ۇلتتىعىمىزدى ۇلىقتايتىن ۇلى مۇرا بولىپ قالعان ءداستۇرلى مۋزىكانى دارىپتەۋدىڭ تاعىلىمى مول.  ويتكەنى مادەنيەت پەن ونەر عانا كەشەگى كۇن مەن بۇگىندى بايلانىستىرىپ، بولاشاققا تەمىرقازىق بولا الادى. سوندىقتان دا  وسكەلەڭ ۇرپاقتىڭ جەزتاڭداي ءانشى، داۋلەسكەر كۇيشىلەردىڭ «سارقىتىن ءىشىپ»، ولاردىڭ اندەرىمەن قۇلاق قۇرىشىن قاندىرۋى ماڭىزدى.

مەملەكەت باسشىسى نۇرسۇلتان نازارباەۆ «ۇلى دالانىڭ جەتى قىرى» ماقالاسىندا ءبىزدىڭ مادەنيەتىمىزدىڭ باي ەكەنىن قاداپ تۇرىپ ايتتى. مىنە، وسى تۇرعىدان العاندا حالقىمىزدىڭ مۋزىكاسىن ناسيحاتتاۋ ارقىلى دالا فولكلورىنىڭ مادەنيەتىن قايتا جاڭعىرتىپ، بويىنا قان جۇگىرتۋگە بولادى.

«نۇر وتان» پارتياسىنىڭ قۇرىلعانىنا 20 جىل تولۋىنا وراي جانە «ۇلى دالانىڭ جەتى قىرى» ماقالاسىندا ايتىلعان يدەيالاردى ىسكە اسىرۋ ماقساتىندا پارتيا باستاماسىمەن «ۇلى دالانىڭ كونە سارىندارى» ءداستۇرلى مۋزىكا فەستيۆالىنىڭ تۇساۋىنىڭ كەسىلۋىن وسىنداي يگى ءىستىڭ باستاماسى رەتىندە قابىلداعان ءلازىم.

ەڭ الدىمەن ءان مەن جىر مەرەكەسى كيەلى سەمەيدەن باستالىپ، ەرتىس-بايان وڭىرىندە جالعاستى. ءتول ونەرىمىزدىڭ مايتالماندارى ۇسىنعان كەشتى قىزىقتاۋ ءۇشىن ج.ايماتاۋىتوۆ اتىنداعى قازاق مۋزىكا-دراما تەاترىنا حالىق كوپ جينالدى.

پاۆلودار وبلىسى اكىمىنىڭ ورىنباسارى مەيرام بەگەنتاەۆ ءسوز الىپ، بۇل كەشتىڭ تاربيەلىك ءمانىنىڭ زور ەكەنىن ايرىقشا اتاپ ءوتتى.

- «نۇر وتان» پارتياسى ۇيىتقى بولىپ، قولعا العان «ۇلى دالانىڭ كونە سارىندارى» فەستيۆالىنىڭ ەستاي، مايرا، ءيمانجۇسىپ، يسا بايزاقوۆتار دۇنيەگە كەلگەن وڭىردە جالعاسىن تابۋى – ءبىز ءۇشىن زور قۋانىش. بۇگىنگى ادەمى كەشتەن ۇلكەن دە، جاس تا ەرەكشە اسەر الىپ، دالا مۋزىكاسىمەن سۋسىنداتىپ قايتارىنا كامىل سەنەمىن. ساحنادا ونەر كورسەتەتىن، ەسىمدەرى ەلىمىزگە ەتەنە تانىس جەزتاڭداي ءانشى، دارابوز كۇيشىلەردىڭ قاتارىنا جەرگىلىكتى جاس ونەرپازداردى دا قوستىق. سول ارقىلى ولاردىڭ شىعارماشىلىعىن شىڭداپ، الدىڭعى بۋىن وكىلدەرىنەن ءتالىم-تاربيە العانىن قالايمىز. دەمەك، پارتيانىڭ باستاماسىنىڭ تىڭدارمان قاۋىمعا دا، جاس ورەندەرگە دە بەرەرى مول، - دەدى م.بەگەنتاەۆ.

«نۇر وتان» پارتياسىنىڭ پاۆلودار وبلىستىق فيليالى توراعاسىنىڭ ورىنباسارى جۇلدىز تايكەباەۆا پارتيانىڭ ۇلتتىق قۇندىلىقتاردى ۇلىقتاۋعا اركەز ءازىر ەكەنىنە توقتالدى.

- ءداستۇرلى مۋزىكا – مول مۇرا. سول ارقىلى قازاق حالقىنىڭ ازاتتىققا جەتۋ جولىن، باستان وتكەرگەن قيىنشىلىقتارىن ايقىن اڭعارۋعا بولادى. قۋانىشتى، شاتتىق پەن باقىتقا تولى كەزدەرىن دە ءان-جىرمەن جەتكىزگەن حالىقپىز. وسىنى ۇمىتپاي، سانامىزدا جاڭعىرتۋ – ازاماتتىق بورىشىمىز. پارتيامىزدىڭ «ۇلى دالانىڭ كونە سارىندارى» فەستيۆالىن ۇيىمداستىرۋ تۋرالى ويىن بىردەن قۇپتاپ، قولداعان ونەرپازدارعا ريزاشىلىعىمىزدى بىلدىرەمىز، - دەدى ج.تايكەباەۆا.

فەستيۆالگە تانىمال ونەر ادامدارى – جىر-تەرمەشىلەر الماس الماتوۆ، جاكەن وماروۆ، ءداستۇرلى انشىلەر ەرلان رىسقالي، شولپان ءدارجانوۆا، گۇلميرا سارينا، كۇيشىلەر باتىرجان مىقتىباەۆ، ارمان جۇدەباەۆ قاتىستى.

- سوڭعى جىلدارى ءتول ونەرىمىزدىڭ ورالۋىنا، جاڭعىرۋىنا، ناسيحاتتالۋىنا زور ءمان بەرىلىپ كەلەدى. سونىڭ ءبىر ايعاعى – ەلىمىزدىڭ بارلىق ءوڭىرىن قامتيتىن وسىناۋ فەستيۆال. بۇگىنگى تاڭدا استاناداعى ۇلتتىق ونەر ۋنيۆەرسيتەتىندە، ت.جۇرگەنوۆ اتىنداعى ۇلتتىق ونەر اكادەمياسى مەن قۇرمانعازى اتىنداعى كونسەرۆاتوريادا ءداستۇرلى ءاننىڭ تاريحىن، ورىندالۋ مانەرىن ۇيرەتەتىن فاكۋلتەتتەر بار. بۇل باعىتتاعى جۇمىس وڭىرلەردە دە اتقارىلىپ جاتقانىنا كۋامىز. ەستاي، يسا، جاياۋ مۇسا مەن مايرا تۋعان ولكەنىڭ ۇرپاقتارى ءان سالىپ، كۇي تارتپاۋى، تىڭدارمانى ءتول ونەردى ۇناتپاۋى مۇمكىن ەمەس. دالا فولكلورى ولارعا جات ەمەس. سارىارقانىڭ كەڭ دالاسىنداعى، ەرتىس وزەنىنىڭ جاعاسىنداعى شاھارداعى بۇگىنگى كەشتە وسىعان كوزىمىز انىق جەتتى، - دەگەن ويىن ءبىلدىردى قر ەڭبەك سىڭىرگەن قايراتكەرى الماس الماتوۆ.

«ۇلى دالانىڭ كونە سارىندارى» ءداستۇرلى مۋزىكا فەستيۆالىندە بەلگىلى ونەر مايتالماندارىنان بولەك، پاۆلودار وبلىسىنىڭ تانىمال اعا بۋىن وكىلدەرى، يسا بايزاقوۆ اتىنداعى وبلىستىق فيلارمونيا ونەرپازدارى مەن مۋزىكا مەكتەبىنىڭ وقۋشالار، كوللەدج ستۋدەنتتەرى ونەر كورسەتتى. ولاردىڭ قاتارىندا مەدىعات ماناپ، سەرىك سىزدىقوۆ، اسەل ارىنوۆا، ءنازيرا ومار، ارحات قايراتۇلى، جانبولات بايسولتان، «ەركەناز» ءانسامبلى بار. زالعا جينالعان كوپشىلىك ەستايدىڭ، كەنەن ازىرباەۆتىڭ، مايرانىڭ اندەرىن، قۇرمانعازىنىڭ كۇيلەرىن، مايلىقوجانىڭ جىر-تەرمەلەرىن تىڭداپ، سۋسىندادى. دومبىرا، سىبىزعى، سىرناي، جەتىگەن سىندى ۇلتتىق اسپاپتاردىڭ سۇيەمەلدەۋىمەن ورىندالعان شىعارمالار ەرەكشە اسەرلى بولدى.

- شىنى كەرەك، بۇعان دەيىن ءداستۇرلى ءاندى دەن قويىپ تىڭداماپپىن. فەستيۆال بارىسىندا تىڭداعان اندەرىمنىڭ استارىندا تەرەڭ ءمان-ماعىنا جاتىر ەكەن. تۋعان جەردى ءسۇيۋ، اتا-اناعا قۇرمەت تاقىرىبىن ارقاۋ ەتكەن شىعارمالاردان اتا-بابالارىمىزدىڭ بىزگە وسىدان سان عاسىر بۇرىن سارا جول سالىپ كەتكەنىن ۇعىندىم. ءتىپتى، كوزىمە جاس العان كەزدەر دە بولدى. ەندى دالا فولكلورىن ىزدەپ ءجۇرىپ تىڭدايتىن بولامىن، - دەيدى س.تورايعىروۆ اتىنداعى پاۆلودار مەملەكەتتىك ۋنيۆەرسيتەتىنىڭ ستۋدەنتى البينا اسقار.

ونەرپازداردىڭ شىعارماشىلىعى قالىڭ كوپشىلىكتىڭ كوڭىلىنەن شىققانى ىستىق ىقىلاسىنان بايقالىپ تۇردى. پاۆلودارلىق كورەرمەن قاۋىم وسىنداي رۋحاني كەشتەردىڭ ءجيى ۇيىمداستىرىلعانىن قالايدى.

قۇندىز قابىلدەنوۆا، پاۆلودار

Abai.kz