قازاقستان، الەمنىڭ كوپتەگەن ەلدەرىندەگىدەي، اسىعىس تۇردە تۇركياعا باعىتتالعان بارلىق تۋرلاردى ەۋروعا اۋىستىرۋدا. ەسكە سالا كەتەيىك، كورشى رەسەيلىك تۋروپەراتورلار مەن تۇرىك قوناق ۇيلەرى وتكەن جىلدىڭ قاراشا ايىندا جاپپاي ەۋروعا اۋىسا باستادى. وسىعان وراي، قازاقستاندا 1 قاڭتاردان باستاپ تۇركياداعى جازعى ماۋسىمعا ساپارلار قوناق ءۇي كلاسىنا بايلانىستى 10-نان 20 پايىزعا دەيىن كوتەرىلدى. بىراق، تۋريستەر اسىرەسە بۇل وزگەرىستەردى تەك جازعى دەمالىستاردا عانا ەرەكشە سەزىنەتىن بولادى، دەپ حابارلايدى «تۋريستىك قامقور» كورپوراتيۆتىك قورىنىڭ ءباپاسوز قىزمەتى.

وسىلايشا، قازىر تۇركياداعى دەمالىس قۇنى دوللارعا ەمەس، ەۋروعا باعىنىشتى بولىپ قالدى. تولەم بۇرىنعىداي تەڭگەمەن جۇرگىزىلەدى، بىراق سودان كەيىن ەۋروعا اۋدارىلادى. ەسەپ ايىرىسۋ ۆاليۋتاسىن وزگەرتۋدىڭ نەگىزگى سەبەپتەرىنىڭ ءبىرى - ساياسي اسپەكت. الايدا، رەسمي سبەپ رەتىندە، كوپتەگەن تۇرىك قوناق ۇيلەرىنىڭ ەۋروپالىق نارىققا سايكەستەندىرىلىپ، ەۋرونىڭ ەسەپتەۋ ۆاليۋتاسى رەتىندە «تۇراقتى جانە جۇمساق» بولۋىمەن تۇسىندىرىلۋدە.

بىلتىرعى باعالار بويىنشا تۋريستىك جولدامالاردى ساتىپ الۋ ەرتەرەك برونداۋ اكتسيالارى بارىسىندا عانا مۇمكىن بولدى، ياعني 28 اقپانعا دەيىنگى مەرزىمگە دەيىن. وسىعان دەيىن حابارلاعانىمىزداي، قازاقستان ءۇشىن بارىنەن دە دەمالۋعا لايىقتى ەلدەر اراسىندا تۇركيا ءبىرىنشى ورىنعا شىققان ەدى (2018 جىلى 148 مىڭ قازاقستاندىق تۋريست دەمالعان). بارلىعى وتكەن جىلى شەتەلدە 343 مىڭ قازاقستاندىق دەمالىپ قايتتى.

تۇركيامەن تەك مىسىر باسەكەلەسە الادى. وتكەن جىلدىڭ قورىتىندىسى
بويىنشا قازاقستاندىقتاردىڭ اراسىندا ەڭ تانىمال ەكىنشى ەل - فاراوندار ەلى بولدى - 104 مىڭ وتاندىق تۋريست دەمالىپ قايتتى.

سونىمەن قاتار، قازاقستاننىڭ تۋروپەراتورلار قاۋىمداستىعىنىڭ پرەزيدەنتى يننا رەي ناۋرىز مەيرامى كەزىندە جاقىن ماڭداعى ەلدەرگە بارىپ دەمالۋدى
ۇسىنادى. ويتكەنى، جول ءاردايىم قوسىمشا قيىندىق تۋعىزاتىنى انىق.

«كوكتەمگى مەرەكە - ناۋرىز مەيرامىن جوعارى دەڭگەيدە وتكىزەتىن كەرەمەت
ورىندار رەتىندە وزبەكستان مەن ەلىمىزدىڭ وڭتۇستىگىندەگى شىمكەنتتى ۇسىنار
ەدىم. بۇل ەكى جەردە دە كوكتەمگى مەرەكە اسا جوعارى دەڭگەيدە اتالىپ وتەدى. ەش وكىنبەيسىزدەر، ونىڭ ۇستىنە اۋا رايى دا وتە قولايلى بولماق. بىراق، ەگەر ءبىراز دەمالىس كۇندەرىن الىپ، كوبىرەك دەمالۋعا مۇمكىندىك بولسا، اراب امىرلىكتەرى مەن ەگيپەتتە جايباراقات بوي جازىپ، دەنساۋلىعىڭىزدى تۇزەپ، تەڭىز سۋىنا شومىلۋعا نە جەتسىن»، - دەدى ي.راي.

قايدا دەمالۋعا بارساڭىز دا، جولعا شىقپاس بۇرىن، جولدامانى ساتىپ الماس
بۇرىن، ەڭ باستىسى، تۋراگەنتتەن تۋركودتى تالاپ ەتۋدى ۇمىتپاڭىز. تۋركود دەگەن نە؟ تۋركود 11-13 ءارىپ-تسيفرلىق سيمۆولدان تۇرادى (شىعۋ ەلىنە  قاراي). ول ءار جولدامانى رەسىمدەگەن كەزدە اۆتوماتتى تۇردە بەرىلەدى. بۇل كود ءار تۋريست ءۇشىن بىرەگەي بولىپ تابىلادى. شۇعىل جاعداي تۋىنداعان كەزدە تۋريست قورمەن بايلانىسقا شىعادى، ءوز تۋركودىنىڭ ءنومىرىن حابارلايدى جانە الداعى 24 ساعات ىشىندە جەدەل كومەكتى كۇتەدى.

شىعۋ ءتۋريزمى سالاسىندا قازاقستان رەسپۋبليكاسى ازاماتتارىنىڭ قۇقىقتارىنا كەپىلدىك بەرۋ جۇيەسى پايدا بولعان ساتتەن باستاپ جۇيە باسقارۋشىسى – «تۋريستىك قامقور» كورپوراتيۆتىك قور (كق) شەتەلگە دەمالۋعا شىققان قازاقستاندىقتار ءۇشىن 630 مىڭ تۋركود بەردى جانە ولاردىڭ بارلىعى امان- ەسەن دەمالىپ، ەلگە ورالدى.

«تۋريستىك قامقور»
كورپوراتيۆتىك قورىنىڭ
ءباپاسوز قىزمەتى

Abai.kz