اۋعان سوعىسىنىڭ اتى اڭىزعا اينالعان ارداگەرى، ارنايى ماقساتتاعى 177-وتريادتىڭ كومانديرى، ەل “قارا مايور”  اتاپ كەتكەن ايگىلى وتستاۆكاداعى پولكوۆنيك بوريس كەرىمباەۆ 12-اقپان كۇنى 71 جاسقا قاراعان شاعىندا دۇنيەدەن ءوتتى.

بوريس توكەنۇلى كەرىمباەۆ 1948 جىلى 12 قاڭتاردا الماتى وبلىسى، جامبىل اۋدانىندا دۇنيەگە كەلگەن. 1970 جىلى تاشكەنت جوعارى اسكەري ۋچيليششەسىن وقىپ بىتىرگەن سوڭ، گەرمانياداعى سوۆەت اسكەرى قاتارىندا قىزمەتىن باستاعان.

1973 جىلى بارلاۋ روتاسىنىڭ كومانديرى بولدى. 1977 جىلى شتاب باسشىسىنىڭ ورىنباسارى، ال، كەيىنىرەك تەمىرتاۋداعى 52 857 اسكەري بولىمىندەگى موتواتقىشتار باتالونىنىڭ كومانديرى بولىپ تاعايىندالدى.

كەرىمباەۆ باسشىلىق ەتكەن ساربازدار ازيالىقتاردان (قازاق، قىرعىز، وزبەك جانە تاجىكتەردەن) قۇرالعاندىقتان “مۇسىلمان باتالونى” اتالىپ كەتكەن. 1989 جىلى وترياد اۋعانستاننان ەڭ سوڭعى بولىپ شىقتى.

بوريس كەرىمباەۆ 1990 جىلداردىڭ باسىندا قازاق سسر ازاماتتىق قورعانىس شتابىنا جۇمىسقا اۋىسىپ، 1992 جىلى پولكوۆنيك شەنىندە وتستاۆكاعا شىققان.

بوريس كەرىمباەۆ باسشىلىق ەتكەن 177-ورتياد ساپىندا گەنەرال-پولكوۆنيك ساكەن ءادىلحانۇلى جاسۇزاقوۆ، گەنەرال-مايور مۇقان ەستايۇلى دۇيسەكەەۆ سياقتى بولاشاق قورعانىس مينيسترلەرى دە بولعان.

2018 جىلى الماتىدا بوريس كەرىمباەۆتىڭ 70 جىلدىعى اتالىپ وتكەن بولاتىن. وندا بوريس كەرىمباەۆ:

“مەن قاراماعىمداعىلاردى بارلاۋعا كوبىرەك ۇيرەتتىم. جۇگىرىپ، اتىسۋعا مۇمكىندىك بولمادى. مەنىڭ باستى مىندەتىم – ولاردى وپەراتسياعا ەرتىپ اپارىپ، ۇيلەرىنە ءتىرى قايتارۋ. ەكى جىل ەكى ايدا مەن 45 ادامدى جوعالتتىم. سوعىس قۇربانسىز بولمايدى ” دەگەن بولاتىن.

ءبىز مارقۇمنىڭ قازاسىنا كوڭىل ايتا وتىرىپ، بوريس كەرىمباۆ تۋرالى تۇسىرىلگەن “ۆوزۆراششەنيە ۆ افگانيستان” ءفيلمىن كورەرمەن نازارىنا ۇسىنامىز.

Abai.kz