پرەزيدەنتتىڭ بەس الەۋمەتتىك باستاماسى قازىردىڭ وزىندە ءوز جەمىسىن بەرىپ، حالىق يگىلىگىن مولىنان كورىپ جاتىر. سونىڭ ىشىندە «7-20-25» باعدارلاماسى بويىنشا باسپانالى بولعان ازاماتتاردىڭ قۋانىشىندا شەك جوق. ەلباسى بۇل باستامالاردىڭ جۇزەگە اسىرىلۋ بارىسىنا قوعامدىق باقىلاۋ جۇرگىزۋدى «نۇر وتان» پارتياسىنا تاپسىرعانى بەلگىلى. سوعان وراي پارتيا توراعاسىنىڭ ءبىرىنشى ورىنباسارى شىعىس قازاقستان وبلىسىندا اتقارىلعان جۇمىستارمەن تانىسىپ، اتالعان باعدارلاما ارقىلى باسپانالى بولعان وتباسىلارىمەن كەزدەستى.

ماۋلەن اشىمباەۆ ەلباسىنىڭ بەس باستاماسى دەر كەزىندە جاريالانعان ماڭىزدى باعدارلاما ەكەنىن ايتىپ، وسى باعىتتاعى جۇمىستار پارتيانىڭ باستى نازارىندا ەكەنىن جەتكىزدى.

– قازىرگى كەزدە باسپانا ەڭ وزەكتى ماسەلەلەردىڭ ءبىرى ەكەنى ءسوزسىز. «7-20-25» باعدارلاماسى سول ماسەلەنى ءتيىمدى شەشۋگە باعىتتالعان ماڭىزدى باستاما. اسىرەسە جاس وتباسىلار ءۇشىن ۇلكەن مۇمكىندىك. باسپانانى كەز كەلگەن وتباسى ءۇشىن بولاشاققا سالىنعان ينۆەستيتسيا دەسەك تە، ارتىق بولا قويماس. وسىلايشا ەلباسى بارشا قازاقستاندىقتاردىڭ ءۇيلى بولۋىنا داڭعىل جول اشىپ، يپوتەكالىق نەسيەلەردىڭ قولجەتىمدىلىگىن قامتاماسىز ەتىپ وتىر. وسى ساپار ناتيجەسىندە بەس باستامانىڭ شىعىس قازاقستان وبلىسىندا تابىستى جۇزەگە اسىرىلىپ جاتقانىنا كۋا بولدىق. الداعى ۋاقىتتا دا پارتيا بۇل جۇمىستاردى باقىلاۋدى جالعاستىرا بەرەدى، – دەدى پارتيا توراعاسىنىڭ ءبىرىنشى ورىنباسارى.

سونداي-اق ماۋلەن اشىمباەۆ بەس الەۋمەتتىك باستامانىڭ ءتورتىنشىسى – شاعىن نەسيە بەرۋدى كوبەيتۋ ءىسىنىڭ جۇزەگە اسىرىلۋىن قاداعالاۋ ءۇشىن وسكەمەندەگى كاسىپكەرلەرگە قىزمەت كورسەتۋ ورتالىعىنا باردى. ول جەردە ءوز ءىسىن وركەندەتۋ ءۇشىن شاعىن نەسيە الىپ، جۇمىس ىستەپ وتىرعان كاسىپكەرلەرمەن كەزدەسىپ، پرەزيدەنت باستاماسىنىڭ ماڭىزدىلىعىنا نازار اۋداردى. بۇگىندە وبلىس بويىنشا شاعىن نەسيەنى كوبەيتۋ ءۇشىن قوسىمشا 1,7 ملرد. تەڭگە بولىنگەن. ال قارجىلاندىرۋدىڭ جالپى كولەمى 4,9 ملرد. تەڭگەنى قۇراپ، ناتيجەسىندە 377 ادام قولجەتىمدى شاعىن نەسيە العان. كاسىپكەرلەرمەن كەزدەسۋىندە «نۇر وتان» پارتياسى توراعاسىنىڭ ءبىرىنشى ورىنباسارى شاعىن جانە ورتا بيزنەستى قولداۋعا باعىتتالعان پارتيالىق جوبالار تۋرالى ايتىپ بەردى.

ساپار بارىسىندا پارتيا توراعاسىنىڭ ءبىرىنشى ورىنباسارى مەكتەپ مۇعالىمدەرىنىڭ ءداستۇرلى تامىز ءماسليحاتىنا قاتىسىپ، ۇستازدارعا «نۇر وتاننىڭ» ءبىلىم بەرۋ ىسىنە قاتىستى بىرقاتار تىڭ باستامالاردى قولعا العانىن جەتكىزدى.

– پارتيا ەلباسىنىڭ تاپسىرماسىنا سايكەس ءوز قىزمەتىن جاڭعىرتۋ جۇمىستارىن قارقىندى جۇرگىزۋدە. وسى باعىتتا ءبىلىمدى ۇرپاق تاربيەلەۋ ىسىنە دە قاتىستى كوپتەگەن جوبالاردى قولعا الدىق. سونىڭ ىشىندە مەكتەپ وقۋشىلارىنا بولاشاقتىڭ ماماندىقتارىن وقىتۋ ماقساتىندا ءىت-سىنىپتار اشۋ ءىسىن جۇرگىزىپ جاتىرمىز. ودان بولەك، جاستارىمىزدىڭ دۇرىس تاماقتانىپ، سالاماتتى ءومىر سالتىن ۇستانۋىن دا پارتيا باستى نازاردا ۇستاپ وتىر. وسىنداي يگى ىستەردى تابىستى جۇزەگە اسىرۋدا ۇستازدار قاۋىمىنىڭ دا ءرولى ەرەكشە ەكەنى ءسوزسىز، – دەدى ماۋلەن اشىمباەۆ.

Abai.kz