پارلامەنت سەناتىنىڭ توراعاسى قاسىم-جومارت توقاەۆ قحر ورتالىق اسكەري كەڭەسى توراعاسىنىڭ ورىنباسارى سيۋي تسيلياندى قابىلدادى.

سەنات باسشىسى قازاقستان مەن قىتاي اراسىنداعى ستراتەگيالىق ارىپتەستىكتى ودان ءارى دامىتۋدا بۇل ساپاردىڭ ماڭىزى زور ەكەنىن اتاپ ءوتتى. ق.توقاەۆتىڭ ايتۋىنشا، ەكى ەل اراسىنداعى ستراتەگيالىق ارىپتەستىكتى ناتيجەلى دامىتۋ ەۋرازيا قۇرلىعىنىڭ اۋقىمدى بولىگىندەگى بەيبىتشىلىك پەن قاۋىپسىزدىكتى قامتاماسىز ەتۋ مەن نىعايتۋداعى ماڭىزدى ماسەلە بولىپ تابىلادى.

اسكەري سالاداعى ءوزارا ءىس-قيمىلدىڭ دەڭگەيى مەن كەلەشەگىن تالقىلاي كەلىپ، تاراپتار ەكىجاقتى سيپاتتا دا، شىۇ اياسىندا دا ىنتىماقتاستىقتى ۇدەتە ءتۇسۋدى قاناعاتتانعاندىقپەن اتاپ ءوتتى. جۇزدەسۋشىلەر ەكى ەلدىڭ جوعارى باسشىلىعىنىڭ جۇيەلى تۇردەگى كەزدەسۋلەرىنىڭ ەرەكشە ناتيجەلى بولاتىنىن ايتا كەلىپ، قازاقستان پرەزيدەنتى ن.نازارباەۆتىڭ بيىلعى شىلدەدە قحر-عا رەسمي ساپارىنىڭ جانە تسينداو قالاسىندا وتكەن شانحاي ىنتىماقتاستىق ۇيىمىنىڭ سامميتىنە قاتىسۋىنىڭ قورىتىندىلارىن جوعارى باعالادى. «شىۇ اياسىنداعى ءوزارا ءىس-قيمىل قازاقستان سىرتقى ساياساتىنداعى نەگىزگى باسىمدىقتاردىڭ ءبىرى بولىپ تابىلادى»، - دەدى ق.توقاەۆ.

سيۋي تسيليان ءوز سوزىندە پرەزيدەنت ن.نازارباەۆتىڭ باسشىلىعىمەن قازاقستاننىڭ الەۋمەتتىك-ەكونوميكالىق دامۋىندا قول جەتكەن زور تابىستارىنا، ءبىزدىڭ ەلىمىزدىڭ حالىقارالىق ارەناداعى بەدەلى ارتا تۇسكەنىنە، قازاقستان ەلباسىنىڭ قىتايدا كەڭىنەن تانىمالدىعىنا توقتالدى.

جۇزدەسۋشىلەر بارلىق سالاداعى ىنتىماقتاستىقتى نىعايتۋ ماقساتىندا مەملەكەتتەر باسشىلارىنىڭ قول جەتكىزگەن ۋاعدالاستىقتارىن تولىقتاي جۇزەگە اسىرۋ قاجەتتىگى تۋرالى ويلارىن ورتاعا سالدى.

«اسكەري بايلانىستار – مەملەكەتارالىق قاتىناستاردىڭ ماڭىزدى بولىگى. اسكەري ىنتىماقتاستىقتىڭ جوعارى دەڭگەيى – مەملەكەتتەر اراسىنداعى قاتىناستار دەڭگەيىنىڭ كورسەتكىشى»، - دەپ اتاپ ءوتتى قحر ورتالىق اسكەري كەڭەسى توراعاسىنىڭ ورىنباسارى. ول شىۇ-دا بىرلەسكەن جاتتىعۋ وتكىزۋ كەزىندە قولداۋ بىلدىرگەنى ءۇشىن قازاقستانعا العىسىن جەتكىزدى.

كەزدەسۋ بارىسىندا جاڭا قاتەرلەر مەن قاۋىپتەر تۇرعىسىندا ايماقتىق قاۋىپسىزدىك ماسەلەلەرى دە تالقىلاندى. «نۇرلى جول» ستراتەگياسى مەن «جىبەك جولىنىڭ ەكونوميكالىق بەلدەۋىنىڭ» ۇشتاسۋىنىڭ ەرەكشە ماڭىزى تۋرالى دا ايتىلدى. ق.توقاەۆ پارلامەنتارالىق ىنتىماقتاستىقتى ودان ءارى دامىتۋ مەن  حالىق وكىلدەرى بۇكىلقىتاي جينالىسى تۇراقتى كوميتەتى توراعاسىنىڭ قازاقستانعا الداعى ساپارىنىڭ ماڭىزىنا توقتالدى.

Abai.kz