رەسەيدىڭ قىرىمدى اننەكسيا جاساپ العانىنا بۇرىنعىسىنشا قارسى ەۋروپا ەلدەرى ماسكەۋدىڭ ءىس-ارەكەتى ۋكراينانىڭ ەگەمەندىگى مەن تەرريتورياسىنىڭ تۇتاستىعىن بۇزادى ءارى الەمدىك قاۋىپسىزدىككە قاتەر توندىرەدى دەپ سانايدى. بۇل تۋرالى ەۋروپا وداعى ەلدەرى بۇۇ قاۋىپسىزدىك كەڭەسىنىڭ ۋكرايناداعى جاعدايعا ارنالعان وتىرىسىندا بىرلەسكەن مالىمدەمە جاسادى.

بۇۇ دونباستاعى جانجالدى رەتتەۋ بويىنشا مينسك كەلىسىمىنىڭ ءساتسىز بولعانىن مويىندايدى. بۇۇ باس حاتشىسىنىڭ كومەكشىسى ميروسلاۆ ەنچا ءتورت جىل بۇرىن جاسالعان كەلىسىم "كوبىنە ورىندالماي وتىر" دەپ مالىمدەدى. ونىڭ ايتۋىنشا، ۋكراينانىڭ شىعىسىنداعى جانجالدى رەتتەۋ جونىندەگى كەلىسسوزدەرگە قاتىسۋشىلاردىڭ "بۇرىنعى ەكپىنى باسەڭدەگەن، ال نەگىزگى تاراپتار كەلىسىمدى بەكىتۋگە قابىلەتسىز نەمەسە قۇلىقسىز". "ەۋروپانىڭ تورىندەگى" بۇل جانجال ءالى تىنشىعان جوق، قۇرباندار ءۇستى-ۇستىنە قوسىلىپ جاتىر دەدى ەنچا. ونىڭ سوزىنشە، جانجال باستالعالى بەرى وعان قاتىسۋشىلار اتىستى دوعارۋ تۋرالى وننان اسا رەت كەلىسىم جاساسقانىمەن ۇزاققا بارماي ونى بۇزعان.

ۋكراينانىڭ شىعىسىندا جانجال باستالعان 2014 جىلدان بەرى ءۇش مىڭنان استام بەيبىت تۇرعىن قازا تاۋىپ، كەمىندە توعىز مىڭ ادام زارداپ شەككەن. لۋگانسك جانە دونەتسك وبلىستارىندا ءبىر جارىم ميلليون ادام بوسقىنعا اينالعان. بۇل تۋرالى بۇۇ باس حاتشىسىنىڭ گۋمانيتارلىق ماسەلەلەر بويىنشا كومەكشىسى ۋرسۋلا ميۋللەر حابارلادى. ونىڭ ايتۋىنشا، 2019 جىلى دونباستاعى جانجالعا قاتىسۋشىلاردىڭ اراسىن ءبولىپ تۇرعان سىزىقتىڭ ەكى جاعىنداعى تۇرعىندارعا گۋمانيتارلىق جاردەم جەتكىزۋگە 162 ميلليون دوللار قاجەت بولادى.

بۇۇ قاۋىپسىزدىك كەڭەسىنىڭ وتىرىسى قارساڭىندا بۇۇ ۋكرايناعا گۋمانيتارلىق كومەك كورسەتەتىن بىرلەسكەن قور قۇرىلعان جاريالادى. قور دونورى رەتىندە قاتىساتىن ۇكىمەتتەر، حالىقارالىق جانە ۇكىمەتتىك ەمەس ۇيىمداردان تۇسكەن جارنا جەرگىلىكتى جەردەگى گۋمانيتارلىق شارالاردى قولداۋعا جۇمسالماق.

Abai.kz