«ۋاقىپ» دەپ اتالعان تاماقتانۋ ورنى اپتانىڭ بەس كۇنىندە جۇمىس ىستەيدى. اسحانا ورتالىق مەشىتتىڭ باستاماسىمەن جانە قايىرىمدى ازاماتتاردىڭ ۇيىتقى بولۋىمەن اشىلعان.

قوعامداعى قارجىلىق جاعدايى قيىن، مۇقتاج جاندارعا ارنالعان اسحانا كۇنىنە 120 ادامعا قىزمەت كورسەتەدى. مۇندا ولاردىڭ ءۇش مەزگىل تەگىن اۋقاتتانۋىنا مۇمكىندىك بار.

قوعامدىق تاماقتانۋ ورنى دۇيسەنبىدەن جۇما ارالىعىندا تاڭعى ساعات 9.00-دەن 10.00-گە دەيىن، تۇسكى ساعات 13.00-دەن 14.00 دەيىن، كەشكى ساعات 17.00-دەن 18.00-گە دەيىن اشىق بولادى.

تەگىن اسحانادان تۇستەنۋگە كەلگەن جاننىڭ ءبىرى –  ەرعالىم ءادىلحانۇلى. كەزىندە جۋرناليستيكا ماماندىعىن ءبىتىرىپ، تالاي ءباسپاسوز بەتىنە ماقالام شىققان دەيدى. الايدا، تاعدىر تالكەگىنە تۇسكەن ازامات ۋاقىتشا قيىن جاعدايدا جۇرگەنىن ايتادى. قاراشانىڭ قارا سۋىعىندا اقىسىز تاماق تاراتاتىن ورىننىڭ اشىلعانىنا قۋانعانىن جاسىرمادى.

قار ءتۇسىپ، كۇن سۋىعاندا جىلى تاماق ءىشىپ، ءال جيناپ الۋ ءۇشىن كەلگەندەر مۇنداي اسحانانىڭ اشىلعانىنا ءدان رازى.

ساۋلەتاي العوجينا، قالا تۇرعىنى:

- تاماقتى ءدامدى دايىنداپ جاتىر. قولدان كەسپەنى جاسايدى. ءبارىن قولدان جاساپ جاتىر.

اسحاناعا كەلگەن ازاماتتارعا داياشىلار قىزمەت كورسەتەدى. ۇيىمداستىرۋشىلار كۇنىنە ءبىر رەت كىرگەن ادامنىڭ ەكىنشى قايتارا كىرۋىنە دە مۇمكىندىك بەرگەن. ولار ورتالىق مەشىت جانىنداعى «ىقىلاس» قايىرىمدىلىق قورىنان الىنعان ارنايى تالوندار ارقىلى تاماقتانا الادى.

ەرمەك كوكىرەكباەۆ، قالالىق ورتالىق مەشىتتىڭ نايب يمامى:

- ءبىر عانا قازاقتىڭ ازاماتى، ءبىر عانا جىگىت ىستەپ جاتقان شارۋا. دەمەۋشى اتىن ايتپاۋدى ءوتىندى. ەندى ورتالىق بولعاننان كەيىن كەلىپ-كەتىم ادام كوپ. سولاردىڭ كوپشىلىگى اسىرەسە، كۇن سۋىعاندا ءبىراز جاعدايلارى ناشارلاپ، مەشىتكە كومەك سۇراپ كەلەدى.

«ادامداردىڭ جاعدايلارى ءار ءتۇرلى عوي. باسقا سالعان ءومىردىڭ تاۋقىمەتى... راحمەتىمدى ايتامىن ەندى، جاۋراعان كەزدە ءبىر ىستىق تاماق ءىشىپ الدەنىپ العان جاقسى عوي. مۇندايدى باسقا سالماسىن», – دەيدى ەرعالىم ادىلحانۇلى.

كۇزدىڭ ىزعارلى سۋىعىندا ىستىق اس ءىشىپ، ءال جيناپ الۋ ءۇشىن كەلگەندەر جاڭا اشىلعان اسحانا قىزمەتكەرلەرىنە ءدان رازى. ءبىرى: «تاماعى جامان ەمەس، بۇگىن ەكىنشى رەت كەلۋىم. مەن نەگىزى، جەتىم اداممىن. جالعىزباستىمىن. تالدىڭ استىندا تۇنەپ جۇرگەن مەن سياقتى پاناسىزدارعا بۇل ۇلكەن كومەك بولدى», – دەسە، ەندى ءبىرى: «مەن ءبىرىنشى رەت كەلىپ تۇرعان جوقپىن. تاماقتارى ءدامدى. وسىنداي شارالار كەرەك دەپ ويلايمىن. مەن ەكى بالامدى جالعىز ءوزىم باعىپ وتىرمىن. العىسىم شەكسىز», – دەپ ريزاشىلىقتارىن بىلدىرۋدە.

«ۋاقىپ» اسحاناسىنا تاماقتانۋعا كەلگەندەر اراسىندا بالالى ايەلدەر مەن مۇگەدەك جاندار كوپ. بۇل ورىننىڭ ماقساتى دا سول – جەتىم-جەسىر مەن جالعىزباستى انالارعا، جاعدايى تومەن وتباسىلارعا ءسال دە بولسا قولداۋ كورسەتۋ.

اسحاناعا كوپبالالى انالار مەن مۇمكىندىگى شەكتەۋلى جاندار كوپتەپ كەلەدى. بۇل ورىننىڭ اشىلۋ سەبەبى دە سول – جەتىم-جەسىر مەن جالعىزباستى انالار جانە جاعدايى تومەن وتباسىلارعا قولداۋ كورسەتۋ. سوندىقتان، ۇيىمداستىرۋشىلار مۇنداي يگى باستامالار كوپكە ۇلگى بولادى، دەپ سەنەدى.

تەگىن تاماقتاناتىن اسحانا سەيفۋللين داڭعىلى مەن راديششەۆ كوشەسىنىڭ قيىلىسىندا ورنالاسقان. بۇل جەرگە كۇنىنە ءبىر رەت كەلىپ اۋقاتتانعان ادامنىڭ سول كۇنى قايتا كەلىپ، تاماق جەۋىنە شەكتەۋ جوق. تەك قولىندا ارنايى تالونى بولسا، جەتكىلىكتى.

Abai.kz