كەزدەسۋ بارىسىندا مەملەكەت باسشىسىنا ەلىمىزدىڭ سىرتقى ساياساتىن ودان ءارى ەكونوميكالاندىرا ءتۇسۋ جونىندەگى جۇمىس جوسپارى مەن مينيسترلىك الدىندا تۇرعان مىندەتتەردىڭ ورىندالۋى تۋرالى مالىمەت ۇسىنىلدى، دەپ جازادى اقوردانىڭ رەسمي سايتى.

نۇرسۇلتان نازارباەۆ ەلىمىزدىڭ سىرتقى ساياساتىن ەكونوميكالاندىرۋدىڭ جانە سىرتقى ساياسي باعىتىمىزدى ءارى قاراي ءتيىمدى جۇزەگە اسىرۋدىڭ ماڭىزدىلىعىنا توقتالدى.

– كۇن تارتىبىندەگى حالىقارالىق ماسەلەلەردى دە ۇمىتپاۋىمىز كەرەك. سىرتقى ىستەر مينيسترلىگىنىڭ مىندەتى – ەلىمىزدىڭ سىرتقى ساياساتىن جانە بەيبىتشىلىك پەن تاتۋ كورشىلىك ساياساتىن بەلسەندى جۇرگىزۋ. باستاعان ءىسىمىزدىڭ ءبارىن ودان ءارى جالعاستىرۋ قاجەت، – دەدى قازاقستان پرەزيدەنتى.

بەيبىت اتامقۇلوۆ مەملەكەت باسشىسىنا ينۆەستيتسيالىق جوبالاردى ىلگەرىلەتۋ جۇمىستارىنا جۇرگىزىلگەن تالداۋ ناتيجەلەرى مەن مينيسترلىكتىڭ ورتالىق اپپاراتىنىڭ قىزمەتىن قايتا ءتۇزۋ ماسەلەلەرى جونىندە مالىمدەدى.

سىرتقى ىستەر ءمينيسترى قازاقستاننىڭ ديپلوماتيالىق ميسسيالارىن سىرتقى ساياساتتى ەكونوميكالاندىرۋ جونىندەگى جاڭا مىندەتتەرگە سايكەس جۇمىستارعا بەيىمدەۋ ءۇشىن قابىلدانعان شارالار تۋرالى باياندادى، سونداي-اق ەل ەكسپورتىنىڭ باعىتتارىن قايتا قاراستىرۋ ۇدەرىسى جونىندە ايتتى.

ەلباسى كەزدەسۋ قورىتىندىسى بويىنشا بىرقاتار ناقتى تاپسىرما بەردى.

Abai.kz