جولداۋدى كولىكتە كەلە جاتىپ تىڭدادىم. قالتافونعا جۇكتەلگەن «قازاقستان» تەلەارناسىنىڭ قوسىمشاسى تىكەلەي ەفيردى كورۋىمە مۇمكىندىك بەردى. فورماتى توسىنداۋ بولدى. ادەتتە ءوزىمىز كۋا بولىپ جۇرگەن جولداۋ فورۋمىنان گورى ۇكىمەت وتىرىسىنا ۇقساپ كەتتى. ويتكەنى ەلباسى مينيسترلەردى، وبلىس اكىمدەرىن تۇرعىزىپ سىلكىلەپ جاتتى.
جالپى ءوز باسىم بۇل جولداۋدان ۇلكەن ساياسي رەفورمالار كۇتىپ ەدىم. الايدا ول تازا كەلەسى جىلدىڭ ەكونوميكالىق پروبلەمالارىنا عانا ارنالدى. دەگەنمەن بىرقاتار يگىلىكتى جاڭالىقتار بولاتىنىن تۇيدىك.

2019 جىلدىڭ 1 قاڭتارىنان باستاپ ەڭ تومەنگى جالاقى 1,5 ەسە ءوسىپ، 28 مىڭ تەڭگەدەن 42 مىڭ تەڭگەگە جەتەدى ەكەن. بۇل دا بولسا ىلگەرىلەۋ. ستاتدەرەكتەردە ورتاشا جالاقى 150 مىڭ تەڭگەدەن اسىپ كەتتى دەگەنىمەن ەلىمىزدە ءالى كۇنگە كۇنىنە 1000 تەڭگە عانا تابىس تاباتىن ەڭبەككەرلەر بارشىلىق. ولاردىڭ جالپى سانى ميلليوننان اسىپ كەتەدى ەكەن. سوندىقتان جەتىلىپ كەتتىك دەپ ماقتانۋعا ءالى ەرتە.
«جول كارتاسى» سياقتى باعدارلامالار جالعاسىن تاپپاق كورىنەدى. ەلباسى ءوزى قازاقستاندا تىگىلگەن كوستيۋم كيەتىندىگىن ايتتى. ال شيرپوترەب اقساپ جاتقانى راس. وندىرىستە قولما قول ەسەپتەسۋدىڭ توقتاتىلاتىنى وزىنشە بەتبۇرىس جاساماق. شىنىمەن دە قولما قول اقشا جۇرگەن جەردە بىلىق-شىلىق، جەڭ ۇشىنان جالعاسۋ ءجۇرىپ جاتاتىنى انىق.

ماعان وتە ۇناعانى، 2019 جىلعى 1 قاڭتاردان باستاپ شاعىن جانە ورتا كاسىپكەرلىك ءۇشىن سالىقتىق امنيستيا جۇرگىزىلەتىندىگى. قايتا وڭدەۋ ونەركاسىبىنىڭ دامۋى ءۇشىن الداعى ءۇش جىلدا 500 ملرد تەڭگە قاراجات بولىنەتىندىگى دە جاقسى دەرەك.

مارات ءبايدىلداۇلىنىڭ facebook پاراقشاسىنان

Abai.kz