ەلوردادا كوپبالالى وتباسىلارعا كەلەشەكتە ساتىپ الۋ قۇقىعىمەن پاتەرلەر جالعا بەرىلەدى. بۇل تۋرالى بۇگىن قالا حالقىنىڭ الدىندا ەسەپ بەرگەن استانا اكىمى باقىت سۇلتانوۆ ايتتى.

«نەگىزگى ەسەپتى باستاماس بۇرىن، جاقىندا عانا كۇللى قازاقستاندىقتاردىڭ قابىرعاسىن قايىستىرعان قايعىلى جاعدايعا قاتىستى بىرەر پىكىر بىلدىرسەم دەيمىن. بەس ءبۇلدىرشىننىڭ قازاسى ءبارىمىزدىڭ ەڭسەمىزدى ءتۇسىرىپ، كوڭىلىمىزگە قاياۋ سالدى. وسى ءبىر وقيعا كوپبالالى انالاردىڭ ماسەلەسىمەن قاتار، باسقا دا قوردالانعان الەۋمەتتىك پروبلەمالاردىڭ بار ەكەنىن كورسەتتى. جاسىرمايمىز، قاۋىپسىزدىك تۇرعىسىندا جەدەل شەشۋىمىز كەرەك تۇيىتكىلدەر بار. ەندەشە، ءبىزدىڭ باستى مىندەتىمىز - وسى كەدەرگىلەردى جويۋ جانە مۇنداي قايعىلى جاعدايلاردىڭ قايتالانۋىنا جول بەرمەۋ»، - دەدى قالا باسشىسى.

وسى رەتتە اكىم  قالا تۇرعىندارىنىڭ كوپشىلىگىن الاڭداتقان باسپانا ماسەلەسىن شەشۋ مەحانيزمىن قاراستىرىپ جاتقاندىقتارىن ايتتى.

«ونىڭ ىشىندە، كوپبالالالى انالارعا پاتەرلەردى جالعا بەرەتىن بولامىز. جالعا بەرىپ قانا قويماي، ونى بىرتە-بىرتە ساتىپ الۋىنا مۇمكىندىك جاسايمىز. ياعني، ەندى اي سايىنعى ماڭداي تەرمەن تاپقان قارجىنى پاتەر يەسىنىڭ قالتاسىنا سالمايدى. ونى تۇبىندە مەنشىگىنە وتەتىن ءوز شاڭىراعىنا قۇياتىن بولادى»، - دەدى ب.سۇلتانوۆ.

دەرەككوز: قازاقپارات

Abai.kz