سەنبى, 25 مامىر 2019
ساڭلاق 1998 4 پىكىر 4 قاڭتار, 2019 ساعات 13:22

اسا تالانتتى بوكسشىلارىمىزدىڭ ءبىرى دوپينگپەن ۇستالدى

قازاقستاندىق بوكسشى نازىم يششانوۆا AIBA اياسىنداعى جارىستاردان ەكى جىلعا شەتتەتىلدى.

سايىستان تىس ۋاقىتتا الىنعان دوپينگ-سىنامادا يششانوۆانىڭ قانىنان فۋروسەميد ءىزى تابىلدى. بۇل پرەپارات دوپينگ بولىپ سانالمايدى، بىراق سالماق قۋعا جانە تىيىم سالىنعان دارىلەردىڭ ءىزىن كورسەتپەۋگە كومەكتەسەدى.

وسىلايشا، سپورتشى 2018 جىلدىڭ 26 قاراشاسى مەن 2020 جىلدىڭ 25 قاراشاسى اراسىندا سايىستارعا قاتىسا المايدى.

دەمەك، تالانتتى بوكسشى 2020 جىلعى وليمپيادا ويىندارىنا قاتىسۋ مۇمكىندىگىنەن ايىرىلىپ قالدى. سەبەبى، توكيو وليمپياداسى 24 شىلدەدەن 8 تامىز ارالىعىندا وتەدى.

نازىم 2016 جىلى ريو-دە-جانەيرودا وتكەن وليمپياداعا دا بارا العان جوق. وعان قازاقستان بوكس فەدەراتسياسىنىڭ تۇسىنىكسىز شەشىمى سەبەپ بولدى. انىعى، 2016 جىلى 60 كەلى سالماق دارەجەسىندە ەل چەمپيونى اتانعان نازىم استانادا وتكەن ايەلدەر اراسىنداعى الەم چەمپيوناتىنا (وليمپيادا جولداماسى ساراپقا سالىناتىن) جىبەرىلمەدى. قازاقستان چەمپيوناتىندا توپ جارسا دا الەم بىرىنشىلىگىنە قاتىسا العان جوق. ونىڭ ورنىنا ريمما ۆولوسەنكو (نازىمنان جەڭىلىپ، ەل چەمپيوناتىندا كۇمىس العان) استانادا جولداماعا تالاسقان. الايدا ۆولوسەنكو فەدەراتسيا ارتقان ءۇمىتتى اقتاي العان جوق. استانادا ول ءتىپتى ءبىرىنشى اينالىمنان دا اسا المادى.

ءبارىمىز بىلەتىندەي 2016 جىلعى وليمپياداعا ەلىمىز اتىنان جاننا شەكەربەكوۆا (51 كەلى) مەن داريعا شاكىموۆا (75 كەلى) قاتىسقان بولاتىن. بۇنىڭ سوڭعىسى قولا مەدال الىپ، قازاق قىزدارى اراسىنان شىققان تۇڭعىش وليمپيادا جۇلدەگەرى اتاندى.

ايتا كەتەيىك، يششانوۆا – بوكستان ەلىمىزدىڭ بىرنەشە دۇركىن چەمپيونى،  2013, 2015 جىلدارى جاستار اراسىنداعى الەم بىرىنشىلىكتەرىندە قولا مەدال جەڭىپ العان.

Abai.kz

4 پىكىر