الماتىدا «2020 جىلعا دەيىن جاستارعا قولداۋ كورسەتۋدىڭ جول كارتاسى» اياسىندا جاستارعا ارنالعان «الماتى جاستارى» تۇرعىن ءۇي باعدارلاماسىنىڭ ەكىنشى كەزەڭى ءوتتى، مۇندا 35 جاسقا دەيىنگى جاستارعا جەكە پاتەر الۋ ءۇشىن جەڭىلدەتىلگەن زاەم بەرىلەدى.

تۇرعىن ءۇي كوميسسياسىنىڭ شەشىمىمەن باعدارلاماعا قاتىسۋشى 200 ادام انىقتالدى، ولاردىڭ بارلىعى «الماتى جاستارى» باعدارلاماسىنىڭ ىرىكتەۋ شارتتارىنان ويداعىداي ءوتىپ، «تۇرعىنۇيقۇرىلىسبانكىنىڭ» ىرىكتەۋىنە يە بولدى. وسىعان قاتىستى ءتىزىم www.almaty-zhastary.kz پورتالىندا جاريالاندى.

«الماتى جاستارى» جەڭىلدەتىلگەن نەسيە بەرۋ باعدارلاماسى 2017 جىلى باستالدى. سول كەزدە جەرگىلىكتى بيۋدجەتتەن 1 ملرد. تەڭگە بولىنگەن بولاتىن. تۇسكەن 6657 ءوتىنىشتىڭ 108-ءى تۇرعىن ءۇي زاەمدارىن الدى. 2018 جىلى «الماتى جاستارى» جەڭىلدەتىلگەن نەسيە باعدارلاماسىن جۇزەگە اسىرۋ ءۇشىن جەرگىلىكتى بيۋدجەتتەن 2 ملرد. تەڭگە ءبولىندى.

«الماتى جاستارى» باعدارلاماسىنىڭ قۇندىلىعى تومەن پروتسەنتتىك كورسەتكىشتە، ياعني جىلدىق 5 پايىزدىق نەسيەمەن 10 ملن. تەڭگەگە دەيىن زاەم بەرىلەدى. نەسيەنى قايتارۋ مەرزىمى اركىمنىڭ تولەۋ قابىلەتىنە قاراي جەكە جۇرگىزىلەدى، 3-تەن 25 جىلعا دەيىن.

Abai.kz