بەس مەملەكەتتىك بىرلەسكەن مالىمدەمەسىندە رەسەيدى «نوۆيچوك» ۋلى زاتىن دايىنداۋ باعدارلاماسىن اشۋعا شاقىردى. حيميالىق زاتتى سكريپالعا قاستاندىق جاساۋ ءۇشىن قولدانعان.
5 قىركۇيەكتە تەرەزا مەي بۇرىنعى وفيتسەر سكريپالدى كرەملدىڭ تاپسىرماسىمەن رەسەيدىڭ ارنايى قىزمەتى ۋلاعان دەپ مالىمدەدى. بريتانيا پروكۋراتۋراسى كۇدىكتىلەردىڭ سۋرەتتەرىن جاريالادى. ولار: الەكساندر پەتروۆ پەن رۋسلان بوشيروۆ. لوندون ولاردى قاماۋعا الۋعا ەۋروپالىق وردار شىعاردى.
ينتەرپول بۇرىنعى اگەنت سەرگەي سكريپال مەن قىزى يۋليا سكريپالدى ۋلادى دەگەن كۇدىكتى رەسەيلىكتەردى لوندوننىڭ كومەگىمەن ىزدەستىرەدى. بۇل تۋرالى بۇۇ قاۋىپسىزدىك كەڭەسىندە ۇلىبريتانيانىڭ بۇۇ-داعى تۇراقتى وكىلى كارەن پيرس مالىمدەدى. ول بريتان بيلىگى رەسەيلىكتەردى ەكستراديتسيالاۋدى تالاپ ەتپەيتىنىن، سەبەبى رەسەي كونستيتۋتسياسى رەسەيلىكتەردى ەكستراديتسيالاۋعا رۇقسات بەرمەيتىنىن ايتتى.
پيرس سونىمەن قاتار ۇلىبريتانيا پرەمەر-ءمينيسترى تەرەزا مەي رەسەيگە قارسى جاڭا سانكتسيالار سالىنۋى مۇمكىن ەكەنىن حابارلاعانىن ەسكە سالدى. ونىڭ سوزىنشە، سكريپالگە قاستاندىق جاساۋعا قولدانىلعان ۋدىڭ "وتە تازا" بولۋى ونىڭ مەملەكەت باقىلاۋىمەن جاسالعانىن ايعاقتايدى. "رەسەي بيلىگى بارلىق نورمالار مەن فاكتىلەر بۇرمالانعان وزگە الەمدە جۇمىس ىستەيدى" دەدى كارەن پيرس. ۇلىبريتانيا وكىلىنىڭ سوزىنە قاراعاندا، لوندون وداقتاستارىمەن بىرگە "بارلاۋ قىزمەتى الەمدەگى قاۋىپسىزدىككە قاتەر توندىرەتىن ەلدەرگە" شارا قولدانۋىن جالعاستىرا بەرەدى.
رەسەيدىڭ بۇۇ-داعى تۇراقتى وكىلى ۆاسيلي نەبەنزيا جيىندا لوندوننىڭ "سكريپالگە قاستاندىق جاساۋعا ماسكەۋدىڭ قاتىسى بار" دەگەن ايىپتاۋىن جوققا شىعاردى. ونىڭ سوزىنشە، كۇدىكتىلەردىڭ رەسەيلىك گرۋ اسكەري بارلاۋ قىزمەتىمەن بايلانىستى ەكەنى جانە ولاردىڭ سكريپالدى ۋلاۋعا قاتىسى بارى دالەلدەنبەگەن.
نەبەنزيا سونىمەن قاتار ۇلىبريتانيا رەسەيگە كۇدىكتىلەردىڭ ۆيزا مالىمەتتەرىن بەرمەگەنىن حابارلادى. ول بۇعان قوسا لوندوننىڭ رەسەي ديپلوماتتارىن سكريپالمەن كەزدەستىرمەي وتىرعانىن ايتىپ، ۇلىبريتانيانىڭ ءۋاجىن "ورىستاردى جەككورۋشىلىكتەن تۋعان" دەپ اتادى.
اقش-تىڭ بۇۇ-داعى تۇراقتى وكىلى نيككي حەيلي بريتان بيلىگىنىڭ سكريپالدى ۋلاۋ ىسىنە قاتىستى تەرگەۋىن "تىڭعىلىقتى جانە شىنايى تۇردە جۇرگىزىلگەن" دەپ اتادى. حەيليدىڭ پىكىرىنشە، الەمدىك قاۋىمداستىق لوندونعا قاستاندىققا كۇدىكتىلەردى تابۋعا كومەكتەسۋى ءتيىس.
سەرگەي جانە يۋليا سكريپالدەر 4 ناۋرىز كۇنى ۇلىبريتانيانىڭ سولسبەري قالاسىندا ەس-ءتۇسسىز كۇيدە تابىلىپ، اۋرۋحانادا ەمدەلىپ امان قالعان. ۇلىبريتانيا بيلىگى ولاردىڭ سسسر تۇسىندا اسكەري مقساتپەن جاسالعان ۋلى "نوۆيچوك" زاتىنان ۋلانعانىن انىقتاپ، بۇعان رەسەيدىڭ قاتىسى بار دەپ سانايدى.
Abai.kz
