ەلباسى نۇرسۇلتان نازارباەۆ “5 الەۋمەتتىك باستاما” جوباسىندا مەكتەپ، بالاباقشا سياقتى الەۋمەتتىك نىسانداردى كوپتەپ اشۋ قاجەتتىگىن ايتقان بولاتىن. سونداي-اق، بالاباقشا تاربيەشىلەرىنىڭ جالاقىلارىن كوتەرۋ كەرەكتىگىنە دە توقتالعان ەدى. وسىعان سايكەس، جۋىردا تۇركىستان وبلىسىندا  مەملەكەتتىك-جەكەمەنشىك ارىپتەستىك اياسىندا قوس بالاباقشا اشىلدى.

ونىڭ ءبىرى اۋدان ورتالىعى شولاققورعاندا ەل يگىلىگىنە بەرىلدى. 75 بالاعا لايىقتالعان بوبەكجايدا قازىر 50 بالا تاربيەلەنىپ جاتىر. بالاباقشادا سابيلەردىڭ الاڭسىز ويناپ، بي بيلەپ، جان-جاقتى قالىپتاسۋى ءۇشىن بارلىق جاعداي جاسالعان.

ءۇش تىلدە ءبىلىم بەرەتىن ورتالىقتا 17 ادام تۇراقتى جۇمىس ىستەيدى. ولاردىڭ ىشىندە پەداگوگ، پسيحولوگ، لوگوپەد ماماندارى بار.

ال ەكىنشى بالاباقشا جارتىتوبە اۋىلدىق وكرۋگىنە قاراستى اققولتىق ەلدى مەكەنىندە اشىلدى. 75 ورىندىق «اسىلجان» بوبەكجايى جەرگىلىكتى تۇرعىنداردى جۇمىسپەن قامتىپ وتىر. مۇندا قازىر 20 ادام ەڭبەك ەتەدى. اۋىل بالاباقشاسى بالالاردى بوبەكجايمەن قامتىپ قانا قويماي، جۇمىسسىزدىق ماسەلەسىن شەشۋگە دە وڭتايلى اسەر ەتكەن.

جالپى، بۇگىندە اۋداندا 43 مەكتەپكە دەيىنگى مەكەمە بولسا، سونىڭ 17-ءسى مەملەكەتتىك، 16-سى جەكەمەنشىككە تيەسىلى. سونىڭ ارقاسىندا وڭىردە بالالاردى بالاباقشامەن قامتۋ 90 پايىزعا جەتكەن.

ايتا وتەيىك، سوزاق اۋدانىنىڭ اكىمى سالىحان پولاتوۆ مەملەكەتتىك-جەكەمەنشىك ارىپتەستىك نەگىزىندە بوي كوتەرەتىن بالاباقشالاردىڭ قۇرىلىسى جالعاسىن تاباتىنىن ايتادى.

Abai.kz