ءجۋرناليستىڭ قىرعىزستانعا قايتا ورالۋعا قاتىستى ساۋالىنا ول "كەدەرگى جوق" دەپ جاۋاپ بەرگەن. "باسەكەلەستەرىم مەنىڭ جاعدايىم جاقسارىپ، جاقىندا قايتىپ ورالۋىم مۇمكىن ەكەندىگىن سەزەدى، سول سەبەپتى ماعان قارسى اقپاراتتىق شابۋىلدار جاساي باستادى. جاقىندا كەيبىر اقپارات قۇرالدارى مەنى "جەرلەپ" تاستادى", - دەپ مالىمدەدى اقاەۆ.

"دەگەنمەن اتامباەۆ (قىرعىزستاننىڭ بۇرىنعى پرەزيدەنتى) بيلىگى كەزىندە مەن ەكى باۋىرىمدى جەرلەۋ ءۇشىن قىرعىزستانعا كەلە المادىم. مەنى اۋەجايدا ۇستايتىندارىن ەسكەرتكەن. جەەنبەكوۆ كومانداسىنان مەن مۇنداي قوقان-لوقى ەستىمەدىم", - دەدى بۇرىنعى پرەزيدەنت.

اسقار اقاەۆ – قىرعىزستاننىڭ تۇڭعىش پرەزيدەنتى. ول 1991-2005 جىلدار ارالىعىندا مەملەكەت باسقاردى. 2005 جىلى 24 ناۋرىزدا ول حالىق كوتەرىلىسى كەزىندە ەلدەن قاشىپ كەتتى. ونىڭ بيلىكتەن تايدىرىلۋىن "قىزعالداق توڭكەرىسى" دەپ اتادى.

Abai.kz