نورماتيۆتىك قۇقىقتىق اكتىلەر ەلەكتروندىق بازاسىندا 13 اقپاندا جاريالانعان بۇيرىق جوباسىندا مينيسترلىكتىڭ 2013 جىلعى 21 ماۋسىمداعى № 138 بۇيرىعىنا بىرقاتار تولىقتىرۋ ەنگىزۋ قاراستىرىلعان.

قۇجات جوباسى بويىنشا، ءىس-شارادان حابار دايىندايتىن جۋرناليست اككرەديتاتسيا بەرۋشى مەكەمەگە جەكە باس كۋالىگىنىڭ كوشىرمەسىن تاپسىرىپ، مەكەمەنىڭ ىشكى ءتارتىبىن ساقتاۋعا جانە مودەراتور بەلگىلەگەن رەگلامەنتتىڭ ساقتالۋىنا جازباشا كەلىسىم بەرۋى جانە جۋرناليست پەن باق اراسىنداعى كەلىسىم-شارتتىق قارىم-قاتىناستىڭ بارىن راستايتىن قۇجات كوشىرمەسىن ۇسىنۋى ءتيىس.

ەگەر جۋرناليستە وسى قۇجاتتار جەتىسپەگەن جاعدايدا نەمەسە ءوتiنiشتiڭ مازمۇنى تالاپتارعا سايكەس بولماسا، سونىمەن بىرگە جيىن، وتىرىستار مەن باسقا دا ءىس-شارالار وتەتىن عيماراتتا جۋرناليستەردى ورنالاستىرۋ مۇمكىندىگى بولماعان جاعدايدا مەكەمە ءجۋرناليستى تىركەۋدەن باس تارتۋى مۇمكىن ەكەنى ايتىلعان.

قۇجات جوباسىندا تىركەگەن ورگاننىڭ ىشكى ءتارتىبىن جانە مودەراتور رەگلامەنتىن بۇزعان ءجۋرناليستى تىركەۋدەن ايىرۋ تۋرالى شەشىم قابىلدانۋى مۇمكىن دەپ جازىلعان.

قولدانىستاعى باق تۋرالى زاڭدا ءجۋرناليستى تىركەۋدەن ايىرۋعا "اككرەديتتەۋ ەرەجەلەرiن بۇزعانى نە ءوزiن اككرەديتتەگەن مەملەكەتتiك ورگانداردىڭ، قوعامدىق بiرلەستiكتەر مەن ۇيىمداردىڭ ار-نامىسى مەن قادiر-قاسيەتiنە نۇقسان كەلتiرەتiن، شىندىققا سايكەس كەلمەيتiن مالiمەتتەردi تاراتۋى" نەگىز بولاتىنى كورسەتىلگەن.

قازاقستان اقپارات جانە كوممۋنيكاتسيالار مينيسترلىگى بۇيرىق جوباسىن 27 اقپانعا دەيىن تالقىلاۋ ءۇشىن قوعام نازارىنا ۇسىنعان.

Abai.kz