«نۇر وتان» پارتياسىنىڭ جاڭا جوبالارى اياسىندا شىمكەنت قالاسىنداعى «وتىرار» امبەباپ كىتاپحاناسى زاماناۋي كوۆوركينگ-ورتالىققا اينالدى. بۇگىن اتالعان نىساننىڭ جۇمىسىمەن پارتيا توراعاسىنىڭ ءبىرىنشى ورىنباسارى ماۋلەن اشىمباەۆ ارنايى تانىستى.

ورتالىق جاڭا تەحنولوگيامەن جانە جوعارى جىلدامدىقتى ينتەرنەتپەن جابدىقتالعان. مۇندا كەلۋشىلەر ارنايى كونفەرەنتس-زالدا ءتۇرلى تاقىرىپتاردا سەمينارلار، دارىستەر جانە ترەنينگتەر وتكىزە الادى. ودان بولەك، جاڭا ورتالىقتا دەمالىس ايماعى، كينو زالى، كوفەحانا، كىتاپ دۇكەنى جانە ەركىن پىكىرتالاس ايماعى بار. وسىلايشا ءداستۇرلى كىتاپحانادان جاڭا زامان تالاپتارىنا ساي ناعىز ءبىلىم ورتالىعى رەتىندە قايتا جاڭعىرعان نىسان قازىردىڭ وزىندە جەرگىلىكتى جاستاردىڭ ءجيى باس قوساتىن جەرىنە اينالىپ ۇلگەردى.

وسىنداي كوۆوركينگ-ورتالىقتار جاستارعا بەرىلىپ وتىرعان ۇلكەن مۇمكىندىك ەكەنىن ايتقان ماۋلەن اشىمباەۆ ونى جاستار، سونىڭ ىشىندە جاسوتاندىقتار ءتيىمدى پايدالانۋى كەرەكتىگىن تىلگە تيەك ەتتى.

– ەلباسىنىڭ «رۋحاني جاڭعىرۋ» باعدارلاماسىنىڭ نەگىزگى باعىتتارىنىڭ ءبىرى – حالىقتىڭ بىلىمگە دەگەن قۇشتارلىعىن ارتتىرۋ. وسىعان وراي «نۇر وتان» پارتياسى ەلىمىزدەگى كىتاپحانالاردىڭ قىزمەتىن جاڭعىرتىپ، ولاردى جاڭا زامانعا ساي كوۆوركينگ-ورتالىق رەتىندە قايتا قۇرۋ جوباسىن قولعا الدى. سەبەبى، كىتاپحانالار تەك كىتاپ وقيتىن ورىن ەمەس، ءتۇرلى سەمينارلار، ترەنينگتەر، دارىستەر وتەتىن، جاستار ءجيى باس قوساتىن ناعىز ءبىلىم ورتالىعى بولۋى ءتيىس. سوندىقتان وسىنداي ورتالىقتاردى مازمۇندى، ءماندى دۇنيەلەرمەن تولتىرۋىمىز كەرەك. جوبانىڭ نەگىزگى ماعىناسى دا وسى، ياعني ءداستۇرلى كىتاپحانالارعا جاستاردى تارتىپ، ولاردىڭ كىتاپ وقۋعا، ساپالى ءبىلىم الۋىنا جاعداي جاساۋ، – دەدى ماۋلەن اشىمباەۆ.

تاياۋدا عانا رەسپۋبليكالىق ماڭىزى بار قالالاردىڭ قاتارىنا قوسىلعان شاھاردا پارتيانىڭ بۇدان دا باسقا تىڭ باستامالارى ءساتتى جۇزەگە اسىرىلۋدا. ولاردىڭ قاتارىندا تسيفرلاندىرۋ ىسىنە ۇلەس قوسۋ، حالىقتىڭ تسيفرلى ساۋاتتىلىعىن ارتتىرۋ، جاستاردىڭ ساپالى ءبىلىم الىپ، دەنى ساۋ ۇرپاق بولىپ قالىپتاسۋىنا جاعداي جاساۋ جانە ەلىمىزدەگى ءداستۇرلى كىتاپحانالاردى قازىرگى زامانعى ءبىلىم ورتالىقتارى رەتىندە قايتا قۇرۋ جوبالارى بار.

سوعان وراي ماۋلەن اشىمباەۆ شىمكەنتكە ساپارى بارىسىندا م.اۋەزوۆ اتىنداعى وڭتۇستىك-قازاقستان مەملەكەتتىك ۋنيۆەرسيتەتىندە «نۇر وتاننىڭ» باستاماسىمەن اشىلعان ءىت-ورتالىققا جانە وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتىندە جۇمىسىن باستاعان ءىت-سىنىپتارعا باردى. سونداي-اق پارتيا توراعاسىنىڭ ءبىرىنشى ورىنباسارى «رۋحاني جاڭعىرۋ» باعدارلاماسى جانە بيزنەستىڭ الەۋمەتتىك جاۋاپكەرشىلىگى اياسىندا سالىنعان مۇمكىندىگى شەكتەۋلى بالالارعا ارنالعان «ايگەرىم» ارناۋلى كوررەكتسيالىق بالاباقشاسىنا بارىپ، بۇل سالا ۇنەمى پارتيانىڭ باستى نازارىندا ەكەنىن ايتتى.

ساپار سوڭىندا پارتيا توراعاسىنىڭ ءبىرىنشى ورىنباسارى «نۇر وتان» پارتياسىنىڭ شىمكەنت قالالىق فيليالىنىڭ كونفەرەنتسياسىنا قاتىسىپ، الداعى جۇمىس باعىتىن پىسىقتادى. ودان بولەك، جيىندا پارتيا قالالىق فيليالىنىڭ توراعاسى بولىپ شىمكەنت اكىمى عابيدوللا ءابدىراحىموۆ سايلاندى.

Abai.kz