مەملەكەت باسشىسى فرانتسيا رەسپۋبليكاسىنىڭ پرەزيدەنتى ەممانيۋەل ماكرونمەن كەزدەستى، دەپ حابارلايدى اباي-اقپارات اقوردانىڭ سايتىنا سىلتەمە جاساپ.

نۇرسۇلتان نازارباەۆ «ازيا – ەۋروپا» (اسەم) فورۋمى ءحىى ءسامميتىنىڭ اشىلۋ راسىمىنە كەلگەن سوڭ فرانتسيا رەسپۋبليكاسىنىڭ پرەزيدەنتى ەممانيۋەل ماكرونمەن كەزدەستى.

مەملەكەت باسشىسى ەكى ەل اراسىندا ديپلوماتيالىق قارىم-قاتىناس ورناعانىنا 26 جىل تولعانىن جانە وسى كەزەڭ ىشىندە قاجەتتى بۇكىل شارتتىق-قۇقىقتىق بازا قالىپتاسقانىن اتاپ ءوتتى.

– بۇگىنگى كەزدەسۋىمىزدىڭ ارقاسىندا قازاقستان مەن فرانتسيا اراسىنداعى بايلانىستار جاڭا دەڭگەيگە كوتەرىلەدى دەپ سەنەمىن. ءبىزدىڭ ەلىمىزدە فرانتسيانىڭ ونداعان كومپانياسى جۇمىس ىستەۋدە، ءوزارا تاۋار اينالىمىنىڭ كولەمى 5 ميلليارد اقش دوللارىنا جەتۋى مۇمكىن، – دەدى قازاقستان پرەزيدەنتى.

ە.ماكرون نۇرسۇلتان نازارباەۆقا ءىلتيپات بىلدىرە وتىرىپ، قازاقستان مەن فرانتسيا اراسىنداعى ستراتەگيالىق سەرىكتەستىك تۋرالى شارتتىڭ 10 جىلدىعى قارساڭىنداعى وسى كەزدەسۋدىڭ سيمۆولدىق ءمانى زور ەكەنىن اتاپ ءوتتى.

– پرەزيدەنت مىرزا، سىزبەن تانىسقانىما وتە قۋانىشتىمىن. مەن پرەزيدەنتتىك قىزمەتكە كەلگەننەن بەرى العاش رەت جۇزدەسىپ وتىرمىز. سىزبەن بىرقاتار ماسەلەنى تالقىلاپ، كوزقاراسىڭىزدى بىلگىم كەلەدى، – دەدى فرانتسيا باسشىسى.

ءوزارا سەنىم جاعدايىندا وتكەن كەزدەسۋ بارىسىندا تاراپتار ەكى جاقتى قارىم-قاتىناس ماسەلەلەرىن تالقىلاپ، وڭىرلىك جانە حالىقارالىق كۇن تارتىبىندەگى مەيلىنشە وزەكتى پروبلەمالار جونىندە اشىق پىكىر الماستى.

Abai.kz