الماتىدا جازۋشىلاردىڭ ءى حالىقارالىق فورۋمى باستالدى. شاراعا الەمنىڭ 17 ەلىنەن 70-كە جۋىق جازۋشى قاتىسىپ جاتىر. ادەبي فورۋمدى “رۋحاني جاڭعىرۋ” باعدارلاماسى اياسىندا الماتى اكىمدىگى ۇيىمداستىردى. “قۇبىلمالى الەمدەگى قازىرگى زامانعى ادەبيەتتىڭ ءرولى” اتتى فورۋمعا ۇلىبريتانيا، فرانتسيا، تۇركيا، رەسەي، پولشا، يزرايل جانە تاعى باسقا ەلدەردەن اقىن-جازۋشىلار، پۋبليتسيستەر، فيلولوگتار مەن اۋدارماشىلار جينالعان.

حالىقارالىق فورۋمنىڭ مودەراتورى – قازاق پەن-كلۋبىنىڭ جەتەكشىسى بيگەلدى عابدۋللين الەم جازۋشىلارىن قازاقستاندا نە سەبەپتى جيناپ وتىرعانىن ءتۇسىندىردى.

- مەنىڭ حالىقارالىق پەن-كلۋبتى باسقارعانىما ءتورت جىلدان استى. وسى قىزمەتكە تاعايىندالعان ساتتەن الدىما ورىندالۋى كەرەك ماڭىزدى ەكى تاپسىرما قويدىم. ولار – جازۋشىلار مەن جۋرناليستەردىڭ قۇقىعىن قورعاۋ جانە قازاق ادەبيەتىن شەتەلگە ناسيحاتتاۋ. اسىرەسە، اعىلشىن تىلىندە دامىتۋ. سەبەبى، اعىلشىن الەمىندە جوق جازۋشىنىڭ بولاشاعى جوق. سوندىقتان دا مەن وسى ماسەلەنى قولعا الدىم. الەم تەك ءبىزدى قازبا بايلىقتارىمىز بەن قۋاتتى ەكونوميكامىز ارقىلى تانيدى. ال ءبىز ادەبيەتىمىزدى دە بۇكىل الەمگە تانىتقىمىز كەلەدى. فورۋمدى وتكىزۋ يدەياسى پرەزيدەنت نۇرسۇلتان نازارباەۆتىڭ “رۋحاني جاڭعىرۋ” باعدارلاماسىنان تۋىندادى، – دەدى بيگەلدى عابدۋللين.

پەن-كلۋب جەتەكشىسىنىڭ ايتۋىنشا، بۇگىنگە دەيىن مۇقاعالي ماقاتاەۆ، بەردىبەك سوقپاقباەۆ، ولجاس سۇلەيمەنوۆ، ءابىش كەكىلباەۆ، سماعۇل ەرۋباي، مۇحتار اۋەزوۆ، ورالحان بوكەي جانە ساكەن ءجۇنىسوۆ شىعارمالارىنىڭ اۋدارماسى اقش-تا جانە ۇلىبريتانيادا جارىق كوردى.

ادەبي شارا اياسىندا “XXI عاسىر مەن ادەبيەت ماسەلەلەرى” جانە “ۇلتتىق ادەبيەتتىڭ جاھاندانۋى” تاقىرىبىندا تالقىلاۋ وتىرىستارى وتەدى. “رۋحاني جاڭعىرۋ” باعدارلاماسى مەن قالا كۇنىن تويلاۋ اياسىندا باستالعان فورۋم 3 كۇنگە سوزىلادى.

ايتا كەتەيىك، پرەزيدەنتتىڭ “بولاشاققا باعدار: رۋحاني جاڭعىرۋ” اتتى ماقالاسىندا: ەگەر ءبىز ۇلت بولعىمىز كەلسە…، وندا “جاھاندىق الەمدەگى قازىرگى زامانعى مادەنيەت” جوباسىن دامىتۋىمىز كەرەك، – دەلىنگەن ەدى.

Abai.kz