...تۇراندى كوكتەي ءوتىپ، سارىارقاعا تۇستىك. تاكسيشىنىڭ اۋزى ءالى جابىلماي كەلەدى. سوناۋ ماڭگىلىك ەلدە سامبىرلاۋ باستالعان. قۇداي-وۋ، نە دەگەن اۋىز! سارىجاعال سايتتاعى، وسەگى كوپ الەۋمەتتىك جەلىدەگى اڭگىمەلەردى وزىنىكىندەي ەتىپ ۇرا بەرەدى ەكەن. بىلمەيتىنى جوق! باياننىڭ بايىنىڭ ءۇيىن تارتىپ العانى، قىزىنىڭ ءىش كيىمسىز سۋرەت جاريالاعانى، قايراتتىڭ ايەلىنىڭ الدەبىر باعدارلاماعا جۇرگىزۋشى بولعانى، قويانبايدىڭ نەمەرەسىنىڭ كينو تۇسىرمەك بولىپ جاتقانى...قويشى، ءبىرازىنىڭ قۇلاعىن شۋلاتىپ تاستادى.

ودان ەكونوميكا، ساياساتقا اۋىستى. ونىسى دا اننان، مىننان ەستىگەن اڭگىمەلەرى. تۇرا قاشقىم كەلىپ وتىرمىن. الدىمىزدان قىزىل شام جانىپ، ايالداپ تۇرعاندا سىرتقا كوز تاستاعانمىن. بۇرىشتاعى ءۇيدىڭ ءبۇتىن قابىرعاسىنا ساكەن سەيفۋلليننىڭ سۋرەتىن سالىپتى. ءوزى دە كوركەم ەدى عوي. مىنا جەردە ءتىپتى كوركەم! كەرەمەت!

ويىمدى تاكسيشى بۇزدى. مەنىڭ سۋرەتكە قاراپ وتىرعانىمدى كورىپ وتىر.
-وسىلار ويلارىنا كەلگەنىن ىستەيتىن بولدى!- دەدى ول الدەكىمدەرگە كىجىنىپ، - تاباقتاي قىلىپ تاعى ءبىر دەپۋتاتتىڭ سۋرەتىن ءىلىپ قويىپتى. مىنا تۇرلەرىمەن ەرتەڭ ءۇيىمىزدىڭ تورىنە ءوز سۋرەتتەرىن ىلگىزەر...
...جاسىل شام جانىپ جانىم قالدى. باراتىن جەرىمە ءالى ءبىراز جەر بولسا دا اقشاسىن بەرىپ ءتۇسىپ قالدىم. تاكسيشىگە رەنجىگەن جوقپىن. ءبارىمىز دە سوندايمىز عوي... ءبىلسىن،بىلمەسىن سوعا بەرەمىز. شەتىمىزدەن ساياساتكەر، جۋرناليست، ەكونوميست، ولگەنى "قوعام بەلسەندىسى"...
...ارتىما قاراعانمىن. كوركەم ساكەن جىميىپ ماعان قاراپ قالىپتى...

ارمان سقابىلۇلىنىڭ facebook پاراقشاسىنان

Abai.kz