1988 جىل بولاتىن. عافاڭنىڭ 60-جىلدىق مەرەي تويى ارقالىقتان باستالدى. ارقالىق قالاسىندا وبلىستىق پارتيانىڭ ءبىرىنشى حاتشىسى قاتىسقان شىعارماشىلىق كەش گورنياك مادەنيەت ۇيىندە ءوتتى. ودان كەيىن امانتوعايدا، امانكەلدى اۋدانىندا اتالدى. جولداعى سوۆحوزدار اباي، الباربوگەتتەن دە كۇتىپ الىپ، قوناعاسى بەرۋشىلەر بولدى.

تورعايدا عافاڭنىڭ اتا باباسىنىڭ تۋعان جەرى شۇبالاڭ دەگەن جەر بار.

شۇبالاڭ مەن اۋدان ورتالىعىنىڭ اراسىندا "ع.قايىربەكوۆ اتىنداعى وقۋشىلار لاگەرى" بار. عافاڭ، بادەش جەڭگەمىز، جازۋشى ساكەن ءجۇنىسوۆ، ونىڭ جۇبايى مىنگەن ماشينەلەر سول بالالار لاگەرىنە سوقتى. تۇرعان جەرى كەرەمەت، سۋى ءمولدىر، تاماشا دەمالىس ورنى ەكەن. قوناقتار سوعان تامسانىپ ءبىراز ءجۇردى. سوسىن ولار بالالار اسحاناسىنان نان اۋىز ءتيدى.

سودان شىعىپ، مەرەي تويدى تويلاۋشىلار تورعايعا جاقىن، لاگەردەن ءبىر شاقىرىمداي جەردە تۇرعان تورعاي وزەننىڭ باتپاقسۋات دەپ اتالاتىن جاعاسىنا كەلدى. سۋات دەسە دەگەندەي، سۋعا اپاراتىن جالعىز اياق جول بار ەكەن، جان جاعى قوپا. نەگىزىنەن وسىدان الپىس جىل بۇرىن عافاڭنىڭ تۋىپ، كىندىگى كەسىلگەن جەرى وسى. سول سۋاتقا كەلىپ كوپ ماشينەلەر ءۇيىرىلىپ تۇرا قالدى. عافاڭ باستاعان توپ ماشينەلەرىنەن اسىقپاي ءتۇستى. باسقا ماشينەلەردەن ءبىر توپ ايەلدەر ءتۇسىپ، اقىنعا قاراي جامىراي كەلىپ، ءوزى جەپ جەڭىل عافاڭدى قولدارىنا كوتەرىپ الدى. سويتسە، بۇلار جەڭگەلەرى ەكەن، "قازىر سەنى تۋعان جەرىڭە اۋناتامىز!" دەدى.

عافاڭ جەڭگەلەرىنىڭ ايتقانىنا كونگەن.

"ال، اۋناتساڭدار، اۋناتىڭدار، مەن تاعى ءبىر تۋىپ كورەيىن" دەگەن.

جەڭگەلەرى عافاڭدى ءسويتىپ وزەن جاعاسىنا ءبىر ءبىر اۋناتىپ العان. سول جەرگە بادەش جەڭگەمىز ءبىر ۋىس كۇمىس تەڭگە شاشتى.

ونى "عافاڭنىڭ جاسىن، ابىرويىن بەرسىن" دەپ تەرىپ الىپ جاتقاندار بولدى.

عافۋعا

(ارناۋ ولەڭ)

باتپاقسۋات وزەننىڭ بەرگى بەتى،

سۋ الۋعا كەلىنشەك بارعان كەزدە،

باتپاعى ءسال توبىقتان اسار ەدى.

كوكتەمدە اسىپ تاسىپ، جارقىراسا،

جاز كەزىندە بالىق شولپىپ جاتار ەدى.

باتپاقسۋات عافۋدىڭ تۋعان جەرى،

دەمەپتى ەشكىم "زامانىندا بولار سەرى"

جاعاعا كەشە قونعان وشاقتى ۇيدەن،

ەستىلەدى، جاس كەلىننىڭ "بەسىك جىرى".

جۇمات انەسۇلى

Abai.kz