سارسەنبى, 26 ماۋسىم 2019
46 - ءسوز 1938 26 پىكىر 10 قاڭتار, 2019 ساعات 11:06

بەكزات تۋرالى كينونىڭ 19 جىلدا ءتۇسىرىلىپ بىتپەۋى ۇيات!

اقان ساتاەۆ سەرىك ساپيەۆ تۋرالى كينو تۇسىرەتىن بولىپ، وعان اكتەر ىزدەپ جاتىر عوي. بىراق اۋەلى بەكزات تۋرالى كينو ءتۇسىرىلىپ ءبىتۋى كەرەك ەدى. وتكەندە بەكزات تۋرالى سەريال شىعايىن دەپ جاتىر دەدى. بىراق بەكزات تۋرالى كينونىڭ تولعاعى ءپىسىپ-جەتىلمەي جاتقانىنا قانشا ۋاقىت... بەكزات تۋرالى كينو ءتۇسىرۋ ءۇشىن بەكزات ءتىرى بولىپ، پارلامەنتتە دەپۋتات بوپ وتىرۋى كەرەك پە؟

بەكزات قانشاما جاسوسپىرىمگە ۇلگى بولاتىن تۇلعا ەدى. ونىڭ ءومىرى كينوعا سۇرانىپ تۇر. سول كينوعا بەكزاتتىڭ گيتارامەن ءان سالاتىنى، دومبىرا شەرتەتىنى، گەوگرافيا ءپانىن قىزىعا وقيتىنى، گۇلدى جاقسى كورەتىنى دە قوسىلسا جاقسى ەدى.

مىسالى، ساتاەۆ كوشە اراسىنداعى توبەلەس تۋرالى كينو دا ءتۇسىردى عوي. كوشە اراسىنداعى توبەلەستىڭ كوكەسىن سول بەكزاتتار كورگەن شىعار. تۇركىستاننىڭ انا باسى مەن مىنا باسىنا جاتتىعۋعا جۇگىرىپ بارىپ كەلۋى دە جاسوسكىنگە ۇلگى بولار ەدى. بەكزات ارقىلى تاۋەلسىزدىك العان العاشقى جىلدارداعى قازاق وتباسىلارىنىڭ، قوعامىنىڭ قيىن جاعدايىن دا كورسەتۋگە بولار ەدى. اتتەڭ، قايدا كەتپەي جاتقان اقشا بەكزاتقا كەلگەندە جەتپەي-اق قويدى.

ەگەر ساپيەۆ "بەكزاتتىڭ كينوسى تۇسىرىلمەي، مەن تۋرالى كينو شىققانىن قالامايمىن" دەسە، سەڭ قوزعالار ما ەدى. شىركىن-اي، قازاقتىڭ جىگىتتەرى ءبىر-ءبىرىن قولداپ جۇرسە عوي دەيسىڭ. 

19 جىلدا بەكزات تۋرالى كينونىڭ ءتۇسىرىلىپ بىتپەۋى ۇيات قوي، بىلاي قاراساڭ. وسى امەريكالىقتار، ۇندىستەر جىلت ەتكەن سپورتشىسى شىقسا، ول تۋرالى كەرەمەت كينو ءتۇسىرىپ تاستايدى. اۋزىڭ اشىلىپ وتىرىپ كورەسىڭ. ونى كورگەن بالا سپورتپەن قالاي اينىلىسپاسىن؟! ال بىزدە بولماعىر كومەديالاردى ءتۇسىرىپ، قازاق كينوسىن دامىتىپ جاتىرمىز دەيدى. ىشىندە ساباق الار تۇك بولماسا دا كينوتەاترعا بارىپ كورەمىز. ءومىرى دايىن كينو ادامدار تۋرالى كينو تۇسىرۋگە كەلگەندە قۋراپ قالامىز!

جادىرا نارماحانوۆا

Abai.kz

26 پىكىر