قاراعاندى وبلىسىنداعى ينسپەكتور ەرلان نۇرعاليەۆتىڭ ولىمىنە قاتىستى كۇدىكتىلەر ۇستالدى. بۇل تۋرالى ىشكى ىستەر مينيسترلىگىنىڭ رەسمي وكىلى الماس سادۋباەۆ مالىمدەدى.

"بۇگىن 21 قاڭتاردا قىزىلوردادا ءىىم كريمينالدىق پوليتسيا دەپارتامەنتىنىڭ جەدەل قىزمەتكەرلەرىمەن جۇرگىزىلگەن ارنايى وپەراتسيا ناتيجەسىندە جەكە ۇيلەردىڭ بىرىنەن 13-ءشى قاڭتار كۇنى قاراعاندى وبلىسى، نۇرا اۋدانىنىڭ تەرريتورياسىندا ءوزىنىڭ قىزمەتتىك مىندەتىن اتقارىپ ءجۇرىپ، قازا بولعان "وحوتزووپروم" ءوب" رمقك ينسپەكتورى نۇرعاليەۆ ەرلان بالعابەكۇلىنىڭ ولىمىنە قاتىستى ءۇش كۇدىكتى ۇستالدى", - دەدى سادۋباەۆ.

قازىرگى ۋاقىتتا تەرگەۋ امالدارى جۇرگىزىلىپ جاتىر. كۇدىكتىلەردىڭ ۇشەۋى دە ۋاقىتشا تەرگەۋ يزولياتورىنا قامالعان. سوتقا دەيىنگى تەرگەۋ امالدارى جالعاسۋدا.

ءىىم وسى ءۇش كۇدىكتىگە ىزدەۋ جاريالاعان بولاتىن.

بۇل وقيعا 13 قاڭتار كۇنى قاراعاندى وبلىسى نۇرا اۋدانىنىڭ اۋماعىندا ورىن العان بولاتىن. "وحوتزووپروم" كومپانياسىنىڭ ەكى قىزمەتكەرى بەس كيىكتى جايراتىپ سالعان براكونەرلەردىڭ ىزىنە ءتۇسىپ، ولاردى قۇرىقتاماق بولادى. الايدا زاڭسىز اڭ اتقاندار زاڭعا باعىنبايتىنىن تاعى ءبىر مارتە دالەلدەپ، ينسپەكتورلارعا وق اتقان. ناتيجەسىندە قىزمەتكەرلەردىڭ ءبىرى ەرلان نۇرعاليەۆ اۋىر جارالانىپ، اۋرۋحانادا كوز جۇمعان ەدى.

Abai.kz