استانا ماڭىنداعى اۋىل تۇرعىندارىنىڭ دا جاقسى ءومىر سۇرۋگە قۇقىعى بار
قۇرمەتتى باقىتجان ءابدىرۇلى!
بيىل باس قالامىز استانانىڭ 20 جىلدىعىن ەل بولىپ اتاپ وتۋدەمىز. ەلباسىنىڭ ەرىك-جىگەرىنىڭ، ۇزدىكسىز قولداۋىنىڭ ارقاسىندا ەلىمىزدىڭ ورداسى، اسەم قالا استانا قازاق ەلى بولاشاعىنىڭ قالاسىنا اينالدى.
وسىدان 10-15 جىل بۇرىن، ەلىمىزدىڭ ىشكى ايماقتارىنان كەلگەن ءبىزدىڭ وتانداستارىمىز، الىس جاقىن شەتەلدەن ەلىم دەپ كەلگەن قانداستارىمىز، ۇكىلى ءۇمىتتىڭ جەتەگىندە، تاۋەلسىزدىگىمىزگە مىڭ تاۋبە جاساپ، استانانى اينالا قونعان ەدى. بۇگىندەگى ارۋ استانامىزدى سالعان تەك بەلگىلى ارحيتەكتورلار مەن شەنەۋىكتەر عانا ەمەس، سونىمەن قاتار جۇزدەگەن قاراپايىم جۇمىسشىلاردىڭ دا قاجىرلى ەڭبەگى. استانانى ءوز قولدارىمەن قالاعان ادامداردىڭ بارلىعى بىردەي وسى قالادان ءۇي، پاتەر الۋعا قول جەتپەيدى. استانانىڭ وتىمەن كىرىپ، كۇلىمەن شىعىپ جۇرگەن مىڭداعان ازاماتتارىمىز وسى استانا ماڭىنداعى اۋىلداردا تۇرادى. ولاردىڭ دا جۇرت قاتارلى جاقسى ءومىر سۇرۋگە تولىق قۇقىقتارى بار.
2012 جىلى ەلباسى، وسى اۋىلداردى ارالاپ، ۇكىمەتكە استانا اگلومەراتسياسىن دامىتۋدىڭ كەشەندى جوسپارىن جاساۋدى تاپسىردى. ول ءوز سوزىندە: «استانا اگلومەراتسياسىنىڭ ارنايى كەشەندى جوسپارىنا 20 ەلدى مەكەن كىرەدى، ونى دامىتۋعا مەملەكەت تاراپىنان 40 ملرد قارجى جوسپارلانىپ وتىر.استاناعا جاقىن ورنالاسقان اۋىلدارعا ادامدار كوشىپ كەلىپ، تۇراقتاپ جۇمىس ىستەۋى ءۇشىن بارلىق مۇمكىندىك جاسالۋى ءتيىس. ۇلكەن قالالاردىڭ ماڭايىنا شوعىرلانۋ الەمدە بار ءۇردىس»، - دەپ اتاپ وتكەن-ءدى.
سول ۋاقىتتان بەرى ۇكىمەت قابىرعاسىندا وسى تاقىرىپقا بايلانىستى تالاي جيىن ءوتتى.بىراق بۇل جيىنداردان ادامداردىڭ ءومىرىنىڭ وزگەرگەنىن كورمەدىك.
بۇگىندە استانا تۇبىنە شوعىرلانعان اۋىلداردا حالىقتىڭ سانى كۇرت وسۋدە. ءبىر عانا مىسال، قوياندى اۋىلىندا 1999 جىلى 319 تۇرعىن بولسا، بۇگىندە، تەك رەسمي مالىمەت بويىنشا، 22000 مىڭ ادام، ال، بەيرەسمي دەرەك بويىشا، 35000 ادام تۇرادى ۇلكەن وكىنىشكە وراي، ادام سانىمەن بىرگە بۇل اۋىلداردا الەۋمەتتىك، ينفروقۇرىلىمدىق پرولەبلەمالار دا بىرگە وسۋدە. بۇل اۋىلدان
10 شاقىرىم جەردەگى استانانىڭ كەيبىر كوشەلەرى ءبىر جىلدا ەكى رەت جوندەلسە، 15جىلدا بۇل اۋىلدىڭ ىشىندەگى ۇزىندىعى 154 كم جولدىڭ 3,5 كم-نا عانا اسفالت توسەلگەن . وسى جولمەن كۇزدە بەس شاقىرىم باتپاق كەشىپ، قىستا بورانداتىپ، قار كەشىپ بالالار مەكتەپكە بارادى. اۋىلدىڭ قيىر شەتىنە ورنالاسقان 900 ورىندىق مەكتەپتە 2700 وقۋشى ءبىلىم الۋدا، تەك 1-كلاستا عانا 16 سىنىپ بار. اۋىلدىڭ تازالىعى، اۋىز سۋ، وقۋشىلاردى تاسىمالدايتىن كولىك، جول، اۋىلداعى كريمينالدىق احۋال سياقتى ماسەلەلەر تالاي ۋاقىتتان بەرى ايتىلىپ كەلەدى، بىراق ءالى تولىق شەشىمىن تاپقان جوق. وسى ولقىلىقتار جوعارىدا اتالعان ءبىر عانا اۋىل ەمەس، استانانى اينالا قونعان تالاپكەر، قاجىمۇقان، قوسشى، قاراوتكەل، تايتوبە سياقتى اۋىلدارعا دا ءتان.
2017 جىلى 31 قازاندا ۇكىمەت وتىرىسىندا استانا اگلومەراتسياسىنىڭ تەرريتوريالىق سحەماسى ماقۇلداندى.بۇل ايماقتىڭ شەڭبەرىنە 124 ەلدى مەكەن ەنىپ، 2030 جىلعا اگلومەراتسيا حالقىنىڭ سانىن 2ملن-عا جەتكىزۋ جوسپارلانىپ وتىر. 2030جىلعا دەيىن استانا اۋماعىنداعى ءىرى ونەركاسىپ جانە ءوندىرىس وبەكتىلەرىن جاڭادان قۇرىلاتىن ءۇش يندۋستريالىق ايماققا كوشىرۋ جوسپارلانۋدا.
الايدا، وسى يندۋستريالىق ايماقتاردىڭ ءبىرى 35000 مىڭ حالقى بار قوياندى اۋىلىن اينالىپ ءوتىپ، 86 عانا تۇرعىنى بار جايناق اۋىلىنا، ەندى ءبىرى 15000 حالقى بار تالاپكەرگە ەمەس، 854 ادامى بار توڭكەرىس اۋىلىنا ورنالاساتىن بولىپتى. ارينە يندۋستريالىق ايماققا ورىن ىزدەگەندە تەمىر جولدىڭ توعىسى، تاعى باسقا دا ينفروقۇرىلىمدىق، ەكونوميكالىق كاتەگوريالار نەگىزگە الىنعان بولار. ەستەرىڭىزگە سالا كەتەيىك، ەڭ جوعارعى ەكونوميكالىق كاتەگوريا – ول ادامنىڭ ەڭبەگى، تەمىردى دە، كومىردى دە ناعىز قۇندىلىققا اينالدىراتىن ادامنىڭ ەڭبەك كۇشى.
قۇرمەتتى باقىتجان ءابدىرۇلى!
كەشە عانا ۇكىمەت 2019-2023 جىلداردا استانا قۇرىلىسىنىڭ كەشەندى جوسپارىن بەكىتتى. وسى ورايدا، اقجول فراكتسياسىنىڭ مىناداي سۇراقتارىنا جاۋاپ بەرۋلەرىڭىزدى سۇرايمىز:
- استانا قالاسىنىڭ، استانا اگلومەراتسياسىنىڭ پەرسپەكتيۆالىق جوسپارىنا قالا ماڭىنداعى حالقى تىعىز ورنالاسقان اۋىلدار ەندى مە؟
- ينفراقۇرىلىم (جول سالۋ، جىلۋ، سۋ تارتۋ) جانە مادەنيەت وشاقتارىن سالۋ جۇمىستارىنا قارجى قاراستىرىلعان با؟
- وسى اۋىلداردا وقۋشىلاردىڭ سانىنا سايكەس مەكتەپتەردىڭ قۇرىلىستارىنا قارجى بولىنگەن بە؟
- ەلباسىنىڭ بەس الەۋمەتتىك باستاماسىنا سايكەس،بۇل اۋىلدار گازداندىرۋ جوسپارىنا ەنگىزىلگەن بە؟
- جوعارىدا اتالعان ماسەلەلەر قاراستىرىلعان بولسا، ولاردىڭ ورىندالۋ مەرزىمى قانداي؟
قۇرمەتپەن،
«اق جول» قدپ فراكتسياسىنىڭ دەپۋتاتتارى
دەپۋتاتتىق ساۋالدى ماجىلىسمەن بەرىك دۇيسەمبينوۆ قويدى.
Abai.kz
