كەزدەسۋ بەيسەنبى كۇنى جوسپارلانعان ۋاقىتتان بۇرىن ءبىتىپ قالعان. "ەكى ەل وكىلدەرى كەلىسسوزدەردى كەيىن جالعاستىرادى" دەلىنگەن مالىمدەمەدە.

جوسپار بويىنشا، ترامپ پەن كيم قۇجاتتارعا قول قويۋ سالتاناتىن وتكىزىپ، بىرگە تۇسكى اس ءىشۋى كەرەك ەدى، بىراق ولاردىڭ ءبىرى دە ورىندالمادى. ترامپ پەن كيم چەن ىن كەلىسسوزدەر وتەتىن ورىننان كەتكەن.

سامميت قورىتىندىلارىنا ارنالعان ءباسپاسوز كونفەرەنتسياسىندا ترامپ يادرولىق قارۋدان تولىق باس تارتۋ ءۇشىن پحەنيانىڭ سولتۇستىك كورەياعا سالىنعان سانكتسيالاردىڭ بارلىعىن الىپ تاستاۋ تۋرالى تالابى كەلىسسوزدەرگە كەدەرگى كەلتىرگەنىن مالىمدەدى. قۇراما شتاتتار پحەنياننىڭ بۇل تالابىن ورىنداۋدان باس تارتقان.

دەگەنمەن ترامپ، اقش مەملەكەتتىك حاتشىسى مايك پومپەو دا كحدر-عا قاتىستى كەلىسسوزدەردەن ناتيجە شىعاتىنىنا ۇمىتتەنىپ وتىر. پومپەونىڭ ايتۋىنشا، بۇل سامميت سوعان ءبىر قادام جاقىنداتتى، بىراق كوزدەگەن ماقساتقا جەتۋ مۇمكىن بولمادى. ترامپ كيممەن "دوستىق" قارىم-قاتىناس ساقتالعانىن اتاپ وتكەن.

اقش پرەزيدەنتىنىڭ ايتۋىنشا، كحدر باسشىسى وعان زىمىراندىق-يادرولىق سىناقتار وتكىزبەۋگە ۋادە بەرگەن.

بەيسەنبى - ترامپ پەن كيم كەزدەسۋىنىڭ ەكىنشى كۇنى - پحەنياننىڭ يادرولىق قارۋدان باس تارتۋى ماسەلەسى تالقىلاندى. كەزدەسۋ قارساڭىندا ترامپ "وڭ كەلىسىم" قابىلداۋعا اسىقپايتىنىن ايتقان. "قارىم-قاتىناس جاقسى بولسا، ونىڭ بەرەرى كوپ بولادى", - دەپ مالىمدەگەن اقش پرەزيدەنتى. كيم چەن ىن بۇل كەزدەسۋگە بۇكىل الەم كوز تىگىپ وتىرعانىن، ونىڭ بىرقاتارى "فانتاستيكالىق فيلم" سيۋجەتىنە ۇقسايتىنىن ايتقان.

بەيسەنبى كۇنى كەلىسسوزدەرگە بەس ساعات بولىنگەن، بىراق كەزدەسۋ بار بولعانى ءۇش ساعات جالعاستى. بۇل - اقش پەن كحدر اراسىنداعى ەكىنشى سامميت. العاشقى كەزدەسۋ وتكەن جىلى ماۋسىم ايىندا سينگاپۋردە وتكەن. سول كەزدە سولتۇستىك كورەيا ءوز قاۋىپسىزدىگىنە اقش كەپىلدىك بەرگەن جاعدايدا، يادرولىق قارۋدان باس تارتۋعا كەلىسكەن. بىراق كەيىن اقپارات قۇرالدارى كحدر-دىڭ يادرولىق سىناقتارىن جالعاستىرعانىن حابارلاعان.

Abai.kz