بەيسەنبى, 28 ناۋرىز 2024
ءبىرتۋار 4467 0 پىكىر 10 قاڭتار, 2019 ساعات 10:16

اكەم تۋعان توپىراعىن سۇيۋگە ءازىر ەدى...

كەرەكۋدىڭ اققۋلى مەكەنى تالاي تالانتتى تۋدىرعان كيەلى توپىراق. شارباقتىنىڭ شاڭىن بۇرقىراتا بۇلقىنعان بالانىڭ اتاعى وسىنشا اسقاقتايتىنىن بىلگەن بار ما ەكەن ول كەزدە؟ «دومبىرانىڭ قۇلاعىندا وينايدى» - دەگەن ءسوز تۋرا رۇستەمبەك وماروۆتاي وعلاننىڭ تۋا بىتكەن تالانتىنا  قاراتىپ ايتىلعانداي.  عۇمىرى قىسقا، دەر كەزىندە باعالانباعان تاۋ تۇلعا... ءومىر زاڭدىلىعى دا شىعار. تالانتتى تىرىسىندە باعالامايتىن دا ءوزىمىز. ءتورت قىزدان قالعان جالعىزى قارلىعاش تاريحي توپىراعىنا كەلىپ ءتاۋ ەتتى. ءبىز كوكەيىمىزدى كەزىپ جۇرگەن ساۋالداردى قويىپ ۇلگەردىك.

- قارلىعاش رۇستەمبەكقىزى، اكەڭىز جايىندا ينتەرنەت بەتتەرىندە «ەش» ماعلۇمات جوق. بۇل قالاي بولعانى؟

- تۇسىنەمىن، بىلەمىن، مۇمكىن مەنى دە كىنالايتىندار از ەمەس شىعار. جاس بولدىق پا، اقىلسىز با ەدىك، ايتەۋىر اكەمنەن تاريحقا تاتىرلىق دۇنيەلەرىن دەر كەزىندە جيناپ، كوپشىلىككە ۇسىنىپ كورمەپپىز. اكەمە بايلانىستى «اتتەگەن-اي» دەيتىن تۇستارىم دا جوق ەمەس. بىراق بارلىق ولقىلىقتاردىڭ ورنىن تولتىرىپ جۇرگەن جايىم بار. پاۆلودار قالاسىنداعى مۇراجايلارعا دا بەرگەن قۇندى ماتەريالدار بەردىم . الداعى كۇندە جيناقىلىق تانىتىپ، اكەمدى تاعى ءبىر مارتە ايگىلى ەتەرمىن.

- ديناداي دارابوز كۇيشىنىڭ كوزىن كورگەن تۇلعانىڭ وسال بولماعانى انىق. وسىلىپ العا شىعىپ، الماتىعا دا القىنىپ جەتتى. ءوزىن كورسەتتى، تانىلدى، تامساندىردى. ونەرىن باعالاساق تا، وتباسى جايىندا بىلمەيمىز-اۋ بىراق تا...

- ءتورت تۇياعى – ءتورت قىز ەدىك. تۇڭعىشى ماقپال، ەكىنشىسى گۇلجيان، ءۇشىنشىسى ءشامشى قالداياقوۆتىڭ قۇرمەتىنە ءشامشىنۇر دەپ اتالعان اپكەم، مەن كەنجەسىمىن. تاعدىردىڭ شەشىمىمەن الدىمداعى ءۇش اپكەم دە ورتامىزدان عايىپ بولدى، انامنان جالعىز قالعان مەنمىن. اكەمنىڭ ەكىنشى جۇبايىنان نۇرلان اتتى باۋىرىم بار، بىراق ءومىردىڭ قيسىنسىز وتكەلدەرىندە ونىمەن دە بايلانىسىمىز ءۇزىلىپ، بۇگىنگى كۇنى ءالى دە ىزدەستىرىپ جاتىرمىن. انامنىڭ العاش نەكەسىنەن تۋىلعان ايگۇل اپكەم شىمكەنتتە تۇرىپ جاتىر. وتباسىمىزدىڭ  جالپى كورىنىسى  وسى، ءسىڭلىم.

- اكەڭىز جايىنداعى ەڭ ىستىق، ەڭ ىڭكار، ەڭ جىلى ەستەلىگىڭىز؟

- مەيلى سوعىس ارداگەرى بولسىن، مەيلى اتاعى جەر جارسىن – اكەم وتباسىلىق ومىردە شىنايى ءارى تازا بولاتىن. ءتورت قىزىنىڭ ونى ەركەلەتكەنىن قاتتى قالايتىن. كەزەكتەسىپ باسىنان سيپاپ، شاشىنان تارايتىن ەدىك، ءبىزدى ەركەلەتپەك بىلاي تۇرسىن، ءوزى بىزگە ەركەلەگەندى ۇناتاتىن (تامسانىپ). قوعامدا، كوپشىلىكتە تاۋ تۇلعا، ەڭگەزەردەي ەر بولسا دا ۇيىندە ماحاببات پەن جىلۋلىقتى اڭسايتىن، جانى نازىك ادام ەدى. قازىر سول كەرەمەت كەزدەردى ەسكە الىپ، تۇڭعيىق تا ءتاتتى ويلارعا بەرىلەمىن. شاڭىرامىزعا ونەردىڭ بيىك شىڭىن باعىندىرعان، ءبىر سوزبەن ايتقاندا «ەليتالار» كوپتەپ جينالاتىن. سولاردىڭ كوزىن كورىپ، ايالى الاقاندارىن سەزىنىپ وستىك. احمەت جۇبانوۆ پەن ءشامشى قالداياقوۆ ءبىزدىڭ ۇيگە ءجيى كەلىپ، ادەمى اڭگىمەلەر ءورىپ وتىراتىن. قايران، قايتىپ كەلمەس كەمەل شاقتار-اي. وكىنىشىم دە جوق مەنىڭ. اكەمنىڭ قىزى بولعانىما ماقتانامىن. قاراڭىزشى، بۇگىن مەنى اكەمنىڭ جەرلەستەرى جايراڭ دا جارقىن كوڭىلدەرىن اشىپ قارسى الىپ جاتىر. قاراپايىم بولمىسىما، نازىك يىعىما اكەمنىڭ اتاعىنىڭ ارقاسىندا شاپان ارقالاپ كەتكەلى تۇرمىن. بۇنىڭ ءوزى باقىت ەمەي نەمەنە. مەن تەرەڭ تولقىنىستا تۇرمىن. تىم جاقىن، تىم تۋعان، تىم تىلسىم قۇبىلىس بولىپ جاتىر ىشىمدە. اكەم تۋعان جەرىن جىرعا قوسىپ، ەستەلىكتەرى دە جۇرەگىنەن ەرەكشە ەسىپ وتىراتىن. تۋعان توپىراعىنىڭ – اققۋدىڭ، شارباقتىنىڭ توپىراعىن سۇيۋگە ءازىر ەدى. تاعزىم ەتەر ەدى تىزەرلەپ. مەن دە بۇگىن بويىمنان بۇلقىنىس اتقان اسقاق سەزىمدە تۇرمىن. بۇل ەندى مەنىڭ دە تۋعان جەرىم، مەن ونى بۇگىن انىق اڭعارىپ، شىنايى سەزىنىپ تۇرمىن. جەرلەستەرىمە اسا راحمەتىمدى ايتامىن.

- اكەڭىزدىڭ ونەرىن جالعاستىرۋشى ۇرپاقتارى بار شىعار...

- وكىنىشكە وراي، جوق. سۋرەتشىلەر، باسقا مامان يەلەرى بار، بىراق مۋزىكانتتار جوق. بىراق شوبەرەلەرىنىڭ اراسىنان سۋرىلىپ بىرەۋ شىعاتىن شىعار، وعان كۇمانسىز سەنەمىن. مەن دە ءوز تاراپىمنان اكەم جايىندا ەستەلىكتەر جازىپ، ونى تىڭ تاريحقا اينالدىرۋعا بار كۇشىمدى سالىپ جاتىرمىن. جالپى، 2019 جىلى اكەمنىڭ 100 جىلدىق مەرەيلى مەرەكەسىنە وراي كوپ سىر اشىلىپ، جۇرتشىلىققا جاڭالىق جولدانادى دەگەن نىق سەنىمدەمىن. ونەر وزەۋرەسىن، وكتەم بولسىن، ايتەۋىر ءبىر كۇنى جاندانادى، جارقىرايدى، جالىندايدى. اكەمنىڭ دە ونەرى قايتا جاڭعىرادى، جىلت ەتىپ، جالت قارايدى.

- لايىم سولاي بولسىن! اۋەزدى اڭگىمەڭىزگە راحمەت، قارلىعاش رۇستەمبەكقىزى! ەل-جۇرتىڭىز قاشان دا ەسكەرىپ، ەلەيتىنىن ۇمىتپاسسىز...

اڭگىمەلەسكەن: ەلميرا ابەتجانوۆا

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3532