بەيسەنبى, 20 ماۋسىم 2019
ساياسي پورترەت 11776 20 پىكىر 8 تامىز, 2018 ساعات 18:57

باتىر جاسۇزاقوۆقا وبال بولدى-اۋ!

كەشە عانا ەلىمىزدىڭ قورعانىس سالاسىنىڭ وتىمەن كىرىپ، كۇلىمەن شىعىپ جۇرگەن ساقا-مامان ساكەن جاسۇزاقوۆ قورعانىس ءمينيسترى قىزمەتىنەن بوساتىلدى. ۇزاق جىلدار بويى ەلىمىزدىڭ قورعانىس سالاسىندا تالماي تەر توككەن ازامات ەندى ەلىمىزدەگى جاي عانا  ءبىر ۋنيۆەرسيتەتتىڭ  مەڭگەرۋشىسى لاۋازىمىن اتقارادى. 

ەكى جىل قورعانىس ءمينيسترى بولعان جاسۇزاقوۆتىڭ اسكەري سالاداعى تاجىريبەسى قانداي ەدى؟ جاسۇزاقوۆ دەگەن كىم؟

ول 21 جاسىندا الماتىداعى جالپى اسكەري كوماندالىق ۋچيليششەسىن بىتىرگەن. 1978-1987 جىلدارى بالتىق بويى اسكەري وكرۋگىندە بارلاۋ ۆزۆودىنىڭ كومانديرى، بارلاۋ روتاسىنىڭ كومانديرى، جەكە بارلاۋ باتالونى شتابىنىڭ باستىعى سەكىلدى قىزمەت باسپالداعىنان ساتىلاي كوتەرىلگەن ازامات. اۋعان سوعىسىندا "قارا مايور" دەگەن اتپەن بۇكىل الەمدى مويىنداتقان بوريس كەرىمباەۆتىڭ قولاستىندا ءجۇرىپ، مايداننىڭ ءوتىن دە كورگەن.

جاسۇزاقوۆ 1990 جىلى ماسكەۋدەگى اسكەري اكادەميانى اياقتايدى. سوسىن ءتورت جىل قاتارىنان الماتى قالاسىنداعى اۋداندىق ازاماتتىق قورعانىس شتابى باستىعى; قر قورعانىس مينيسترلىگى شتابىنىڭ بارلاۋ بولىمىندە اعا وفيتسەر،  بارلاۋ باسقارماسىنىڭ عىلىمي-اقپارات ءبولىمىنىڭ باستىعى بولدى.

1994 — 1996 جىلدارى رەسەي قارۋلى كۇشتەرى باس شتابى اسكەري اكادەمياسىنىڭ تىڭداۋشىسى، 1996 — 2000 جىلدارى قازاقستان قارۋلى كۇشتەرى باس شتابى باستىعىنىڭ ورىنباسارى سياقتى لاۋازىمدى جۇمىستاردى ابىرويمەن اتقاردى.

2000 جىلدان باستاپ اسكەري قۇراما كومانديرى بولدى.

ال، 2016 جىلدىڭ قىركۇيەك ايىندا قر قورعانىس ءمينيسترى قىزمەتىنە تاعايىندالدى.

ول مينيستر بولعان تۇستا اسكەري گارنيزونداردا سپورت كەشەندەرى، تۇرعىن ۇيلەر مەن جاتاقحانالار سالىندى. جانە ءبىزدىڭ اسكەر دالالىق جەرلەردە جەدەل جانە اسكەري دايىندىق بويىنشا 250-دەن استام ءىس-شارا وتكىزدى.

سونىمەن قاتار، اسكەري بولىمشەلەردىڭ مۇمكىندىكتەرىن ءىس جۇزىندە كورسەتۋ ءۇشىن جىل سايىن اسكەري شەرۋلەر ۇيىمداستىرۋ جۇمىسىندا ەرەكشە كوزگە ءتۇستى.

باقىتبەك سماعۇلوۆ، اۋعان سوعىسىنىڭ ارداگەرى، قر پارلامەنتى ءماجىلىسىنىڭ دەپۋتاتى:

- جالپى، اۋعان سوعىسى ارداگەرلەرىنىڭ ىشىندە بۇگىنگى تاڭدا ەلدىڭ، ەلباسىنىڭ سەنىمىنە يە بولىپ، قازاقستان قارۋلى كۇشتەرىن باسقارعان گەنەرال-پولكوۆنيك بىرەۋ. ول – ساكەن جاسۇزاقوۆ.

ەكىنشى ماسەلە، ول قايدان شىڭدالدى؟ سوناۋ 1982-83 جىلدارى اتاقتى "قارا مويوردىڭ" قاراماعىندا بارلاۋ ءبولىمىن باسقاردى. شتاب باستىعى بولدى. سول كەزدەگى 177-ارنايى جاساقتالعان وتريادتىڭ ەڭ سەنىمدى بارلاۋشى كومانديرى رەتىندە كوزگە ءتۇستى. "قارا مايوردىڭ" ءوزى شىڭداپ، ماماندىعىن جاقسى بىلگەندىكتەن مينيستر دارەجەسىنە دەيىن كوتەرىلدى. 

مەن جاسۇزاقوۆپەن قازاقستان ارداگەرلەرى قاۋىمداستىعى ساپىندا جۇرگەندە، كەيىننەن ءتۇرلى اسكەري پاتريوتتىق سالاداعى جۇمىستار كەزىندە ىستەس بولدىم. سوندا ول كىسىنىڭ ناعىز ىسكەر ازامات ەكەنىن بايقادىم. 

قازىر جاسۇزاقوۆتىڭ باستاماسىمەن رەسپۋبليكالىق اسكەري پارتيوتتىق-سپورتتىق كلۋبتار فەدەراتسياسى قۇرىلعان.

ونىڭ مينيستر بولىپ تۇرعان  كەزىندە قازاقستان قارۋلى كۇشتەرى جامان بولعان جوق دەپ ايتۋعا تولىق حاقىمىز بار. ءبىزدىڭ اسكەر وزگە مەملەكەتتەرمەن تەڭ دارەجەدە باسەكەلەسە ءبىلدى.

جالپى، ساياسي ماسەلەدە  بولسىن، قاۋىپسىزدىك سالاسىندا بولسىن، بار كۇش-جىگەرىن سالدى دەپ ويلايمىن.

قازىر باسقا مەملەكەتتەردە اسكەري سالادا بولماعان ازاماتتار دا باسشىلىق ەتىپ جاتىر عوي. سوندىقتان، ەرمەكباەۆتىڭ قاۋىپسىزدىك سالاسىنداعى مول تاجىريبەسىنەن ءۇمىت كۇتەمىن. 

سولاي بولا تۇرا بىردە-ءبىر اۋعان سوعىسىنا قاتىسقان ارداگەر ەرتاەۆ پەن جاسۇزاقوۆتىڭ دەڭگەيىنە جەتكەن جوق. سوندىقتان ءبىز وسى ەكى اعامىزدىڭ ەڭبەگىن باعالاۋىمىز كەرەك دەپ ويلايمىن.

ءبىز، ارينە، مەملەكەتتىك دەڭگەيدەگى تاعايىنداۋعا قارسىلىق تانىتىپ وتىرعان جوقپىز. سوندا دا، قىزمەتىنەن كەتكەن ادامنىڭ جاقسىلىعىن ايتۋ بىزگە پارىز ىسپەتتى بولاعان سوڭ، اسكەري عىلىمداردىڭ دوكتورى، پروفەسسور،  پولكوۆنيك كيم سەرىكباەۆقا حابارلاستىق.

كيم سەرىكباەۆ، اسكەري عىلىمدار دوكتورى، پروفەسسور، پولكوۆنيك:

- جوق، ول تۋرالى پىكىر ايتپايمىن. بىلەم، بىراق ايتپايمىن. ول ساياسات قوي. قازىر ورنىنان بوساپ قالدى. بولمايدى.

ءتۇيىن

مەملەكەتتىڭ قورعانىس سالاسى مىقتى ماماننىڭ قولىندا بولۋى كەرەك. سەبەبى، cوڭعى جىلدارداعى الەمدەگى احۋالدار بۇل سالانى ءجىتى قاداعالاۋ كەرەكتىگىن ايگىلەدى. ەندى بارلىق جۇك نۇرلان ەرمەكباەۆباەۆتىڭ موينىندا. ءبىزدىڭ ىشكى ويىمىز "جاسۇزاقوۆ يمانعالي تاسماعامبەتوۆتىڭ كەزىندەگىدەي ءمينيستردىڭ ورىنباسارى لاۋازىمىندا قالسا دا بولار ما ەدى؟" دەيدى.

ءسىز نە دەيسىز؟

نۇربيكە بەكسۇلتانقىزى

Abai.kz

 

20 پىكىر