اسا كورنەكتى اقىن، بالالار ادەبيەتىنىڭ ءدۇلدۇلى، مۇقاعالي شىعارماشىلىعىنىڭ جىرشىسى ورازاقىن اسقار 84 جاسقا قاراعان شاعىندا دۇنيەدەن وزدى.

قايعىلى حاباردى قر مادەنيەت جانە سپورت مينيسترلىگىنىڭ  ءباسپاسوز قىزمەتى راستادى.

"ورازاقىن اسقار ءبىر ساعات بۇرىن الماتىدا اۋىر ناۋقاستان قايتىس بولدى. اقىننىڭ جاقىندارى مەن تۋىستارىنا كوڭىل ايتامىز. مارقۇمدى شىعارىپ سالۋ مەن جەرلەۋ بويىنشا كەيىنىرەك اقپارات بەرەمىز", - دەپ جاۋاپ بەردى قر مادەنيەت جانە سپورت مينيسترلىگىنىڭ ءباسپاسوز حاتشىسى ايدار قىرىقباي.

اقىنمەن قوشتاسۋ ءراسىمى قازاقستان جازۋشىلار وداعىندا وتەدى.

ورازاقىن اسقار 1935 جىلى 16 مامىردا شىعىس تۇركىستان ولكەسىنىڭ ىلە ايماعىنا قاراستى مۇكەي قاراتاس دەگەن جەردە دۇنيەگە كەلگەن. باستاۋىش ءبىلىمدى سارىبۇلاق مەكتەبىندە الىپ، قۇلجا قالاسىنداعى «ءبىلىم جۇرتى» دەپ اتالاتىن گيمنازيادا وقىعان. 1951 جىلى ءۇرىمشى قالاسىندا اشىلعان ۇلتتار ينستيتۋتىنىڭ ءتىل جانە ادەبيەت فاكۋلتەتىنە ءتۇسىپ، ونىڭ ەكىنشى كۋرسىن اياقتاعاننان كەيىن «شىڭجاڭ گازەتى» رەداكتسياسىنا قىزمەتكە تۇردى. بۇل جىلدارى سول گازەتكە جانە «شۇعىلا» جۋرنالىنا ولەڭدەرى ءجيى جاريالانىپ تۇرعان.

1955 جىلى اتامەكەنى قازاقستانعا كوشىپ كەلىپ، 1961 جىلى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن ءبىتىرىپ شىعادى. 1955 جىلى جارىق كورگەن «قوس جۇرەك» اتتى جاس اقىنداردىڭ ۇجىمدىق جيناعىنا ولەڭدەرى ەنگەن.

ءبىراز جىل قازاق كسر عىلىم اكادەمياسىنىڭ ش. ءۋاليحانوۆ اتىنداعى تاريح، ەتنوگرافيا جانە ارحەولوگيا ينستيتۋتىندا كىشى عىلىمي قىزمەتكەر، ودان كەيىن قازاقستان جازۋشىلار وداعىنىڭ كوركەم ادەبيەتتى ناسيحاتتاۋ بيۋروسىندا نۇسقاۋشى، رەسپۋبليكالىق كىتاپ پالاتاسىندا ءبولىم مەڭگەرۋشىسى، «جالىن» باسپاسىندا اعا رەداكتور بولعان. جىلدار بويى قازاقتىڭ قارا ولەڭىن ەل ىشىنەن جيناپ، ەكى تومىن باستىردى. «ادەبي مۇرا» باعدارلاماسىنا وراي، «الەم بالالار ادەبيەتىنىڭ» قازاق تىلىندەگى ەلۋ تومدىعىن شىعارۋ جۇمىسىنا اتسالىستى.

1996 جىلدان بەرى قازاقستان جازۋشىلار وداعى باسقارماسىنىڭ مۇشەسى. حالىقارالىق "الاش" ادەبي سىيلىعىنىڭ لاۋرەاتى. "ەرەن ەڭبەگى ءۇشىن", "تاۋەلسىزدىكتىڭ 10 جىلى" مەدالدارىنىڭ يەگەرى. مۇقاعالي اتىنداعى سىيلىقتىڭ يەگەرى. پانفيلوۆ اۋدانىنىڭ قۇرمەتتى ازاماتى.

"تۇڭعىش" (1964), "مەيىرىم" (1969), "كۇنگەي" (1975), ء"لايلا" (1977), "كوكوراي" (1979), "بالقاراعاي" (1981), "ساۋلەت" (1984), "تاۋداي بول!" (1984), "بەلجايلاۋ" (1985), "وركەش" (1987), "كەرىمسال" (1991), "باركورنەۋ" (1992), "كەرىمسال" (1994), "جاراپازان" (1995), "وربۇلاق" (2000), "تاۋەلسىزدىك تارتۋلارى" (2001), "وتان دەپ ويانعاندا" (2004), "اتامەكەنگە ورالعاندا" (2005), "قوس قوڭىراۋ" (2005) "التىن ابدىرا" (2007), "ەل ىشىندە" (2008), "بالالارىم - باقىتىم" (2008) اتتى جانە ت.ب. جىر جيناقتارى جارىق كورگەن.

Abai.kz