قر پرەمەر-ءمينيسترىنىڭ ورىنباسارى گۇلشارا ابدىقالىقوۆا باستاعان ۇكىمەتتىك كوميسسيا كوپبالالى وتباسىلارمەن كەزدەستى، دەپ حابارلايدى قازاقپارات اتىراۋ وبلىستىق وڭىرلىك كوممۋنيكاتسيالار قىزمەتىنە سىلتەمە جاساپ.

بۇگىن اتىراۋ وبلىسىنا جۇمىس ساپارىمەن كەلگەن ۇكىمەتتىك كوميسسيا جۇمىسىن جالعاستىردى. رەسپۋبليكالىق «الەۋمەتتىك قامقورلىق» باعدارلاماسى اياسىندا قر پرەمەر-ءمينيسترىنىڭ ورىنباسارى گۇلشارا ابدىقالىقوۆا ايماقتاعى كوپبالالى وتباسىلارمەن كەزدەستى. ۇكىمەتتىك كوميسسيا تورتتەن سەگىز بالاعا دەيىن تاربيەلەپ وتىرعان كوپبالالى وتباسىلارعا باردى. مىسالى،  كوپبالالى انا زۋلفيا قايىروۆا التى بالا تاربيەلەپ وتىر. وتباسى ايىنا 45 مىڭ تەڭگەگە شاعىن جەكە ءۇيدى جالعا العان. «كۇمىس القا» يەگەرى قازىر دەكرەتتىك دەمالىستا. زۋلفيانىڭ جولداسى جۇرگىزۋشى بولىپ جۇمىس ىستەيدى،  جالاقىسى - 150 مىڭ تەڭگە. مەملەكەتتەن الاتىن جاردەماقىلاردى قوسا ەسەپتەگەندە وتباسىنىڭ جالپى تابىسى باسپانا الۋ ءۇشىن قاراجات  جيناۋعا جەتپەيدى.

ۆيتسە-پرەمەر گۇلشارا ابدىقالىقوۆا كوپبالالى اناعا اتاۋلى الەۋمەتتىك كومەك پەن تۇرعىن ءۇي كومەگىن الۋ ەرەجەلەرىن ءتۇسىندىرۋ كەرەكتىگىن ايتتى. زۋلفيانىڭ وڭىردەگى «ىسكەر انا» جوباسىنا قاتىسۋى وتباسىلىق جاعدايدىڭ جاقسارۋىنا سەپتىگىن تيگىزبەك.

«كۋرسقا قاتىسۋ ارقىلى جاڭا ماماندىقتى مەڭگەرىپ قانا قويماي، وزىڭىزگە ۇناعان كەز كەلگەن ماماندىق بويىنشا قايتا وقۋعا بولادى. الداعى كۇندەرى جەكە كاسىپ اشۋعا ءبىر رەتتىك قايتارىمسىز اقشالاي سەرتيفيكات بەرۋدى باستايمىز. مامىر ايىنان باستاپ كوپ بالالى وتباسىلارعا جالعا بەرىلەتىن ءۇي،  ءتيىمدى شارتتارمەن يپوتەكالىق نەسيە بەرىلەدى،  وسى شارالار ەلدىڭ ءال-اۋقاتىن كوتەرىپ، پروبلەمالاردى شەشەدى دەگەن سەنىمدەمىز»، - دەدى گۇلشارا ابدىقالىقوۆا.

ۇكىمەتتىك كوميسسيا بارعان كوپبالالى وتباسىلاردىڭ باسىم بولىگىن تۇرعىن ءۇي ماسەلەسى،  جۇبايلاردىڭ ءبىرىنىڭ جۇمىسى بولماۋى، مەملەكەتتىك قولداۋ تۋرالى ناسيحاتتىڭ ازدىعى تولعاندىردى. اۋىلدان كوشىپ كەلگەندەر ءۇشىن قالاعا تىركەۋگە تۇرۋ ماسەلەسى وزەكتى.

ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆ ءار ايەلمەن جەكە سويلەسىپ، جەڭىلدىكتەر مەن الەۋمەتتىك تولەمدەر تۋرالى ءتۇسىندىردى.

«اتىراۋ وبلىسىنا مەملەكەت باسشىسىنىڭ تاپسىرماسىمەن جاڭا الەۋمەتتىك رەفورمانى ءتۇسىندىرۋ ماقساتىندا كەلدىك. «الەۋمەتتىك قامقورلىق» باعدارلاماسىنىڭ ارقاسىندا ەشبىر وتباسى نازاردان تىس قالمايدى، وسى ماقساتتا رەسپۋبليكالىق بيۋدجەتتەن قاراجات ءبولىنىپ وتىر. ءبىزدىڭ مىندەتىمىز - ءار قازاقستاندىقتىڭ مەملەكەتتەن ناقتى كومەك الۋىن قامتاماسىز ەتۋ»،-دەپ اتاپ ءوتتى بەردىبەك ساپارباەۆ.

جۇمىس ساپارىنىڭ سوڭىندا  قر پرەمەر-ءمينيسترىنىڭ ورىنباسارى گۇلشارا ابدىقالىقوۆا مەن بەردىبەك ساپارباەۆ ازاماتتاردى قابىلدادى. كوپبالالى انالار ءتيىستى الەۋمەتتىك تولەمدەر تۋرالى، الەۋمەتتىك وسال توپتاعىلار  مەملەكەتتىك قولداۋ شارالارى تۋرالى مالىمەت الدى.

Abai.kz