"ايەل دەگەن ادەمى عوي، ادەمى، ادەمىلىك بىزگە كوپتىك ەتپەيدى"...
ءدۇيىم دۇنيەنىڭ، جالپاق جالعاننىڭ بار اسىلىن، بار عالاماتىن سىيلاساق تا، انا مەن ايەل زاتىنىڭ الدىنداعى قارىزىمىز وتەلمەس. انا – جانىمىزدىڭ ءبىر بولشەگى ىسپەتتى. ايەل – سىرلاسىمىز. قينالعاندا، قۋانعاندا ەسىمىزگە ەڭ الدىمەن ابزال انا، اياۋلى جار تۇسەدى. انادان تۋعان اقىندار ەڭ اسىل سوزدەردى اناعا ءھام ارۋعا ارناعان! "اقىننىڭ ءسوزى – حالىقتىڭ ءسوزى".
8 ناۋرىز مەرەكەسىندە عازيز اناعا ارنالعان ولەڭ شۋماقتارىن وقي وتىرايىق. 8 ناۋرىز مەيرامى قۇتتى بولسىن، ارۋلار!
Abai.kz اقپاراتتىق پورتالى
اقىن جارى لاشىنمەن
مۇقاعالي ماقاتاەۆ
ايەلدەر-اي!
ايەلدەر-اي!
قاندايسىڭ؟!
ادەمى بوپ كەتىپسىڭ عوي ارقايسىڭ.
بىرەۋ جەرىپ تۇرسا-داعى قالمايسىڭ،
بىرەۋ ءسۇيىپ تۇرسا - داعى بارمايسىڭ.
ايەلدەر - اي!
ءايايلار - اي، قاندايسىڭ؟!
ايەلدەر - اي!
ءايايلار - اي، قۋلار - اي،
جانارلاردىڭ جاۋىن الىپ تۇرعانى - اي!
بىلە تۇرا بۇيرەكتەرىڭ بۇلك ەتىپ،
كەتەسىڭدەر تىڭداي تۇرا، تىڭداماي.
ايەلدەر - اي!
ءايايلار - اي، قۋلار - اي!
... ايەلدەردى ەركەكتەردەن كوپ دەيدى.
ويباي،
ويباي!..
بولا بەرسىن كوپ، مەيلى!
ايەل دەگەن ادەمى عوي، ادەمى،
ادەمىلىك بىزگە كوپتىك ەتپەيدى...
اقىن جارى كۇلتايمەن
تۇمانباي مولداعاليەۆ
ايەلدەردىڭ كۇنى دەيدى بۇل كۇندى،
باقتار جايناپ، سايراتادى بۇلبۇلدى.
ەركەك تۇگەل ەركەلەرگە بەرەم دەپ،
قولدارىنا ۇستاپ اپتى ءبىر گۇلدى.
وسىناۋ كۇن – بەدەلى ءبىر وسكەن كۇن،
جۇرتتىڭ ءبارىن مەن وزىمە دوس كوردىم.
قاي قياعا جۇمساسا دا باراتىن،
ايەلدەرگە انتىن بۇزباس اسكەرمىن.
ۇمىتىلماي سوناۋ جاستىق كەزدەگى
ايتىلادى ماحابباتتىڭ سوزدەرى.
گۇلدى ەرەكشە ۇناتادى ايەلدەر،
گۇلدەرگە ۇقساپ تۇرعاننان سوڭ وزدەرى.
كوكتەم الدى الاتاۋدىڭ ءوڭىرىن،
تاڭمەن بىرگە انگە باستى بەك ءىنىم.
ءبىر شوق گۇلدى مەن دە كەلەم كوتەرىپ،
كۇلتايىمنىڭ الايىن دەپ كوڭىلىن.
اقىن ايەلى باقىتجامالمەن
ءجۇرسىن ەرمان
قاي جەردە، مەيلى، قاي ەلدە،
الەمنىڭ ءمانى - ايەلدە.
مىقتىمىن دەسەڭ ويىڭدى،
ايەلگە بارىپ دالەلدە.
ايەلسىز ايتپان ءاندى مەن،
ايەلمەن ءدامدى اڭگىمەم.
سۇيكىمدى بولساڭ شىنىمەن،
ايەلىڭ ءسۇيسىن الدىمەن.
ايەلگە ءمالىم كوپ سىرىڭ،
سۇرىنسەڭ - ايەل دەپ ءسۇرىن.
حالىققا سىيلى بولمايسىڭ،
ايەلگە بولساڭ جەكسۇرىن.
ايەلسىز قوندى باق قاشان،
ايەل دەپ تۇستىك وتقا سان.
الەمنىڭ ءتىلىن تاپپايسىڭ،
ايەلدىڭ ءتىلىن تاپپاساڭ!
انانىڭ سورىپ ەمشەگىن،
باسىلعان تالاي كەلسەگىڭ.
بادىك بوپ ءومىر كەشەسىڭ،
بەرمەسە ايەل جەنشەنىن.
بولماسىن ايەل نازالى،
بولماسىن ايەل جازالى.
كەۋدەسىن قاققان تالايدىڭ،
ايەلدەن بولعان اجالى!
ايەلدەن ىستىق وت بار ما؟
ايەل دەپ تۇستىك كوكپارعا.
قارعاعىڭ كەلسە بىرەۋدى،
ايەلىڭ ءولسىن دەپ قارعا.
ايەلمەن قۇنىڭ ولشەنەر،
قۇدايدان كەيىن سول - شەبەر.
باقىتتى سەن دە بولمايسىڭ،
ايەلىڭ سورلى بولسا ەگەر.
سىرىڭدى سوعان اشاسىڭ،
ءشولىڭدى سودان باساسىڭ.
ادامنىڭ كۇنى - ايەلمەن،
ايەلدەر ماڭگى جاساسىن!
اقىن ايەلى شاكي-بانۋمەن
مارالتاي رايىمبەكۇلى
قىزىلدى كورسە،
تاماعى كەنەت بۇلكىلدەپ،
قيادا قىران قاناتىن
قومداپ سىلكىنبەك.
جۇرەكتە تەربەپ سەزىمنىڭ
نازىك تامىرىن،
بۇرالىپ باسىپ قىزعالداق
ارۋ ۇلپىلدەپ،
بارادى، انە! كوشەدە ولەڭ تەرىپ مەن
كوز الا الماي كەلەمىن اسەم كورىكتەن.
العا وزىپ كەتكەن ۋاقىتىم
سىندى بۇرىلىپ،
قيىلىپ سەن دە قارادىڭ،
قارعام نەلىكتەن؟
اققۋدىڭ ەركە ەلەسى بولىپ
اي قاباق،
باراسىڭ قايدا ەركىمدى مەنىڭ
بايلاپ اپ؟
لۇپىلدەپ مەندەي تۇر ما ەكەن
الدە جۇرەگىڭ،
ارمان-اۋ، شىركىن،
كورسەمشى ءبىر ءسات ايمالاپ.
ءىلىپ-اق تۇسەر لاشىنى ەدىم
تاۋ-قۇزدىڭ،
نازاردى قالاي نازىڭا،
قالقام-اۋ، اۋعىزدىڭ؟
تىلىمدە ەرىپ بارادى جالعىز
بالداي ءسوز:
- مەرەكەڭىزبەن!!!
(سەگىزى ەرتەڭ ناۋرىزدىڭ!)
Abai.kz
