ورتا سالماقتا WBC, WBA (Super) جانە IBO تۇجىرىمدارى بويىنشا الەم چەمپيونى گەننادي گولوۆكين (38-0-1, 34 كو) مەن مەكسيكالىق ساۋل الۆارەس (49-1-2, 34 كو) شارشى الاڭدا ەكىنشى مارتە جولىقتى.

وتكەن جىلى ءدال وسى كۇنى، ءدال بۇگىنگى ارەنادا قوس بوكسشى العاشقى جەكپە-جەكتەرىن وتكىزگەن بولاتىن. 12 رۋاند بويى جۇدىرىقتاسقان بوكسشىلار تورەشىلەردىڭ شەشىمىمەن تەڭ تارقاسقان. ءسويتىپ، ەل اراسىندا ءبىر جىلعا ازىق بولارلىق داۋ-داماي مەن اڭىز قالعان. بىرەۋ GGG ۇتتى دەسە، بىرەۋ «كانەلونىڭ» ءباسى بيىك بولدى دەستى.

بۇكىل بوكس جانكۇيەرى كوز تىككەن العاشقى كەزدەسۋدە تەڭ تۇسكەننەن قوس بوكسشىنىڭ ەشتەڭەسى كەتپەدى. بۇدان ول ەكەۋى ۇتپاسا ۇتىلعان جوق نەگىزى. رەۆانش وتكىزىپ، تاعى ءبىر 40-50 ملن دوللاردى قالتاعا باسۋدىڭ ءساتى تۋدى. بىراق، جانكۇيەرلەردى بۇل ناتيجە قۋانتا العان جوق. اسىرەسە، بۇكىل ەلدىڭ جەڭىسىن بوكسشىنىڭ سوققىسىنا بايلانىستىرىپ وتىرعان ءبىزدىڭ كورەرمەننىڭ سالى سۋعا كەتتى.

اراعا تۋرا ءبىر جىل سالىپ لاس-ۆەگاستاعى T-Mobile Arena-دا قايتا بەتتەسكەن بوكسشىلار ءبىر-ءبىرىن ايامايتىنداي ءتۇر تانىتتى. جەكپە-جەك باستالماي تۇرىپ تا قارسى تاراپقا باعىتتالعان قورقىتۋ، ۇركىتۋ سوزدەرىنىڭ ءوزى ءبىر كىتاپ بولاتىنداي ەدى. "مەن ونى نوكاۋتقا جىبەرەم", "كىمنىڭ شىن مىقتى ەكەنىن كورسەتەمىن" دەگەن سوزدەردى ايتۋدان ەكى بوكسشى دا تارتىنعان جوق ەدى. ارينە، بۇل دا بوكستىڭ ءبىر بولىگى. شارشى الاڭ سىرتىنداعى شايقاس دەگەن وسى.

بوكس كەشى ساعات 06:00-دە باستالادى دەپ تاڭ اتپاي تۇرىپ العان قازاقستاندىقتار اسىعا كۇتكەن جەكپە-جەك توعىزدان اسقاندا باستالدى. العاشقى راۋندتاردا بوكسشىلاردىڭ وزدەرى ايتقانداي ءبىر-ءبىرىن "جەپ قوياتىن" قارقىن بايقالعان جوق. بىراق، تىنىمسىز سەكۋندتاردىڭ سىرعۋىمەن تارتىس تا قىزا ءتۇستى. ەكەۋىنىڭ دە دايىندىعى جوعارى دەڭگەيدە ەكەنىن بايقادىق.

نەگە ەكەنى بەلگىسىز، ەكى جەكپە-جەك تە مەكسيكا مەملەكەتىنىڭ تاۋەلسىزدىك كۇنىنە تۇسپا-تۇس كەلدى. ەگەر مەكسيكا جۇرتىنىڭ دا تۇسىنگى قازاقستاندىقتارمەن بىردەي بولسا، وندا تاۋەلسىزدىك كۇنى جەڭىلىس تابۋ بارىپ تۇرعان ماسقارا ەكەنى ءسوزسىز. بىراق، ول ەلدە ءبىر سپورتشىنىڭ جەڭىسى مەن جەڭىلىسى ەل ومىرىنە قانداي اسەر ەتەتىنى بىزگە بەلگىسىز. ءبىر انىعى، الۆارەس بۇگىن بىلتىرعىداي شارشى الاڭنىڭ ءتورت بۇرىشىندا قاشىپ جۇرمەي، ءبىزدىڭ بوكسشىمەن بەتپە-بەت كەلىپ "ەركەكشە" بوكستاستى. سوعان قاراعاندا ساۋل بۇل جولى تەك جەڭىس ءۇشىن شىققان سەكىلدى.

ماماندار مەن بوكس جانكۇيەرلەرى بۇل جەكپە-جەكتەن نوكاۋت كۇتكەن. كەيبىر ساراپشىلار گولوۆكين جەڭىسكە جەتەم دەسە قارسىلاسىن نوكاۋتقا تۇسىرمەگەن كۇننىڭ وزىندە، كەم دەگەندە ءبىر-ەكى مارتە نوكداۋن جاساۋى كەرەك ەكەنىن ايتقان. ايتپەسە، كاسىپقوي بوكس الەمنىڭ "سۇيىكتىسى" ءساۋلدى ۇپاي سانىمەن ۇتۋدىڭ قيىن ەكەنىن ەسكەرتكەن.

ءدال وسى پىكىر شىندىققا اينالدى. 12 راۋند بويى نە نوكاۋت، نە نوكداۋن بولماعان جەكپە-جەكتە مەكسيكالىق ساۋل الۆارەستىڭ جولى بولدى. ۇپاي ايىرماسى - 115:113, 115:113, 114:114. ال گولوۆكين ءوزىنىڭ WBC, WBA (Super) جانە IBO نۇسقالارى بويىنشا چەمپيوندىق اتاقتارىنان ايىرىلدى.

وسىلايشا، قازاق سپورتىنداعى ساتسىزدىكتەر جالعاسۋدا. دجاكارتا تورىندە وتكەن ازيا ويىندارىنداعى ناشار ناتيجە، كوشپەندىلەر ويىنىنداعى وزبەكتەردەن جەڭىلىس، فۋتبولشىلارىمىزدىڭ گرۋزيا مەن اندورراعا ۇپاي جوعالۋى، ەندى مىنە، گولوۆكين دە كاسىبي مانسابىنداعى العاشقى جەڭىلىسىنە ۇشىراپ وتىر.

Abai.kz