«حابار» تەلەارناسىندا 14 قاراشادان باستاپ «ءبورى» كريمينالدىق دراماسى ەفيرگە شىعادى. پوليتسيا قىزمەتكەرلەرىنىڭ تىنىس-تىرشىلىگىن سۋرەتتەيتىن تۋىندىدا باستى ءرولدى تەاتر جانە كينو اكتەرى اسان ءماجيت سومدايدى. كارتينا تۋرالى تولىعىراق اساننىڭ وزىنەن سۇراعان ەدىك.

اسان، ءسىز «حابار» ارناسىنىڭ تاپسىرىسىمەن تۇسىرىلگەن «ءبورى» تەلەسەريالىندا باستى ءرولدى سومدايسىز. كارتينا نە تۋرالى؟

بۇل تەلەسەريال پوليتسيا قىزمەتكەرلەرى جايلى. ونىڭ ىشىندە تيمۋر ەسىمدى جىگىتتىڭ ءومىرى سۋرەتتەلەدى. وقيعا جەلىسى بويىنشا تيمۋر قىلمىستىق ىستەردىڭ بەتىن اشىپ، قىزمەت بابىندا جوعارىلايدى. وسى تۇستا كولىك اپاتىنان جارى كوز جۇمادى. تيمۋر بۇل وزىنە جاسالعان قاستاندىق ەكەنىن ءبىلىپ، ءىستى زەرتتەۋ بارىسىندا ءتۇرلى شىتىرمان وقيعالارعا، قيىنشىلىقتارعا تاپ بولادى.

بۇل تەلەسەريالعا قالاي كەلدىڭىز؟ نەسىمەن قىزىقتىردى؟

كارتينانىڭ پروديۋسەرى اقىلبەك دوسجانوۆ كاستينگكە شاقىردى. كانالعا وتكىزبەس بۇرىن پيلوتتىق بولىمىنە تۇسكەن ەدىم. كەيىن جوبا قولعا الىنىپ، ۋاقىتى مەن مەرزىمىن ايتىپ، ءتۇسىرىلىم باستالاتىندىعى تۋرالى ۇسىنىس ءتۇستى. بىردەن كەلىستىم، سەبەبى ستسەناريى وتە قىزىقتى بولدى.

كەيىپكەرىڭىز قانداي ادام؟ سىزگە ۇقساس تۇستارى بار ما؟

كەيىپكەرىمنىڭ قانداي ادام ەكەنىنە كەلەر بولساق، ءبارىن اشىپ ايتپاي-اق قويايىن. سەريال ەفيرگە شىققان سوڭ كورەرمەندەر وزدەرى كورەر. ال كەيىپكەرىم نەسىمەن قىزىقتىردى دەگەن ماسەلەگە كەلەر بولساق، وزدەرىڭىز بىلەتىندەي بۇعان دەيىن مەن ۇنەمى جاعىمسىز ادامداردىڭ ءرولىن سومداپ ءجۇردىم. بۇل مەنىڭ العاشقى جاعىمدى باستى ءرولىم. سونىسىمەن مەنى قىزىقتىرعان سياقتى. سەريالدىڭ العاشقى بولىمىنەن باستاپ تيمۋر قايعى-قاسىرەتكە دۋشار بولادى. وسى قيىندىقتاردى جەڭۋ بارىسىندا ول كوپ وزگەرەدى. اكتەر رەتىندە ماعان بۇل ءوزىمدى دامىتۋعا جاقسى مۇمكىندىك بەردى. تيمۋردى باتىل مىنەزدى، ءوز سوزىندە تۇراتىن كەيىپكەر رەتىندە كوردىم، سولاي جەتكىزۋگە تىرىستىم.  باعاسىن كورەرمەن بەرە جاتار.

شىنى كەرەك سومداعان كەيىپكەرلەرىمنەن ءوزىمنىڭ بولمىسىمداعى قاسيەتتەردى ىزدەمەيدىمىن. ارينە ادام بولعاننان كەيىن ءوزىڭنىڭ كەيبىر قىلىقتارىڭ، بولماسا ادەتتەرىڭ كەيىپكەرىڭنەن كورىنىپ، بايقالىپ جاتادى، بىراق بارىنشا ۇقساتپاۋعا تىرىسام. سەبەبى ىزدەنۋگە كەدەرگى جاسايدى. ەگەر تۋىندىدا ءوز ءوزىڭدى جاساپ شىعاتىن بولساڭ، ويلانۋدىڭ، وقۋدىڭ، ءىلىم الۋدىڭ قاجەتى جوق سياقتى.

قازاقستاندىق كورەرمەن ءۇشىن بۇل تەلەسەريال نەسىمەن قىزىقتى بولادى؟

شىتىرمان وقيعالارىمەن. ءدال وسى باعىتتا تۇسىرىلگەن سەريالدار بولعانىمەن، وتە از. ياعني، پوليتسيا قىزمەتكەرلەرىنىڭ جۇمىسى، كاسىبى، باستان وتكىزگەن قيىنشىلىقتارى جايلى كوپ تۇسىرىلمەيدى. ستسەناري وتە قىزىقتى جازىلعان، كورەرمەن دوستار اراسىنداعى ساتقىندىقتى، جۇمىس بارىسىنداعى داۋ-جانجالدىڭ كۋاگەرى بولادى. سونىمەن قاتار سەريالعا ازيز بيشەناليەۆ اعامىز باستاعان اكتەرلەر قۇرامى ءتۇستى.

ءسىز ءبىر سۇحباتىڭىزدا قاتىگەز، جاعىمسىز ادامداردى ويناعىم كەلمەيدى دەگەنسىز. نەگە؟

ءيا، كەيىنگى سۇحباتتارىمدا قاتىگەز كەيىپكەرلەردى ويناعىم كەلمەيتىندىگىن ايتىپ ءجۇرمىن. ويتكەنى كينوعا كەلگەلى جاعىمسىز بەينەلەردى سومداپ كەلەمىن. اكتەر ءار جوبا سايىن بارىنشا وزگەرىپ، وسكەندى قالايدى. رەجيسسەرلەر مەنىڭ ءبات-الپەتىمە قاراپ، قاتىگەز، جاعىمسىز كەيىپكەرلەردى جاقسى وينايدى دەيتىن بولار. الايدا بۇل وبرازدار بارعان سايىن قىزىقسىز بولىپ كەتەدى.

مەن ءار جوباداعى كەيىپكەرلەرىمدى ءبىر-بىرىنە ۇقسامايتىن، ءارتۇرلى ەتىپ جاساۋعا تىرىسىپ باعام. دەگەنمەن باسقاشا باعىتتاعى كەيىپكەردى سومداعىم كەلەتىن. سوندىقتان سۇحباتتارىمدا جاعىمسىز رولدەردى ويناعىم كەلمەيدى دەپ ايتامىن. باقىتىما وراي، قازىر ونداي كەيىپكەرلەر بەرىلىپ جاتىر، سونىڭ ءبىرى «ءبورى» سەريالىنداعى كەيپكەرىم. وسى جىلى «تالان» اتتى ءفيلمنىڭ تۇساۋكەسەرى بولادى. كارتينا 30-40 جىلدارى اۋىلدا قالعان جاس جىگىت جايلى.  ول جەردە تاعا دەگەن ادامدى سومدادىم. تاريحي جوبالار كوپ بولىپ، سوندا جۇمىس ىستەسەم دەپ ويلايمىن. ويتكەنى كوپ ىزدەنەسىڭ، وبرازىڭدى اشۋ ءۇشىن ۇزاق دايىندالاسىڭ.

قاتەلەسپەسەم تەاتردا دا وينايسىز. كينو مەن تەاترعا قالاي ۇلگەرەسىز؟ جانىڭىزعا قاي باعىت جاقىن؟

قازىر مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىندا جۇمىس ىستەيمىن. بارىنشا كينوعا دا، تەاترعا دا ۇلگەرۋگە تىرىسىپ ءجۇرمىن. تەك مەن ەمەس، تەاتردا ىستەيتىن كەز كەلگەن اكتەر ۇلگەرۋگە تىرىسادى. كەيدە وتباسىڭا، دامالۋعا ۋاقىت جەتىسپەي جاتادى...

تەاتردى قوزعاعاننان كەيىن ايتا كەتۋ كەرەك، مەنىڭ جۇرەگىم تەاتر دەپ سوعادى. بۇل بولەك الەم. تەاتردا مەن ءوز-ءوزىمدى ەمىن-ەركىن سەزىنەمىن. ءوز كاسىبىڭنەن، ىستەگەن ىسىڭنەن لاززات الۋ كەرەك دەپ جاتادى. مەن وسى لاززاتتى تەاتردا سەزىنەمىن. كينودا جۇرگەنىمە 10 جىلداي بولدى. دەگەنمەن تەاتردىڭ ورنى ەرەكشە. قازىرگى تاڭدا بۇلىنبەگەن ونەر ءتۇرى - تەاتر. ويتكەنى كينوعا  كەز كەلگەن ادام بارۋى مۇمكىن، جولدان، كوشەدەن قوسىلادى. ال تەاترعا ونداي ادامدار بارا المايدى، باتىلى دا جەتپەيدى.

ءسىزدىڭ جاقسى ءان ايتاتىنىڭىزدى بىلەمىن. بۇل قىرىڭىزدى قاشان كورەمىز؟

ءان ايتاتىنىم راس، بىراق ەسترادا جانرىندا ەمەس. مەن ت.جۇرگەنوۆ اتىنداعى ونەر اكادەمياسىنىڭ «مۋزىكالىق دراما جانە ەسترادا اكتەرى» فاكۋلتەتىن ءتامامدادىم. ۋنيۆەرسيتەت قابىرعاسىندا 4 جىل بويى ۆوكالدان ءدارىس العان ءارتىسپىز. ۆوكالدان بەرگەن جەڭىس باينەشوۆ اعامىزعا مىڭ العىس. ءبىزدى ءانشى بولسىن دەپ دايىنداعان جوق، وپەراعا جاقىن ەتىپ ءوسىردى. وپەرا تەاترىندا جۇمىس جاساي الماسپىز، بىراق وپەرەتتا، ميۋزيكل جانرىنداعى قويىلىمداردا  جۇمىس ىستەۋگە بولادى. باعىتىمىز وسى. قازىر م.اۋەزوۆ تەاترىندا «قىز جىبەك» قويىلىمى قويىلادى، سوندا بەكەجاننىڭ ءرولىن سومدايمىن. ەگەر اسان ءماجيتتىڭ ءان ايتقانىن كورەم دەۋشىلەر بولسا، وسى سپەكتاكلدە كۇتەمىن.

دۇيسەنبى-جۇما كۇندەرى ساعات 19:15 تە "حابار" تەلەارناسىنان ء"بورى" سەريالىن تاماشالاڭىزدار!

Abai.kz