دۇيسەنبى, 23 قىركۇيەك 2019
دەپ جاتىر 1826 5 پىكىر 19 ناۋرىز, 2019 ساعات 11:35

بيلىكتەگى ءبىر تىلدىلىكتى جوياتىن ۋاقىت جەتتى

جۇرتتىڭ ءبارى قازاق ءتىلىنىڭ نەگە ءوز توپىراعىندا وركەن جايماي وتىرعانىن بىلە الماي دال بولۋدا. ەلىمىزدە تۇراتىن جۇرتتىڭ 60 پايىزى كۇندەلىكتى تۇرمىستا قولدانىپ، 80 پايىزى ۇعىناتىن، تەك 20 پايىزى  عانا كەرەك ەتپەيتىن قازاق ءتىلى نەگە دارمەنسىز؟

وسى ورايدا بارشا قازاقساتاندىقتاردىڭ ساناسى مەن جادىنا رف گەوساياساتىنا تاۋەلدى باق ءۇش ءميفتى ءسىڭىرىپ ۇلگەردى. ءبىرىنشىسى – قازاق ءتىلىنىڭ مەملەكەتتىك ماڭىزدى سالالارداعى قولدانۋ اياسى تار دەپ تيتۋلدى ۇلتتىڭ سانى مەن ساناسى وسكەنىن ەسەپكە الماي، يمپەريالىق ءتىلدىڭ بۇرىنعى ءبىر تىلدىلىك بارشا باسىمدىقتارىن ساقتاۋ. ەكىنشىسى – ەلدەگى ۇلىورىستىق يمپەريالىق-وتارشىلدىق امبيتسيامەن ءالى كۇنى ۋلانۋىنان ارىلماعان 20 پايىز الاشتىق سلاۆيان قاۋىمداستىعىنىڭ ءتىلدى ۇيرەنۋدەن باس تارتىپ كەلۋىن ساياسي جەتىستىگىمىز دەپ دارىپتەۋ.

ءۇشىنشىسى – قازاق ءتىلىنىڭ وزگە تىلدەن تىكەلەي ءسوز قابىلداۋىنا سان مىڭداعان جەردەن توسقاۋىل قويىپ، ونىڭ ورىنا اۋىزدى قۋ شوپپەن ءسۇرتىپ، تمد-داعى ايماقتىق باسەكەگە قابىلەتسىز، عىلىمي-تەحنيكالىق نەگىزى جوق ءتىل دەگەن قولدان جاسالعان ساياسي-قوعامدىق ءميفتى ادەمى ساياسي-قوعامدىق جادىلىق قوراپقا وراپ، جۇرتتىڭ كوزىن الداۋدى داستۇرگە اينالدىرۋ.

بىزگە ورىس ءتىلدى ەمەس، ەلباسىمىز دارەگەيىندەگى ءتىلى انا تىلىندە شىعىپ، قازاق جانە ورىس ءتىلىن ەركىن بىلەتىن ساياسي توپتان تۇراتىن ءتۇرلى دەڭگەيدەگى بيلىك اپپاراتى كەرەك. ورىس ءتىلدى «قۇتتىقتايمىن مەن وسىرەدىنى» «قىتىقتايمىن مەن وسىراتىن» دەپ ماسقارامىزدى شىعارىپ جۇرگەن بيلىكتەگى ءبىر تىلدىلىكتى جوياتىن ۋاقىت جەتتى. ءارى بارشا قۇجات مەملەكەتتىك تىلدە دايىندالىپ، قالعان 20 پايىز ەل تۇرعىندارىنا ورىسشا اۋدارىلىپ ۇسىنىلاتىن كەزەڭ كەلدى.

قازاق تىلدىلىك بىرەگەيلىكتى ومىرگە اكەلۋدىڭ  كەڭ كولەمدى رەفورماسىن بيلىك قالاماسا، وندا تومەننەن بەيبىت تۇردە تىلدىك توڭكەرىس جاساۋدىڭ ءداۋىرى تۋدى. سول كەزدە جوعارىدا اتالعان ءۇش ءميفتىڭ كۇلى كوككە ۇشادى.

ءبىز انا ءتىلىمىزدىڭ ۇستەمدىك قۇرۋى ءۇشىن وسى تاقىرىپتى ءار جەردە شاشىراپ ءسوز ەتپەي، تىك كوتەرىلە تالاپ ەتەتىن بۇكىلالاشتىق ءتىل تاۋەلسىزدىگى ايلىعىن جارتتى جىلدا ءبىر بەيبىت شەرۋمەن وتكىزۋدى جولعا قويۋمىز كەرەك.

بيلىكتىڭ قازاق ءتىلدى كادرلارى بار. ەندىگى جەردە «قىتىقتايمىن مەن وسىرادىلار» ەمەس، تاپ ولاردىڭ مەملەكەتتى باسقارۋعا كەلۋىن تالاپ ەتۋگە ءتيىسپىز. ءبىز تەك ءۇنسىز بۇعىپ، بابامىزدان قالعان ءتىلدى دارمەنسىز ەتىپ وتىرمىز. وعان تەك ءوزىمىز كىنالىمىز. تەك بەيبىت تۇردە مەملەكەتتىك ءتىلدىڭ ۇستەمدىك قۇرۋىن تالاپ ەتۋ ۋاقىت تالابى ەكەنىن بيلىككە ۇقتىراتىن كەزەڭ تۋدى. وعان ات سالىسۋ قاسيەتتى بورىشىمىز.

ءابىل-سەرىك الياكپار

Abai.kz

5 پىكىر