتىن. ابدەن ەسكىرىپ، شىتىناي باستاعان ىبىراي ءالتىنساريننىڭ دوبالداي ەتىپ جاساي سالعان ءبيۋستى مەن امانگەلدى باتىردىڭ جالعىز باسى عانا بەينەلەنگەن ەسكەرتىشتەن باسقا ءىلىپ الاتىن ەشتەڭە جوق-تى. قوستاناي توپىراعىندا دۇنيەگە كەلگەن ۇلى عالىم شوقان ءۋاليحانوۆتىڭ ەسكەرتكىشىنىڭ جوقتىعىن ايتپاعاندا، ونىڭ قامشىنىڭ سابىنداي عانا كەلتە كوشەسىن قالامىزدىڭ قيان شەتىنەن ازەر تاۋىپ الاسىڭ. ونى ايتپاعاندا جالعىز باتىرىمىز دەيتىندەي، وسى جەردىڭ ماقتان تۇتار تۇلەگى - سۇلتان بايماعانبەتوۆكە دە ەسكەرتكىش قويىپ، ەستە قالدىرۋ ەشكىمنىڭ دە ويىنا كەلمەگەن-ءدى. مۇنىڭ ورنىنا قالامىزدىڭ ءدال ورتىلىعىندا، قالالىق اكىمدىكتىڭ قارسى الدىندا ورىستىڭ پۋشكينى قاسقايىپ تۇرىپ، ولەڭ وقيدى. ونى از دەسەڭىز وسى قالالىق اكىمدىككە كىرە بەرىسىندە بەدا مەن پاۆلوۆكە كوز سالماي وتە المايسىز.

ءوزىمىزدى ەمەس، وزگە جۇرتتىڭ جاقسىلارى مەن جايساڭدارىن الاقانعا سالىپ، الديلەيتىن «ءداستۇرىمىزدىڭ» دە وزىندىك سىرى بار. قانشا دەگەنمەن وبلىسىمىزدا قارا كوزدەردەن گورى وزگە جۇرتتىڭ باسىمداۋ كەلەتىندىگىن ەسكەرسەك، وعان دا ونشا تاڭ قالا قويماسسىز. مىنە، سوندىقتان دا عۇلاما ابايدىڭ جارق ەتكەن بەينەسى ءبارىمىزدى دە «ە،باسە» دەپ ءبىر سەرپىلتىپ تاستادى.

 - اتالمىش جوبا «رۋحاني جاڭعىرۋ» باعدارلاماسى شەڭبەرىندە «مەيىرىم» قوعامدىق قورىنىڭ قولداۋىمەن دۇنيەگە كەلدى، - دەيدى قالالىق اكىمدىك تۇرعىن-ءۇي جانە كوممۋنالدىق شارۋاشىلىق ءبولىمىنىڭ باسشىسى الەكسەي تاراسوۆ.

الداعى ۋاقىتتا بۇل باعىتتاعى جۇمىس بۇدان ءارى دە جالعاسا بەرەدى.

«جاقسى ءسوز - جارىم ىرىس» دەگەندەي، تاراسوۆ مىرزانىڭ بۇل سوزىنە ءبىز دە قۋانىپ قالدىق.

جايبەرگەن بولاتوۆ، قوستاناي

Abai.kz